سىرتقى ىستەر ءمينيسترى ەرلان ىدىرىسوۆ ەۋروپالىق وداقتىڭ قازاقستانداعى وكىلدىگىنىڭ باسشىسى اۋرەليا بۋشەزبەن, گەرمانيانىڭ قازاقستانداعى ەلشىسى گيدو حەرتسپەن جانە نيدەرلاند كورولدىگىنىڭ قازاقستانداعى ەلشىسىنىڭ ورىنباسارى حارري پۋتكەرمەن كەزدەسۋلەر وتكىزدى.
كەزدەسۋلەر بارىسىندا ءۇستىمىزدەگى جىلعى 30 ماۋسىم – 1 شىلدە ارالىعىندا بريۋسسەلدە وتكەن قازاقستان رەسپۋبليكاسى مەن ەۋروپالىق وداق اراسىنداعى كەڭەيتىلگەن ارىپتەستىك پەن ىنتىماقتاستىق تۋرالى جاڭا كەلىسىم جوباسى جونىندەگى كەلىسسوزدەردىڭ جەتىنشى راۋندىنىڭ قورىتىندىلارى تالقىلاندى. مينيستر كەلىسسوز جۇرگىزۋشى توپتاردىڭ اراسىنداعى ءوزارا تۇسىنىستىكتىڭ ارقاسىندا وتكەن راۋند ەڭ ناتيجەلى بولعانىن قاناعاتپەن اتاپ ءوتتى – ءىس جۇزىندە قۇجاتتىڭ بارلىق ەرەجەلەرى كەلىسىلدى. بۇل كەلىسسوز ۇدەرىسىن 2014 جىلعى كۇزگە قاراي اياقتاۋعا مۇمكىندىك بەرەدى.
مينيستر ەو ەلدەرىمەن ۆيزالىق رەجىمدى جەڭىلدەتۋ ماسەلەسىنىڭ ەلىمىز ءۇشىن ەرەكشە ماڭىزدى بولىپ تابىلاتىنىنا ەرەكشە نازار اۋداردى. 2014 جىلعى 15 ماۋسىمدا قازاقستان بىرجاقتى تۇردە ەلىمىزدىڭ ەكونوميكاسىنىڭ ەڭ ۇلكەن ينۆەستورلارى بولىپ تابىلاتىن ون ەلدىڭ ازاماتتارىنا ءبىر جىلدىق مەرزىمگە ۆيزاسىز رەجىم ەنگىزگەنى ءمالىم.
كەزدەسۋلەردە ۇستىمىزدەگى جىلى گفر-مەن رەادميسسيا تۋرالى كەلىسىمنىڭ راتيفيكاتسياسىن اياقتاۋ, بەنيليۋكس ەلدەرىمەن ديپلوماتيالىق پاسپورت يەلەرىن ۆيزالىق تالاپتاردان بوساتۋ تۋرالى كەلىسىم جانە رەادميسسيا تۋرالى كەلىسىمگە قول قويۋعا دايىندىق ماسەلەلەرى تۋرالى اڭگىمە قوزعالدى, دەپ حابارلادى قر ءسىم-ءىنىڭ ءباسپاسوز قىزمەتى.