پرەزيدەنت قاسىم-جومارت توقاەۆتىڭ جارلىعىمەن ەكىنشى دۇنيەجۇزىلىك سوعىستا كورسەتكەن ەرلىگى, باتىلدىعى, جانقيارلىعى مەن سوعىستان كەيىن مەملەكەتتىك جانە قوعامدىق قىزمەتكە بەلسەندى قاتىسقانى ءۇشىن سەمەيلىك ارداگەر ابدىعالي قايمولدينگە «حالىق قاھارمانى» اتاعى بەرىلدى.
مەملەكەتتىك ماڭىزى ايرىقشا ماراپاتتى اباي وبلىسىنىڭ اكىمى نۇرلان ۇرانحاەۆ قارت مايدانگەردىڭ ۇيىنە ارنايى بارىپ سالتاناتتى تۇردە تابىس ەتتى. «حالىق قاھارمانى» اتاعى مەن ايرىقشا ەرەكشەلىك بەلگىسى – «التىن جۇلدىز» بەن «وتان» وردەنى دە زور قۇرمەتپەن تابىستالدى. سونىمەن قاتار ارداقتى ارداگەرگە مەملەكەتتىك قولداۋ رەتىندە 1,5 ميلليون تەڭگەنىڭ سەرتيفيكاتى مەن تەلەديدار تارتۋ ەتىلدى. ودان بولەك قارت مايدانگەرگە پرەزيدەنتتىڭ اتىنان اسكەري وركەستر قۇرمەت كورسەتىپ, «جەڭىس كۇنى» ءانىن شىرقادى.
ابدىعالي قايمولدين 1921 جىلى 30 ماۋسىمدا بۇرىنعى سەمەي وبلىسى, ابىرالى اۋدانى ۇزىنبۇلاق اۋىلىندا دۇنيەگە كەلگەن. مەكتەپ بىتىرگەن 1941 جىلى ابىرالى اۋداندىق اسكەري كوميتەتىنە اسكەر قاتارىنا شاقىرىلىپ, وتان قورعاۋعا اتتانادى. الايدا جيىرماداعى جالىنداپ تۇرعان جاس اسكەري جاتتىعۋ الاڭىنا ەمەس, ناعىز مايداننىڭ ورتاسىنا تۇسكەن ەدى. وتتى جىلدار جايىندا قارت مايدانگەردىڭ ءوزى: «سەمەي قالاسىندا گەنەرال-مايور كيرزيموۆتىڭ باسشىلىعىمەن 105-ديۆيزيا قۇرىلدى. ديۆيزيا قۇرامىندا بىرىڭعاي سەمەيلىك بالالار بولدىق. الدىمەن ءبىزدى وسكەمەنگە, ودان ءارى جامبىلعا, سودان كەيىن گوركي وبلىسىنىڭ گوروحوۆەتسكي لاگەرىنە جىبەردى. لاگەردە ارنايى جاتتىعۋدان ءوتىپ, ءارى قاراي بىردەن مايدانعا اتتاندىق», دەپ ەسكە الادى.
ول نەبارى 17 جاسىندا مايدانعا اتتانىپ, ەكىنشى دۇنيەجۇزىلىك سوعىستى تۇگەل وتكەرگەن. ارداگەر اۋىر شايقاستارعا قاتىسىپ, ءتورت رەت جارالانعان. حاركوۆتى ازات ەتۋدە, ستالينگراد تۇبىندەگى شايقاستاردا ەرەن ەرلىك كورسەتكەن.
1941-1945 جىلدىڭ 9 مامىرى ارالىعىندا ستالينگراد, ءى ۋكراينا, ءى بەلارۋس, ءىىى بالتىق مايداندارىنداعى شايقاستارعا قاتىسقان. 1946 جىلدىڭ ماۋسىم ايىندا مايداننان ورالعان سوڭ, پارتيادا جانە مەملەكەتتىك ورگانداردا باسشىلىق قىزمەتتە بولعان. اتاپ ايتساق, كوكپ سەمەي وبلىستىق كوميتەتىندە, سودان كەيىن جاڭاسەمەي, نوۆوپوكروۆكا اۋداندارىنىڭ اتقارۋ كوميتەتىندە باسشىلىق قىزمەت اتقارعان.
1977-1982 جىلدارى «تۇركسىب» كەڭشارى پارتيا كوميتەتىنىڭ حاتشىسى قىزمەتىن ابىرويمەن اتقارىپ, قۇرمەتتى دەمالىسقا شىقتى.
«قىزىل جۇلدىز» جانە ءى دارەجەلى «وتان سوعىسى» وردەندەرىمەن, «جاۋىنگەرلىك ەڭبەگى ءۇشىن», «كەنيگسبەرگتى العانى ءۇشىن», «گەرمانيانى جەڭگەنى ءۇشىن» مەدالدارىمەن ماراپاتتالعان.
عاسىردان استام عۇمىر كەشكەن سوعىس ارداگەرى ابدىعالي قايمولدين 102 جاستا. اماندىق بولسا, ماۋسىم ايىندا 103 جاسقا تولاتىن قارت مايدانگەر التى بالا تاربيەلەپ وسىرگەن. بالالارىنان 10 نەمەرە, 12 شوبەرە ءسۇيىپ وتىر.