ونوماستيكا ماسەلەسىنە ءجۇردىم-باردىم قاراۋعا بولمايدى. ويتكەنى ەلدى مەكەندەردەگى ەسكىرگەن اتاۋلاردان قۇتىلۋدى جەلەۋ ەتىپ قانا قويماي, رەتى كەلسە, «كوكەسىنە كوشە بەرىپ, اۋىلىنىڭ اتىن اتاسىنا اۋىستىرۋدىڭ» ىڭعايىن ىزدەگەندەر دە از ەمەس. الايدا جەرگىلىكتى اتقارۋشى بيلىك ءدال وسى ماسەلەگە جەتە ءمان بەرىپ وتىر.
وبلىستىق مادەنيەت, تىلدەردى دامىتۋ جانە ارحيۆ ءىسى باسقارماسىنىڭ مالىمەتىنشە, بىلتىردان بەرى اياگوز, بورودۋليحا جانە ءۇرجار اۋداندارىنىڭ يدەولوگيالىق تۇرعىدان ەسكىرگەن كوشەلەرىن قايتا اتاۋ بويىنشا شەشىم قابىلدانىپ, اباي وبلىسىنىڭ وڭىرىنەن شىققان بەلگىلى تۇلعالاردىڭ ەسىمدەرى ناقتىلانعان. سول نەگىز بويىنشا, رەسپۋبليكالىق ونوماستيكا كوميسسياسىمەن ماقۇلداناتىن تاريحي تۇلعالار تىزىمىنە ەنگىزۋ ءۇشىن ءتيىستى ورگانعا جولدانعان جايى بار. اتاپ ايتقاندا, بيىل اباي وبلىستىق ونوماستيكا كوميسسياسىنىڭ ءبىر وتىرىسى وتكىزىلىپ, اياگوز, بەسقاراعاي, بورودۋليحا, ءۇرجار اۋداندارىنىڭ 44 كوشەسىن قايتا اتاپ, 1 مادەنيەت, 28 ءبىلىم بەرۋ مەكەمەسىنە بەلگىلى تۇلعالاردىڭ ەسىمدەرىن بەرۋ تۋرالى ۇسىنىستار قارالعان. كوميسسيا قورىتىندىسى بويىنشا اتالعان اۋدانداردىڭ يدەولوگيالىق تۇرعىدان ەسكىرگەن 19 كوشەسىن قايتا اتاۋ جايى ناقتى شەشىمىن تاپقانى قۋانتادى.
ءبىر قىزىعى, وبلىستىڭ بەسقاراعاي, بورودۋليحا اۋداندارىندا وسى ۋاقىتقا دەيىن وتىز جىل بويى لەنين, كيروۆ ەسىمىمەن اتالاتىن كوشەلەر ساقتالىپ كەلگەن ەدى. قازىر اتالعان اۋدانداردىڭ لەنين كوشەلەرىنە اباي قۇنانباي ۇلى, شاكارىم قۇدايبەردى ۇلى, دىنمۇحامەد قوناەۆتىڭ ەسىمدەرى بەرىلسە, كيروۆ كوشەلەرى بايتاق, امانات, جىبەك جولى كوشەلەرى دەپ قايتا اتالۋىنا وبلىستىق كوميسسيانىڭ ناقتى شەشىمى شىقتى.
مادەنيەت, تىلدەردى دامىتۋ جانە ارحيۆ ءىسى باسقارماسىنىڭ باسشىسى ايدار يبراەۆتىڭ مالىمەتىنە سۇيەنسەك, وبلىس اۋماعىنداعى 27 ءبىلىم جانە مادەني نىسانعا جاڭا اتاۋلار بەرۋ رەسپۋبليكالىق كوميسسيا قاراۋىنا ۇسىنىلىپ وتىر. اتاپ ايتقاندا, سەمەي قالاسىنىڭ №1 بالالار مۋزىكا مەكتەبىنە – لاتيف حاميدي, №18 جالپى ورتا مەكتەپكە – ءالىمحان ەرمەكوۆ, اباي اۋدانىنداعى ءبىر مەكتەپكە – قۇنانباي وسكەنباي ۇلى, اياگوز اۋدانىنىڭ №1 مەكتەبىنە – اباي قۇنانباي ۇلى, جارما اۋدانىنىڭ ورتالىقتاندىرىلعان كىتاپحانا جۇيەسىنە – دۋلات باباتاي ۇلى, كوكپەكتى اۋدانىنىڭ وقۋشىلار شىعارماشىلىق سارايىنا امىرە قاشاۋباەۆتىڭ ەسىمىن بەرۋ ءتارىزدى ۇسىنىستار ەنگىزىلگەن.
وبلىس ورتالىعى سەمەيدەگى كوشە اتاۋلارىنىڭ تاقتايشالارىن جاڭارتۋ جۇمىستارى دا جاندانا تۇسكەن. بۇگىنگى تاڭدا سەمەي قالاسىنىڭ تۇرعىن ءۇي-كوممۋنالدىق شارۋاشىلىق ءبولىمىنىڭ مالىمەتتەرىندە كورسەتىلگەنىندەي, شاكارىم, مۇحتار اۋەزوۆ داڭعىلدارىندا, ماڭگىلىك ەل, قابانباي باتىر, باۋىرجان مومىش ۇلى, جامبىل, فەدور دوستوەۆسكي كوشەلەرىندە 2858 انشلاگ ازىرلەنىپ, ىلىنە باستاعان. كەلەسى كەزەكتە اباي, شوقان ءۋاليحانوۆ, قايىم مۇحامەدحانوۆ, اسەت نايمانباي ۇلى, مىرجاقىپ دۋلات ۇلى, ماعجان جۇماباەۆ, قانىش ساتباەۆ, الاش قوزباعاروۆ, ايتكەش يبراەۆ, گەنەرال بەسپاەۆ, تولەۋباي امانوۆ, جاقيا ءشايجۇنىسوۆ, اكادەميك پاۆلوۆ, جۇسىپبەك ايماۋىتوۆ, بەكەن جاماقاەۆ, شىراقبەك قابىلباەۆ, كەشىرىم بوزتاەۆ, جانىبەك كارمەنوۆ, ءماجيت بەگالين كوشەلەرىن دە قامتۋ جوسپارلانىپ وتىر.
اباي وبلىسى