بۇل كارتينا ءبىزدىڭ ءداستۇرلى ۇعىمعا كەرەعار ينتەرەرگە تولى. ماق ۇلىققا مۇنشا ءمان بەرگەن شەبەردىڭ ءزىلدى ءازىلى وقىرماندى ءبىرتۇرلى ويعا جەتەلەيدى. اۋەلدە جۇمساق ورىندىقتا شالقاسىنان جاتقان يت كۇلكىلى كورىنگەنىمەن, ازدان كەيىن مازمۇن تۇزەدى. ءسىز شىعارماعا قاراپ وتىرىپ, الدەكىمگە تەڭەۋ ىزدەيسىز جانە بۇل ارەكەتىڭىزگە ىشتەي رازى دا بولاسىز.
اۋەلگى اڭگىمەنى «موپس» دەگەن سوزدەن باستاساق. بۇل – ءۇي ىشىندە اسىراۋعا قولايلى, تابەتى جوعارى, ءارى كىسىمەن تەز ءتىل تابىسىپ كەتەتىن ءيتتىڭ ءبىر ءتۇرى. ارعى تەگىن ەجەلگى قىتايدان تاراتادى. بۇل ءوزى بالالار ويناعانعا قولايلى, مىنەزى بىرتوعا جانۋار. بەرگەن تاماقتى تالعاماي جەپ, بۇرىشتا تىپ-تىنىش جاتا بەرەدى. ءتۇرى سۇستى بولعانىمەن, بويى الاسا, شاماسى ۇرۋگە عانا جەتەدى. سوسىن قىڭىرلاۋ, جۇمساعاندى ۇناتپايدى, ەرىنسە, جۇرمەي قويۋى دا مۇمكىن. مۇنداي جاعدايدا ۇيىڭىزگە كوتەرىپ قايتاسىز.
ال مۇنى فرانتسۋز حالقىنىڭ جانۋارلار سۋرەتشىسى الفرەد دەدرە نەگە مىسالعا الدى دەپ ويلايسىز؟ قىلقالام شەبەرى ونىڭ توعىشار قالپىن قوعامداعى كەيبىر ادامدارعا ۇقساتادى. «ورىندىققا جايعاسقان موپس» تۋىندىسى قازىرگى ۋاقىتتا مەملەكەتتىك ەرميتاج مۇراجايىنىڭ كوللەكتسياسىندا ساقتاۋلى. 1857 جىلى جازىلعان سۋرەتتىڭ ءوزى پاروديالىق جانە ساتيرالىق سيپاتقا يە. دەگەنمەن شەبەردىڭ بۇل كەنەپتى جازۋعا نە تۇرتكى بولعانى ءالى كۇنگە دەيىن جۇمباق كۇيىندە قالىپ وتىر. ال زەرتتەۋشىلەر ادەتتەگىدەي سانالۋان پىكىر شەڭبەرىندە ءسوز قاۋزايدى.
تۋىندى ەكسپوزيتسياسىنىڭ ورتاسىندا قىزىل توسەنىشى بار شاعىن ديۆاندا قاننەن-قاپەرسىز ۇيىقتاپ جاتقان موپستىڭ كەيپى جاتىپىشەر جالقاۋلىقتى سيپاتتايدى. ونىڭ جانىندا شاراپ قۇيىلعان شىنى مەن شاعىن ۇستەل ساياساتتان حابارى جوق ءۇي باتىرلارىنىڭ باكەن-شۇكەن اڭگىمەسىن ەلەستەتەدى. ال اياعىنىڭ استىندا جاتقان «Le Figaro» گازەتى سول پىكىرىمىزدى ۇستەي تۇسەتىندەي. مىجىلعان گازەت نومىرلەرى كەيىپكەردىڭ وزىنە قاجەت اقپاراتتى تابا الماي, شاراپقا ماسايا قالعىپ كەتكەنىن اشكەرەلەپ تۇر.
تۋىندىنىڭ تومەنگى جاعىندا موينىنا كۇمىس جاعالى قارعىباۋ تاعىلعان, رەڭكى كۇڭگىرت, سۇلباسى انىق كورىنبەيتىن تاعى ءبىر ءيتتى بايقايمىز. بۇل يت موپستىڭ كولەڭكەسىندە تۇر, كوزگە بىردەن تۇسپەيدى. اۆتوردىڭ كارتينانى جازۋ ءموتيۆى كەنەپتە بەينەلەنگەن كەيىپكەرلەردىڭ پروتوتيپتەرى كىم ەكەنىن وقىرماننىڭ ەنشىسىنە قالدىرۋعا تىرىسادى.
