قازاقستان-رەسەي شەكاراسىندا زەرگەرلىك زاتتاردى زاڭسىز وتكىزبەك بولعان كۇدىكتى ايەلدىڭ جولى كەسىلدى. بۇل وقيعا «جايساڭ» بەكەتىندە ورىن الدى. وندا اقتوبە شەكارا وتريادىنا قاراستى «جايساڭ» (تەمىرجول) بەكەتىنىڭ باقىلاۋشىلارى «تاشكەنت – ماسكەۋ» پويىزىن تەكسەرۋ كەزىندە وزبەكستان ازاماتشاسىنىڭ قول جۇگىندە جاسىرىلعان زەرگەرلىك زاتتاردى انىقتادى. ونىڭ سالماعى 800 گرامم بولىپ شىقتى. ۇستالعان ازاماتشانىڭ سوزىنە قاراعاندا, زەرگەرلىك زاتتاردى ءاندىجان قالاسىنان الىپ, رەسەي جەرىندە ساتۋعا اكەتىپ بارا جاتىر ەكەن. بۇل زاڭسىز زاتتار كەدەن كوميتەتىنىڭ اقتوبە وبلىستىق دەپارتامەنتىنە وتكىزىلدى. ەندى تەرگەۋ جۇمىستارى جۇرگىزىلۋدە, دەپ حابارلادى قر ۇقك شق ءباسپاسوز قىزمەتى.