ارقالىق قالاسىنىڭ پوليتسەيلەرى ميليتسيا داڭقى مۇراجايىن اشتى. ءتارتىپ ساقشىلارىنىڭ ەرلىك ءىسىن پاش ەتەتىن بۇل وبلىستاعى العاشقى مۇراجاي ەمەس. وبلىستىق ىشكى ىستەر دەپارتامەنتى جانە جىتىقارا قالالىق-اۋداندىق ىشكى ىستەر بولىمىندەگى وسىنداي مۇراجايلاردان دا ساقشىلاردىڭ اۋىر دا جاۋاپتى قىزمەتىمەن, قىلمىسكەرلەردى ۇستاۋ كەزىندەگى ەرلىك ىستەرىمەن تانىسۋعا بولادى.
مۇراجايدى جابدىقتاۋعا, ەكسپونات جيناۋعا ارقالىق قالاسىنداعى پوليتسيا ارداگەرلەرى اتسالىستى. وعان جۇزدەن اسا قۇندى جادىگەرلەر قويىلدى. تورعاي وبلىستىق ىشكى ىستەر باسقارماسىنىڭ باستىعى, وسى وڭىردەن شىققان العاشقى گەنەرالدىڭ ءبىرى امانگەلدى جارماعانبەتوۆتىڭ وقالى كيىمى مەن مەملەكەتتىك ناگرادالارىن, ۇلى وتان سوعىسىنا قاتىسقان ميليتسيا قىزمەتكەرلەرىنىڭ ءومىرباياندارىن, جەكە زاتتارىن كورۋگە بولادى.
سونداي ميليتسيا ارداگەرىنىڭ ءبىرى فەدور رومانەنكو ءالى كۇنگە دەيىن جاس پوليتسيا قىزمەتكەرلەرىنە ۇستازدىق ەتىپ كەلەدى. جەرگىلىكتى مەملەكەتتىك اۆتوينسپەكتسيادا قىزمەت ەتكەن, تورعاي وبلىسىنداعى العاشقى پولكوۆنيك الدابەرگەن يبراگيموۆتىڭ ميليتسيا تاياعىن كەلۋشىلەر, ونىڭ زامانداستارى قىزىقتادى. سونىمەن قاتار, ارقالىق قالاسىنداعى پوليتسەيلەردىڭ ۇزدىك قىزمەتى ءۇشىن العان مەدالدارى, گراموتالارى, كۋبوكتارى جادىگەرگە اينالىپتى. ارقالىق قالالىق ىشكى ىستەر باسقارماسى وسى سالانىڭ 2014 جىل باسىنان بەرگى جۇمىستار قورىتىندىسىندا وبلىس بويىنشا ۇزدىك اتانىپ وتىر. قالالىق پوليتسەيلەر تەك تىنىشتىقتى قورعاپ قانا قويمايدى, ولار سپورتقا, كاسىبي بىلىكتىلىگىن كوتەرۋگە دە ۋاقىت تابادى.
ميليتسيا داڭقى مۇراجايىنىڭ اشىلۋى سالتاناتىنا تەك ارقالىق قانا ەمەس, تورعاي وڭىرىنەن – جانگەلدين جانە امانگەلدى اۋدانىنىڭ پوليتسەيلەرى دە قاتىسىپ, ارقالىقتىق ارىپتەستەرىن قۇتتىقتادى.
ءنازيرا جارىمبەتوۆا,
«ەگەمەن قازاقستان».
ارقالىق.