جۇمىسپەن قامتۋ – باستى باعىت

ءاربىر ەكىنشى تۇرعىن شاعىن جانە ورتا بيزنەستە ەڭبەك ەتەدى

ايماق باسشىسىنىڭ ايتۋىنشا, ءوڭىر ەكونوميكاسىنىڭ دامۋى تۇراقتى. بيىلعى ءتورت اي­داعى الەۋمەتتىك-ەكونو­ميكا­لىق كورسەتكىشتەرى وڭ ديناميكانى كورسەتكەن. ونەركاسىپ ونىمدەرىنىڭ كولەمى – 1,1 ترلن تەڭگە شاماسىندا.

– ونەركاسىپتىڭ فارماتسەۆتيكا, ماشينا جاساۋ, جەڭىل ونەركاسىپ, قاعاز ونىمدەر وندى­رى­سىندەگى ءوسىم 20 پايىزدان 60 پايىزعا ارتتى. نەگىزگى كاپي­تالعا 176 ملرد تەڭگە ين­ۆەس­تيتسيا قۇيىلدى. ءوسىم – 25 پايىز. بيىل 793 ملرد تەڭگە ين­­ۆەس­تيتسيا كۇتىلەدى. سونىڭ نا­­تي­جەسىندە وڭىردە 2 مىڭ­نان اسا تۇراقتى جۇمىس ورنى قۇرى­لادى. ال­بەتتە, تۇر­عىن­داردىڭ جۇمىسپەن قام­تىلۋى – باسىم باعىتتىڭ ءبىرى. سول ارقىلى ولاردىڭ تا­بىسىن ارتتىرۋ – ماقسات. بۇل – ءبىرىنشى كەزەكتە جاڭا ينۆەس­تيتسيالىق جوبالار. بۇگىننىڭ وزىندە شاعىن جانە ورتا بيزنەس­تىڭ ءوسىمى 20 پايىزدان استى. اي­ماقتىڭ ەكونوميكالىق قابىلەتتى تۇر­عىنىنىڭ تەڭ جارتىسىنا جۋى­عى وسى شاعىن جانە ور­تا بيزنەس­تە ەڭبەك ەتەدى. بۇل دەگەنىمىز – وبلىستىڭ ءاربىر ەكىنشى تۇر­عىنى. قازىرگى ۋاقىتتا كاسىپ­كەرلەردىڭ 2,5 مىڭنان اسا جوباسى مەملەكەتتىك قولداۋدى يەلەندى. جىل سوڭىنا دەيىن پورتفەلدى 5,5 مىڭ جوباعا دەيىن ۇلعايتىپ, قولداۋ جاساۋ جوسپاردا, – دەدى ە.بولەكپاەۆ.

سونىمەن قاتار وبلىس اكىمى ايماقتا ءوندىرىستىڭ تىڭ كوزدەرىن اشۋعا دەن قويىلعانىن ايتادى. ونىڭ ىسكە اسۋىنا وڭىرلىك «كاسىپكەر» باعدارلاماسى دا ىقپال ەتپەك ەكەن. ال ءبىر كەز­دەگى «قاراپايىم ەكونوميكا» باعدارلاماسى بويىنشا جەڭىل ونەركاسىپتە 4 جوبا تابىستى ىسكە اسقان. ولاردىڭ ءونىمىن بۇگىن­دە دەنساۋلىق ساقتاۋ, ءبىلىم بەرۋ سالاسى سەكىلدى ۇيىمدار تۇتىنادى.

قوعامنىڭ ءالجۋاز توبىنا 200 گرانت بولىنگەن. جاس كاسىپكەرلەرگە 600 گرانت پەن 324 جەڭىلدەتىلگەن نەسيە بەرىلەدى. نەسيەنىڭ مولشەرلەمەسى – 2,5 پايىز. بۇعان قوسا مۇگەدەكتىگى بار ادامداردى جۇمىسقا ورنالاستىرۋ جوبالارى دا جولعا قويىلعان. سونىڭ ناتيجەسىندە 700 ادامنىڭ جۇمىسقا تۇرۋىنا مۇمكىندىك جاسالادى.

