كورشى مەملەكەتتەرمەن ساۋدانى كەڭەيتۋ ماقساتىندا 2025 جىلعا قاراي ەلىمىز ءوز شەكارالارىنىڭ پەريمەترى بويىنشا 5 حاب سالاتىن بولعان ەدى. سونىڭ بىرەۋى جەتىسۋ وڭىرىنە تيەسىلى. قازىر «قورعاس تورابى» ترانسشەكارالىق حابىن قۇرۋ جۇمىستارى بەلسەندى جۇرگىزىلىپ جاتىر.
بۇل – قازاقستان – قىتاي شەكاراسىندا ورنالاسقان ينفراقۇرىلىمدىق نىسانداردىڭ قولدانىستاعى كەشەنى. ول قويمالاۋ, ساقتاۋ, قايتا وڭدەۋ, جاڭا تاۋارلار ءوندىرۋ سالاسىنداعى وندىرىستىك كووپەراتسيانى قامتاماسىز ەتۋگە باعىتتالادى. سونداي-اق حالىقارالىق تاۋار وتكىزگىش جۇيەلەرگە شوعىرلاندىرا وتىرىپ, ودان ءارى ساتۋعا مۇمكىندىك بەرمەك. ودان بولەك, لوگيستيكا, ساۋدا ورىندارىن جالعا الۋ, ساتۋ الدىنداعى دايىندىق, تاۋارلاردى كوتەرمە پارتيالار, تيەۋ-ءتۇسىرۋ جانە ترانسكونتينەنتالدىق جۇك تاسىمالدارىن دامىتۋ بويىنشا شوعىرلاندىرۋ جانە قايتا ءبولۋ قىزمەتتەرى ۇسىنىلادى.
اتالعان توراپقا «قورعاس – شىعىس قاقپاسى» اەا, «قورعاس» شەكارا ماڭى ىنتىماقتاستىعى حالىقارالىق ورتالىعى, «نۇر جولى» باقىلاۋ-وتكىزۋ پۋنكتى, «التىنكول» تەمىرجول ستانساسى جانە «قۇرعاق پورت» تەمىرجول تەرمينالى كىرەدى.
«بۇل جوبانى ءىس جۇزىندە ىسكە اسىرۋ ەكسپورت, ترانزيت كولەمىن ۇلعايتۋ جانە وندىرىستىك كووپەراتسيانى دامىتۋ ءۇشىن جوعارىدا اتالعان ينفراقۇرىلىمدىق نىسانداردى ۇشتاستىرۋدان جانە ينتەگراتسيالاۋدان تۇرادى», دەيدى ساۋدا جانە ينتەگراتسيا مينيسترلىگىنىڭ وكىلدەرى.
ەلىمىزدىڭ كولىك-لوگيستيكا الەۋەتىن دامىتۋ تۇجىرىمداماسىنا سايكەس التىنكول – قورعاس شەكارا وتكەلىنىڭ وتكىزۋ قابىلەتى جىلىنا 20 ميلليون توننانى قۇرايدى. بۇل رەتتە ول ارقىلى قىتاي – ەۋروپا – قىتاي, قىتاي – ورتالىق ازيا ەلدەرى – قىتاي باعىتتارى, سونداي-اق كاسپي جانە يران باعىتتارى بويىنشا تاۋارلار كولىكپەن تاسىمالدانادى.
«قورعاس – شىعىس قاقپاسى» قۇرعاق پورتى تۇجىرىمداما بويىنشا ماگيسترالدى تەمىرجول جەلىسى جانە اۆتوجولدارمەن تەحنولوگيالىق بايلانىستى بولماق. ناتيجەسىندە, بۇل قىتايدان ەۋروپاعا, سونداي-اق ورتالىق ازيا مەن پارسى شىعاناعى ەلدەرىنە جۇك اعىنىن تاراتۋدى قامتاماسىز ەتەتىن كولىك-لوگيستيكالىق حابتاردى قۇرادى.
ء«ىرى ساۋدا-لوگيستيكا ورتالىقتارىن قۇرۋ ەكىجاقتى ساۋدا-ەكونوميكالىق قاتىناستاردىڭ دامۋىنا وڭ اسەر ەتەدى, ىرگەلەس مەملەكەتتەردىڭ وندىرۋشىلەرى مەن كاسىپكەرلەرى اراسىنداعى ىسكەرلىك بايلانىستاردى جانداندىرادى, ولاردىڭ اراسىنداعى ءوزارا تاۋار اينالىمىنىڭ ۇلعايۋىن ىنتالاندىراتىن بولادى», دەيدى سالا وكىلدەرى.
تاعى ءبىر ترانسشەكارالىق باعىت دوستىق شەكارا وتكەلىمەن بايلانىستى. ونىڭ وتكىزۋ قابىلەتى 20 ملن توننانى قۇرايدى. وسىعان وراي ەلىمىزدە ەكىنشى جول قۇرىلىسى جانە «دوستىق – مويىنتى» (833 شاقىرىم) تەمىرجول ۋچاسكەسىن ەلەكترلەندىرۋ جۇمىسى جۇرگىزىلىپ جاتىر. جوبانى ىسكە اسىرۋ 2022–2025 جىلدارى ۇلتتىق جوسپارعا سايكەس 543 ملرد تەڭگەنى قۇرايدى.
مامانداردىڭ ايتۋىنشا, ترانسشەكارالىق حابتار قازاقستان وڭىرلەرى كاسىپورىندارىنىڭ ەكسپورتتىق الەۋەتىن دامىتۋعا ىقپال ەتەدى. شەكارا ماڭى ايماقتارىندا ينفراقۇرىلىمدىق كەشەندەردى دامىتۋ جوبالاردىڭ ونەركاسىپتىك كووپەراتسياسىن ىسكە اسىرۋ ءۇشىن جاعداي جاسايدى, بۇل جەتكىزۋ تىزبەگىندەگى قاتىسۋشىلار سانىن قىسقارتۋعا, تۇپكىلىكتى تۇتىنۋشى ءۇشىن ءونىمنىڭ قۇنىن تومەندەتۋگە جانە جەتكىزۋ جىلدامدىعىن ارتتىرۋعا مۇمكىندىك بەرەدى.
P.S.: ايتا كەتەيىك, «قورعاس» شەكارا ماڭى ىنتىماقتاستىعى حالىقارالىق ورتالىعى «ارنايى ەكونوميكالىق ايماقتىڭ باسقارۋشى كومپانياسى» اق اكتسيالارى رەسپۋبليكالىق مەنشىكتەن شىعارىلىپ, جەتىسۋ وبلىسى اكىمدىگىنىڭ كوممۋنالدىق مەنشىگىنە ءوتتى.
«قورعاس» شەكارا ماڭى ىنتىماقتاستىعى حالىقارالىق ورتالىعى» «ارنايى ەكونوميكالىق ايماقتىڭ باسقارۋشى كومپانياسى» اكتسيونەرلىك قوعامىنىڭ ءجۇز پايىز كولەمىندەگى مەملەكەتتىك اكتسيالار پاكەتى قازاقستان رەسپۋبليكاسىنىڭ زاڭناماسىندا بەلگىلەنگەن تارتىپپەن رەسپۋبليكالىق مەنشىكتەن جەتىسۋ وبلىسى اكىمدىگىنىڭ كوممۋنالدىق مەنشىگىنە بەرىلسىن» دەلىنگەن ۇكىمەت قاۋلىسىندا.
قاۋلى كۇشىنە ەندى.
جەتىسۋ وبلىسى