ەۋرازيالىق ەكونوميكالىق وداق شارتىنا قول قويىلۋى ەلباسىنىڭ الىستى بولجاي بىلەتىن كورەگەن ساياساتكەرلىگىن تاعى ءبىر دالەلدەدى. قاشاندا ىلگەرى كۇنگە دەگەن ءۇمىتتى قاداممەن قيمىلدايتىن مەملەكەت باسشىسى ن.نازارباەۆ باستاماسىنىڭ باياندىلىعىنا الەم يلاندى. وسىنشالىقتى اۋقىمدى ءىستىڭ ىرگەتاسى بەرىك قالانعانىن تاعى ءبىر مويىندادى دەۋ ورىندى بولماق. بۇل ءبىزدىڭ بويىمىزدا ەرتەڭگى كۇنگە دەگەن سەنىمدىلىكتى نىعايتا ءتۇستى. ەلدىڭ ەگەمەندىگى مەن ساياسي تاۋەلسىزدىگىنە سىزات تۇسىرمەي ءبىرىڭعاي ەكونوميكالىق بايلانىستاردى نىعايتۋعا باعىتتالعان بۇل باتىل قادام وداققا قاتىسۋشى قاي-قاي ەلگە دە ءتيىمدى ەكەنى ءسوزسىز. قازىر ىرگەڭدى تاس قىپ بەكىتىپ وتىراتىن ۋاقىت ەمەس. تورتكۇل دۇنيەگە قاراپ وتىرساڭ الىس-بەرىس, بارىس-كەلىس جاساماعان ەلدەردى كورمەيسىڭ, ولاي بولسا, بۇگىنگىدەي جاھاندانۋ زامانىندا ينتەگراتسيالىق ۇردىستەرگە يەك ارتۋدىڭ ەش ابەستىگى جوق. ونىڭ ۇستىنە وداققا قاتىسۋشى ەلدەردە ەكونوميكالىق بايلانىستاردىڭ بۇرىننان قالىپتاسقان داعدىسى بار.
ەۋرازيالىق وداق بىزگە ونىمدەرىمىزدى باسەكەگە قابىلەتتى ەتە وتىرىپ, ىرگەلەس جاتقان وڭىرلەرگە شىعارۋعا جاڭا جول اشىپ وتىر. ءبىز وسىنى ءوز كادەمىزگە جاراتا ءبىلۋىمىز كەرەك, ارينە. «سيتال-2» جشس-ءنىڭ كىرپىش زاۋىتى ەلىمىزدىڭ باتىس ايماعىندا كەراميكالىق كىرپىش جانە تاس بۇيىمدارىن شىعاراتىن بىردەن-ءبىر ءىرى كاسىپورىن بولىپ تابىلادى. كاسىپورىننىڭ وندىرىستىك قۋاتى جىلىنا 20 ميلليون دانا شارتتى كىرپىش شىعارۋعا مۇمكىندىك بەرەدى. زاۋىتتا كەراميكالىق كىرپىش پەن تاس بۇيىمدارىنىڭ 40-تان استام ءتۇرى شىعارىلادى. ءبىزدىڭ كەراميكالىق كىرپىشتەرىمىزگە ءوز ءوڭىرىمىزدى بىلاي قويعاندا, اتىراۋ, ماڭعىستاۋ, باتىس قازاقستان, قىزىلوردا وبلىستارىنان سۇرانىس جوعارى. بۇدان باسقا كورشىلەس رەسەيدىڭ ورىنبور وبلىسىنا دا وتكىزەمىز. بۇعان دەيىن ولارعا ءوز ءونىمىمىزدىڭ 10 پايىزىن وتكىزىپ كەلسەك, ەۋرازيالىق ەكونوميكالىق وداق تۋرالى شارت كۇشىنە ەنگەننەن كەيىن بۇل كولەم بۇرىنعىدان دا ارتا تۇسەتىنىنە سەنىمدىمىز.
ونىڭ ۇستىنە ءبىزدىڭ كىرپىشتەرىمىزدىڭ جىلۋ ۇستاعىشتىق, ىلعالعا بەرىكتىك, دىبىس پەن سۋىق وتكىزبەيتىن قاسيەتتەرى جوعارى. بىزگە 1 مىڭ شاقىرىمنان قاشىق جەرلەرگە ونىمدەرىمىزدى وتكىزۋ ءتيىمسىز. سوندىقتان بولاشاقتا كورشىلەس رەسەيدىڭ وڭتۇستىك ۋرالعا جاتاتىن وڭىرلەرىن دە كەراميكالىق كىرپىشپەن قامتاماسىز ەتۋدىڭ جولدارى قاراستىرىلۋدا. ءوزارا ارىپتەستىك العا باستايتىنىن ءومىردىڭ ءوزى كورسەتىپ وتىر. ورىنبوردا, تۇزتوبەدە وتكەن ونەركاسىپتىك كورمەلەرگە ۇدايى قاتىسىپ, ءوز ونىمدەرىمىزدى تۇتىنۋشىلارعا تانىستىرىپ ءجۇرمىز. اقتوبە قالاسىندا وتكەن «ەۋروپا-ازيا. شەكاراسىز ىنتىماقتاستىق» حالىقارالىق ونەركاسىپتىك كورمەسىندە ءبىزدىڭ ونىمدەرىمىزگە سۇرانىستىڭ جوعارى ەكەنى بايقالدى. وسى كورمە ەندى ورىنبور قالاسىندا وتەدى. ءبىز وسى مۇمكىندىكتى پايدالانىپ, وزدەرىمىزدىڭ ونىمدەرىمىزدى جارنامالايتىن بولامىز. رەسەيدىڭ وڭتۇستىك ۋرال ءوڭىرىنىڭ وبلىستارىنان جاڭا ءارىپتەستەر تابۋعا تىرىسامىز. سەبەبى, ولاردا بىزبەن باسەكەلەسەتىندەي كاسىپورىندار جوق. ءارى ءبىز كەراميكالىق كىرپىشتەرگە باعانى كوتەرگەن جوقپىز, سالىستىرمالى تۇردە باسقالارعا قاراعاندا ارزان.
2010 جىلى ماسكەۋدىڭ «ۆنيستروم» كەراميكا عىلىمي-زەرتتەۋ ينستيتۋتىنىڭ كومەگىمەن قوندىرعىنى جاڭعىرتتىق. بۇل ءونىم ساپاسىن جاقسارتۋعا نەگىز قالاپ وتىر. ەۋرازيالىق ەكونوميكالىق وداقتىڭ شەكارالاس ايماقتارمەن ارىپتەستىك قاتىناستاردى نىعايتاتىنى ءسوزسىز. بۇعان ءبىز دە ءوز دەڭگەيىمىزدە اتسالىساتىن بولامىز. جالپى, الىس-جاقىن ارىپتەستەرمەن ينتەگراتسيالىق ۇندەسۋ ىلگەرىلەۋگە العىشارت جاسايدى دەپ ويلايمىن.
ناتاليا كۋروچكينا,
«سيتال- 2» جشس باس تەحنولوگى.
اقتوبە وبلىسى.