– قاراعاندى – ءىرى ساۋدا-لوگيستيكا حابى. مۇندا ەلەكتروندى كوممەرتسيا سەكتورى ۇدايى ءوسىپ كەلەدى. ساۋدا سالاسىندا ءوسىم 29 پايىزعا جەتتى. اۆتوكولىكتە قىزمەت كورسەتۋدىڭ كولەمى 18,4 پايىزعا كوبەيدى. 2021 جىل سوڭىندا قاراعاندىدا ەلەكتروندى بيلەت جۇيەسى ىس­كە قوسىلدى. وسى جىلدىڭ اقپا­نىنان قاراعاندىنىڭ سەرىكتەس قالالارمەن بايلانىستىراتىن كولىكتەر بۇل جۇيەگە كىردى. بۇل بيلەت جۇيەسىندە اشىقتىقتى قالىپتاستىردى. قالاارالىق جولاقى ەكى ەسەگە ارزاندادى. سول ارقىلى قاراعاندى اگ­لو­مەراتسياسىنىڭ 30 مىڭ تۇرعىنىنا كۇن سايىن وبلىس ورتالىعىنا قاتىناۋعا قول­داۋ جاسالدى دەپ ويلايمىن. وعان قوسا 1 مامىردان باس­تاپ قاراعاندىدا 7 جاستان 18 جاسقا دەيىنگى بالالارعا تەگىن جول ءجۇرۋدى قامتاماسىز ەتتىك. جاقىن ارادا ەلەكتروندى بيلەت ماسەلەسى بالقاش پەن تەمىرتاۋدا شەشىمىن تابادى. اۆتوبۋس پاركىن جاڭارتۋدا دا جوسپارىمىز بار. 165 جاڭا اۆتوبۋس ساتىپ الامىز. ونىڭ 33-ءى سەرىكتەس قالا مارشرۋتتارىندا جۇرەدى. بارلىق اۆتوبۋس – وتاندىق ءوندىرۋشى ساران قالاسىنداعى QazTehna زاۋى­تىنىكى, – دەدى ە.بولەكپاەۆ.

2027 جىلى ءوڭىر ءوزىن ونىممەن 80 پايىز قامتيدى

وبلىس الداعى ۋاقىتتا ءوزىن قاجەتتى ونىممەن قامتۋدىڭ ۇلەسىن 80 پايىزعا دەيىن جەت­كىزۋدى مەجە ەتىپ العان. ال اۋىل شارۋاشىلىعى سالاسىندا ايماقتا 24 مىڭ ادام ەڭبەك ەتەدى ەكەن. اۋىلدى دامىتۋ ماقساتىندا «اۋىل اماناتى» جوباسى ارقىلى 653 شاعىن نەسيە بەرىلەدى.

– «اۋىل اماناتى» جوباسىمەن اۋىل تۇرعىندارىنا 3,4 ملرد تەڭگە سوماسىندا 653 شاعىن نەسيە بەرەمىز. كوپ­بالالى وتباسىلارعا, اتاۋلى الەۋ­مەتتىك كومەك الۋشىلارعا جانە NEET جاستارىنا ەرەكشە نازار اۋدارامىز. قازىردىڭ وزىندە 353 ءوتىنىش قابىلداندى, – دەيدى وبلىس اكىمى. وسىلايشا, اۋىلداردا 2,5 مىڭ جاڭا جۇ­مىس ورنىن اشۋ جوسپارلانىپ وتىر. بۇگىندە وڭىردە مال شا­رۋاشىلىعى ءونىمىنىڭ كولەمى 65 ملرد تەڭگەگە جەتىپتى. مال باسى دا ءوسىپ كەلەدى. ءداندى-داقىلدار سەبەتىن القاپتار ۇلعايعان. كوكتەمدە اگرارشىلار 1,2 ملن گەكتارعا ءدان ءسىڭىردى. بۇل كور­سەتكىش بىلتىرعىدان 22 مىڭ گەكتارعا ارتىق دەسەدى.

سونداي-اق 52 ينۆەستي­تسيا­لىق جوبانى قامتىعان پۋل جاساق­تالعان. ونىڭ قۇنى – 1,2 ملرد تەڭگە. بۇل 12 مىڭ تۇراقتى جۇمىستىڭ پايدا بولۋىنا ىق­پال ەتەدى. 11 جوبا بيىل قو­سى­لادى. ونىڭ ءبىرى – ساران قالا­سىنداعى تۇرمىستىق تەحنيكا شىعاراتىن زاۋىت. جوبا ارقىلى 1 مىڭ ادام ناپاقاسىن ايىرادى.

مونوقالالاردىڭ تىنىسى اشىلماق. قازىرگى ۋاقىتتا سا­ران يندۋستيالدىق ايماعىندا مەملەكەت باسشىسى تاپسىرماسىمەن جاڭا وندىرىستەر ءۇشىن ينفراقۇرىلىمدار جۇرگى­زىلىپ جاتىر. ناتيجەسىندە, ين­دۋس­تريالدىق ايماقتا 3 مىڭنان اسا جۇمىس ورنى قۇرىلادى. بۇل ءادىس وزگە دە مونوقالالارعا ولاردىڭ ەرەكشەلىگىن ەسكەرە وتىرىپ, قولدانىلادى. ماسەلەن, بالقاشتا 240 ملرد تەڭگەنى قۇرايتىن 66 ءىس-شارا قاراستىرىلعان كەشەندى جوس­پار ازىرلەنگەن. ونداعى ماق­سات – بالقاشتا تولىققاندى تۋريستىك كلاستەر قۇرۋ. قازىرگى تاڭدا جوبا كەلىسىم دەڭگەيىندە.