بەلگىلى فرانتسۋز ءجۋرناليسى يپپوليت دە ۆيللەمەسسانت اتالعان كارتينانى ءۇش جىل ۇزىلىستەن كەيىن قايتا باسىلا باستاعان «Le Figaro» گازەتىنىڭ كەزەكتى نومىرىنە جاريالايدى. ونىسى گازەتتىڭ بولاشاعىنا تاعى دا كۇدىكپەن قاراعان ادامدارعا سەسى بولۋى مۇمكىن. نەمەسە وسى گازەتتىڭ جابىلۋىنا سەپ بولعان دوكەيلەرگە كورسەتكەن قىرى بولۋى دا عاجاپ ەمەس. ءتىپتى ماقتانىشپەن جاريالاۋى دا ىقتيمال. نە دە بولسا سودان كەيىن كارتينانىڭ عانا ەمەس, سۋرەتشىنىڭ دە اتاعى دۇركىرەپ شىقتى. قوعامدى اجۋالاعان سۋرەت ءالى دە قۇنىن جوعالتقان جوق.
نەگىزىندە, دەدرە سول ۋاقىتتاعى گراف شارل دە ءمونتريدىڭ ءيتىن بەينەلەگەن ەدى. يت يەسىنە تارتادى. ونىڭ جاعىمسىز مىنەز-قۇلقى اينالاسىنا سۇيكىمسىز ەتىپ كورسەتەتىن. ونىڭ ۇستىنە گراف اناۋ-مىناۋ ەمەس, سول كەزدەگى فرانتسيا رەسپۋبليكاسىنىڭ پرەزيدەنتى ءىىى ناپولەوننىڭ اعاسى-تۇعىن. ول از دەسەڭىز, جۋرناليست ۆيلمەسسانتتىڭ ەڭ جاقىن دوسى. دەمەك ءجۋرناليستىڭ شالقىپ-تاسىپ ءومىر سۇرۋىنە ءمونتريدىڭ موپسى كۋالىك بولىپ تۇر. گازەتتىڭ قايتىپ تىرىلۋىنە گرافتىڭ سۇيىكتى ءيتىنىڭ كومەگى تيگەن. ارينە, بۇل ءبىز سەكىلدى وقىرماننىڭ بولجامى عانا.
ءبىر قىزىعى, دەدرە تەك ءمونتريدىڭ ەرەكشەلىكتەرىن عانا ەمەس, ءبىرشاما كاريكاتۋرا سىزىپ, ءارتۇرلى وبرازدا بەينەلەگەن. جالپى, موپستىڭ ءتۇرى ۆيلمەسسانتقا وتە قاتتى ۇقسايدى. مۇنى زەرتتەۋشىلەر كورىپ, تاڭداي قاققان ەكەن. ەگەر ءسىز ونىڭ بۇجىر كەلبەتى, قىسقا شاشى, قالىڭ ءارى ءسال سالبىراعان ەرنى مەن قىسقا موينىنا مىقتاپ بەكىگەن ۇلكەن دوڭگەلەك باسىن كورسەڭىز, موپسقا تەڭەرىڭىز انىق. زامانداستارىنىڭ ءبىرىنىڭ ايتۋىنشا, دە ۆيللەمەسسانت رەسپۋبليكادا تانىلعان قالامگەردەن گورى, كونترابانداشى نەمەسە براكونەرگە كوبىرەك ۇقسايدى.
قايتكەنمەن شەبەردىڭ وسى شىعارماسى پاتشا اۋلەتىن كۇلكىگە قالدىرعانى داۋسىز. ءيتتىڭ ءوزىن قاراپايىم حالىقتان بيىك قويعان اقىماق گرافتىڭ سۇرىقسىز قىلىعى كوپشىلىكتىڭ كوڭىلىنە تيەتىن. ال ونى ماقتانىشپەن جاريالاعان جۋرناليست ءوزىنىڭ دوسىن ىڭعايسىز جاعدايعا قالدىرعانىن سەزدى مە ەكەن. حالىق قالجىڭعا جىققانىمەن, ىشىندە ۇلكەن شىندىقتىڭ بۇعىپ جاتقانىن استارلادى. كارتينا ءوز دەگەنىنە جەتتى. ال اۆتور ءوزىنىڭ يۋمورلىق شىعارمالارىمەن تاريحتا قالدى.