2023 جىلدىڭ 22 مامىرىنان باستاپ ەلىمىزدە كونسترۋكتور-اۆتوكولىكتەردى زاڭداستىرۋ باستالدى. بۇعان دەيىن مەملەكەت باسشىسىنىڭ تاپسىرماسىمەن 2022 جىلدىڭ 1 قىركۇيەگىنە دەيىن ەل اۋماعىنا كىرگىزىلگەن شەتەلدىك تىركەۋدەگى كولىكتەردى زاڭداستىرۋعا (ارزان باعامەن) رۇقسات ەتىلگەن ەدى. ال بۇعان دەيىن ەلگە قوسالقى بولشەكتەر رەتىندە اكەلىنگەن كولىك يەلەرى رەسمي تىركەۋ قۇجاتتارىنىڭ جوقتىعىنان قيىندىقتارعا تاپ بولىپ كەلگەن.
ۇكىمەت بۇل ماسەلەنى شەشۋ ءۇشىن ازاماتتارعا كونسترۋكتور-اۆتوكولىكتەردى زاڭداستىرۋعا جانە باستاپقى تىركەۋدى جۇزەگە اسىرۋعا مۇمكىندىك بەرەتىن ءتيىستى ەرەجەلەرگە وزگەرىستەر ەنگىزدى. مۇنداي كولىك قۇرالدارىن باستاپقى تىركەۋ ءۇشىن الىم مولشەرلەمەسى 200 مىڭ تەڭگەنى قۇرايدى.
اۆتوكولىكتەردى زاڭداستىرۋ ءۇشىن وتىنىمدەردى «Egov» قىزمەتتەرى جانە ەكىنشى دەڭگەيلى بانكتەردىڭ ءموبيلدى قوسىمشالارى ارقىلى بەرۋگە بولادى.
ايتا كەتۋ كەرەك, ەلىمىزگە قوسالقى بولشەكتەر تۇرىمەن اكەلىنگەن جانە كەدەندىك تازارتۋدان وتپەگەن اۆتوكولىكتى تىركەۋ كۋالىگىندە مەنشىك قۇقىعىن وزگەرتۋگە تىيىم سالۋ جانە تەك قازاقستان اۋماعىندا پايدالانۋعا رۇقسات بەرۋ تۋرالى جازبا كورسەتىلەدى.
ىشكى ىستەر مينيسترلىگىنىڭ مالىمەتىنشە, اكتسيا باستالعالى رەسپۋبليكا بويىنشا 107 مىڭنان اسا كولىك زاڭداستىرىلعان. سونىمەن قاتار 14 مىڭعا جۋىق كونسترۋكتور-اۆتوكولىك انىقتالعان.
تىركەۋ ءۇشىن كولىك يەلەرى ءوتىنىم, ىشكى ىستەر ورگانىنىڭ وكىلەتتى قىزمەتكەرى بەرگەن ترانسپورت قۇرالىن تەكسەرىپ-قاراۋ اكتىسىن جانە تەحنيكالىق تەكسەرىپ-قاراۋدىڭ دياگنوستيكالىق كارتاسىن ۇسىنۋى قاجەت.
كونسترۋكتور-اۆتوكولىكتى زاڭداستىرۋ ءۇشىن كەلەسىدەي قادامداردى رەت-رەتىمەن ورىنداۋ كەرەك. الدىمەن ونلاين-ءوتىنىم بەرىلىپ, سوسىن ونىڭ ەلەكتروندى تىركەۋى جاسالادى. بۇل رەتتە كونسترۋكتورلىق اۆتوكولىكتەردىڭ بارلىق يەلەرىنە اۆتوماتتى تۇردە باس تارتۋ جانە قولدا بار قۇجاتتاردى پروتسەسسينگتىك ورتالىقتىڭ (پو) قىزمەتكەرىنە ارنايى حقكو-دا ۇسىنۋ قاجەتتىلىگى تۋرالى حابارلاما جىبەرىلەتىنى ءتۇسىندىرىلدى.
ەكىنشىدەن, پو قىزمەتكەرى ترانسپورت قۇرىلعىسىنا تيەسىلى قۇجاتتىڭ دۇرىستىعىن تەكسەرەدى. ەگەر ول كونسترۋكتور-اۆتوكولىكتىڭ تالاپتارىنا ساي بولسا ونى ەلەكتروندى ماقۇلداۋ پاراعىنا قوسادى.
ءۇشىنشى قادام – ءوتىنىم بەرۋشى تاعى دا ونلاين-ءوتىنىم بەرەدى جانە ەلەكتروندى ماقۇلداۋ پاراعى بويىنشا الدىن الا تەكسەرۋدەن وتەدى. سودان كەيىن تەكسەرۋ بەكەتىنە باعىتتالادى. بۇل كەزەڭدە ونىڭ اۆتوكولىگىن ەكسپەرت-كريميناليستەر سالىستىرىپ تەكسەرۋدەن وتكىزەدى.
سالىستىرىپ تەكسەرۋدەن ءساتتى وتكەننەن كەيىن ءوتىنىم بەرۋشى حقكو-عا بارلىق قاجەتتى قۇجاتتاردى ۇسىنادى. ونىڭ ىشىندە دياگنوستيكالىق كارتا بولادى جانە 200 مىڭ تەڭگە كولەمىندە مەملەكەتتىك باج سالىعى مەن الىمدى تولەيدى.
ەسكە سالىپ وتەيىك, كونسترۋكتور-اۆتوكولىك – بۇل مىندەتتى تۇردە ءجۇرىس بولىگى جانە ودان اجىراتىلعان قوزعالتقىشى بار جاڭا ءاۆتوموبيلدىڭ شاناعىن قامتيتىن قۇرىلىم. ادەتتە, بۇل شاناق ەلگە قوسالقى بولشەكتەر دەگەن جەلەۋمەن اكەلىنىپ, ەسكى كولىككە ورناتىلعان. وسىلايشا, ەسكى قۇجات بويىنشا «جاڭا» كولىكتەر پايدا بولادى.
زاڭداستىرۋ شاراسى 2023 جىلدىڭ 1 شىلدەسىنە دەيىن جالعاسادى.