ينفراقۇرىلىم جاڭارادى

ەرەكشە قاجەتتىلىكتەرى بار بالالارعا ءبىلىم بەرۋدىڭ قول­جەتىمدىلىگى دە – باستى نازاردا. ايماقتا ءاۋتيزمى بار بالالارعا ارنالعان العاشقى ورتالىق جۇ­مىس ىستەيدى. شاحتينسك قا­لاسىندا پمپك, قاراعاندىدا ينكليۋزيانى قولدايتىن ءۇش كابينەت اشىلدى. جالپى, 2025 جىلعا دەيىن قاراعاندى وبلىسىندا 22 جاڭا مەكتەپ سالىنادى. 22 مەكتەپتىڭ 18-ءى «جايلى مەكتەپ» ۇلتتىق جوباسى اياسىندا جانە تورتەۋى وبلىستىق بيۋدجەت ەسەبىنەن بوي كوتەرمەك. بيىل 13 ءبىلىم بەرۋ نىسانى كۇردەلى جوندەۋدەن وتەدى. سو­نى­­مەن قاتار قاراعاندىدا بيىل ءۇشىن­شى وقۋشىلار سارايىنىڭ قۇرى­لىسى باستالدى.

بۇگىنگى تاڭدا مەكتەپتەردە 1-4 سىنىپ وقۋشىلارى, ال بالاباقشالاردا الەۋمەتتىك وسال ساناتىنداعى بالالار تەگىن ىستىق تاماق ىشەدى. ليزينگتىك قارجىلاندىرۋ ەسەبىنەن مەكتەپ اۆتوپاركى ەكى ەسە ۇلعايدى.

ايماقتا 88 شاقىرىم جى­لۋمەن جابدىقتاۋ جەلىسى, 1 937 شاقىرىم ەلەكتر جەلىسى اۋىس­­تىرىلادى. نەگىزى, تۇراقتى جى­لۋمەن ۇزدىكسىز قامتۋ – باس­تى مىندەتتىڭ ءبىرى. وسى ورايدا تەمىرتاۋدا 29 شاقىرىم جىلۋ قۇبىرى اۋىسادى. جەو-2-دە جاب­دىقتاردى جوندەۋ جا­نە قا­لا­عا قاجەتتى جەتىنشى قازان­دىق­تىڭ قۇرىلىسى ءجۇرىپ جاتىر.

– وتكەن جىل تەمىرتاۋ تۇر­عىندارى ءۇشىن قيىن بولدى. قالا بويىنشا 29 شاقىرىم جىلۋ جەلىسىن جوندەۋ جوسپارلانىپ وتىر. «ارسەلورميتتال تەمىرتاۋ» كومپانياسىنا تيەسىلى جەو-2 جۇمىسىنا شا­عىم تۇسەدى. قازىر ستانسادا قازان­دىقتار جوندەلىپ جاتىر. جاڭا جەتىنشى قازاندىق سالىنىپ جاتىر, – دەدى ە.بولەكپاەۆ.

قاراعاندىدا جاڭا تۇرعىن ءۇيدىڭ كوبەيۋىنە بايلانىس­تى جىلۋ تاپشىلىعى بار. تاپ­شىلىقتى جويۋ ءۇشىن وبلىس ورتالىعىندا ءۇشىنشى جىلۋ ورتالىعىنىڭ قۇرىلىسى قار­قىندى جۇرۋدە. ساپالى اۋىز سۋ ماسەلەسى دە كە­زەڭ-كەزەڭىمەن ىسكە اسىرى­لىپ جاتىر. 2025 جىلعا قاراي وبلىس تۇرعىندارى ورتالىق­تاندىرىلعان سۋعا 100 پايىز قول جەتكىزەدى دەگەن جوس­پار بار.

اكىمنىڭ ايتۋىنشا, قاراعان­دى وبلىسىندا 1 374 شاقىرىم اۆتوجول جوندەلەدى. ونىڭ 640 شاقىرىمى – رەسپۋبليكالىق, 317 شاقىرىمى – وبلىستىق ماڭىزدا. 417 شاقىرىمى – جەر­گى­لىكتى جەلىلەر. سونىمەن نور­­ماتيۆتىك جاعدايداعى جول­دار­دىڭ ۇلەسى 92 پايىزدى قۇرايدى.

«ورتالىق-وڭتۇستىك» اۋ­قىم­­دى جوباسىن قوسا العاندا, جول ينفراقۇرىلىمىن جاقسار­تۋ جۇمىستارى جالعاسىپ جاتىر. بيىل «قاراعاندى – بالقاش» رەسپۋبليكالىق تاسجولىنىڭ ءتورت جولاعى اشىلادى. «قارا­عاندى – قارقارالى» جولىنىڭ بەس ۋچاسكەسىنە ورتاشا جوندەۋ جۇمىستارى جالعاسىپ, قارا­عاندى – جەزقازعان اۆتوجولىن رەكونسترۋكتسيالاۋ باستالادى ەكەن.

قاراعاندى وبلىسى