استانا. 18 شىلدە. قازاقستان رەسپۋبليكاسى مادەنيەت مينيسترلىگى, قازاق عىلىمي-زەرتتەۋ مادەنيەت ينستيتۋتى ۇيىمداستىرۋىمەن «كورمە» كورمە ورتالىعى مەن ۇلتتىق اكادەميالىق كىتاپحانادا وتكەن دوڭگەلەك ۇستەلدەرگە قاتىسۋشىلار قازاقستاننىڭ مادەني ساياساتى تۇجىرىمداماسىنىڭ جوباسىن جان-جاقتى تالقىلاپ, ۇسىنىس-پىكىرلەرىن ورتاعا سالدى. بۇل تۋرالى egemen.kz ءتىلشىسى حابارلادى.
كەڭەستىك داۋىردە قالىپتاسىپ قالعان قاساڭ قاعيدا بويىنشا مادەنيەت دەگەنىمىز ءار ادامنىڭ بوس ۋاقىتىندا عانا كوڭىل بولەتىن, سونداي-اق كوبىنە ويىن-ساۋىق سيپاتىنداعى شارالار بولدى دەسەك, ەندىگى ۋاقىتتا ول ۇلتتىق يدەولوگيانى قالىپتاستىرۋدىڭ باستى قۇرالىنا اينالماق. كەلەشەكتە مۇنداعى ونەر مەن مادەني ۇيىمدار ەكونوميكالىق تۇرعىدا پايدا اكەلەتىن تابىس كوزى دەڭگەيىنە جەتۋى ءتيىس دەلىنۋدە. مىسالى, كينويندۋستريا, بالالارعا, ۇلكەندەرگە ارنالعان مۋلتفيلمدەر, تسيركتىك ونەر, كونتسەرتتىك جانە تەاتر شىعارماشىلىعى سياقتى ت.ب. سانداعان سالا قازىر مەملەكەتتىڭ قارجىسىمەن عانا جان ساقتاپ تۇر. ال الەمدىك تاجىريبە مىسالدارى مۇلدە باسقا جاعدايلارعا كوز جەتكىزۋدە. اسىرەسە, جاھاندانۋ تۇسىندا بۇل باسىمدىقتار بارىنشا ايقىندالا تۇسۋدە. ءبىر عانا كينويندۋستريانىڭ عالامات تۋىندىلارىنىڭ وزىنەن ەلدەرىنە قىرۋار تابىس كەلتىرىپ وتىرعان الەمدىك دەڭگەيدەگى كومپانيالار قانشاما. مۇنداي زاماناۋي ۇردىستەردى مۋزەي, تەاتر سياقتى باسقا دا مادەني وشاقتار باستان كەشۋدە. قازاقستان رەسپۋبليكاسىنىڭ پارلامەنتى سەناتىنىڭ دوڭگەلەك ۇستەلىندە, «نۇر وتان» حدپ قاراستى «ميراس» قوعامدىق كەڭەسى, ۇلتتىق كاسىپكەرلەر پالاتاسى مەن شىعارماشىلىق وداقتارى وكىلدەرى وتىرىستارىندا تالقىلاۋدان وتكەن تۇجىرىمداما جوباسى بۇدان ءارى قاراي شىعارماشىلىق ادامدارىنىڭ, كاسىپكەرلەر مەن مەملەكەتتىك ورگانداردىڭ, باق وكىلدەرىنىڭ قاتىسۋىمەن كەڭىنەن تالقىلانۋدا. مىسالى, «كورمە» كورمە زالىنداعى دوڭگەلەك ۇستەلدە مادەنيەت مينيسترلىگىنىڭ ساراپتاما جانە ستراتەگيالىق جوسپارلاۋ دەپارتامەنتى ديرەكتورىنىڭ ورىنباسارى ۆيكتور روديونوۆ, قازعزمي باس ديرەكتورىنىڭ ءبىرىنشى ورىنباسارى اندرەي حازبۋلاتوۆ, ساتس اتىنداعى مەملەكەتتىك بالالار مەن جاسوسپىرىمدەر تەاترىنىڭ ديرەكتورى نادەجدا گوروبەتس, يۋنەسكو-نىڭ ماتەريالدىق مادەنيەت ەمەس مادەني مۇرا ماسەلەلەرى بويىنشا ساراپشىسى الميرا ناۋرىزباەۆا, ۇلتتىق مۋزەيدىڭ ديرەكتورى دارحان مىڭباي, ۇلتتىق اكادەميالىق كىتاپحانانىڭ ديرەكتورى ءۇمىتحان مۇڭالباەۆا, م.گوركي اتىنداعى مەملەكەتتىك اكادەميالىق ورىس دراما تەاترىنىڭ ديرەكتورى ەركىن قاسەنوۆ جانە ت. ب. تۇجىرىمداما جوباسى تۋرالى ءوز پىكىر-ۇسىنىستارىن ورتاعا سالا كەلىپ, نەگىزىنەن مۇنداعى ماسەلەلەرمەن تولىقتاي كەلىسەتىندىكتەرىن ايتتى.
قاراشاش توقسانباي.
دەرەككوز: egemen.kz
فوتو: www.google.com