بۇل كۇندەرى الماتى قالاسىنىڭ ىرگەسىندە ورنالاسقان بايسەركە اۋىلىنداعى الەكساندر اسانوۆ اتىنداعى كلۋبتا ستەند اتۋدان الەم كۋبوگى ءوتىپ جاتىر.
سارسەنبى كۇنى قازاقستان ۇلتتىق قۇراما كومانداسىنىڭ قورجىنىنا ەكى مەدال ءتۇستى. «سكيت» سايىسىندا اسەم ورىنباي الدىنا جان سالماي, التىننان القا تاقتى. ەكىنشى جانە ءۇشىنشى ورىنداردى ءۇندىستاننىڭ قوس وكىلى – گانەمات سەحون مەن دارشنا راتحور يەلەندى. ەستەرىڭىزگە سالا كەتەيىك, 29 جاستاعى قازاقتىڭ قۇرالايدى كوزگە اتقان مەرگەنى 2018 جىلى ازيا چەمپيوناتىندا كۇمىس مەدال ەنشىلەسە, 2021 جىلى الەم كۋبوگىندە قولاعا قول سوزعان ەدى. سونداي-اق ول الدىڭعى جىلى ونلاين-فورماتتا وتكەن قۇرلىق بىرىنشىلىگىندە توپ جارعان بولاتىن.
«سكيتشىلەردىڭ» ارالاس جۇپتار باسەكەسىندە اسەم ورىنباي مەن ەدۋارد ەششەنكو كۇمىس جۇلدە يەلەندى. ولار تەك يتاليا-2 كومانداسىنا ەسە جىبەردى.