كەشەگى وتكەن پانەلدىك وتىرىستار اسسامبلەيانىڭ تىڭنان تۇلەۋگە, جاڭاشا جۇمىس ىستەۋگە ۇمتىلىسىن كەلىستى كورسەتىپ بەردى. تولعاعى جەتكەن ماسەلەلەردى اشىق ايتىپ, قيىن تۇيىندەردى شيەلەنبەي تۇرىپ تارقاتۋ عانا تىعىرىققا تىرەلۋدەن ساقتاي الادى.
عالىمدار ەتنوستىق قاتىناستاردا الدان شىعىپ تۇراتىن مىنانداي ماسەلەلەرگە نازار اۋدارادى: ەتنوستىق جانە اۋماقتىق شەكارالاردىڭ ۇيلەسپەۋى, ەكونوميكالىق احۋالدىڭ ناشارلاۋى, الەۋمەتتىك قايشىلىقتار, مەملەكەت ساياساتى دەڭگەيىنە كوتەرىلگەن كسەنوفوبيا مەن ۇلتتىق استامشىلىق, ۇلتتىق جانە ءدىني الاۋىزدىق, تاريح تەرەڭىنەن تامىر تارتاتىن وكپە-رەنىش. وسىلاردىڭ ىشىندە ءبىزدىڭ ەلىمىزگە ناقتى قاتىستى بولا الاتىنى – ەكونوميكالىق احۋالدىڭ ناشارلاۋى مەن الەۋمەتتىك قايشىلىقتار. مۇنىڭ ەكەۋىنىڭ ءوزى دە جالپى جۇرتتىڭ جۇيكەسىن جۇقارتۋعا جەتىپ جاتىر.
وندايدا ادام كىنالىلەردى ىزدەۋگە, تابۋعا تىرىسۋعا بەيىم تۇرادى. سوندىقتان دا بىرلىك, دوستىق, تاتۋلىق, جاراستىق, كەلىسىم قاي كەزدە دە كەرەك, ال قازىرگىدەي ءدۇن-دۇنيە دۇرلىگىپ, ەلىمىز جان-جاقتان قاۋمالاعان قىسپاقتار قۇرساۋىندا تۇرعاندا, سىرتقى فاكتورلار ىشكى احۋالعا اسەر ەتپەي قويمايتىن شاقتا ولار ءتىپتى كەرەك, اۋاداي كەرەك.
تىنىشتىق, تاتۋلىق ساقتالسا, ءبارى دە بولادى. بۇگىن بولماسا, ەرتەڭ بولادى. تىنىشتىق, تاتۋلىق ساقتالماسا, ونىڭ ءبارى دە بولمايدى. بۇگىن تۇرماق, ەرتەڭ دە بولمايدى. وسىنى ۇمىتپايىقشى. ەلدىكتىڭ بۇل ۇلى مىندەتىندە اسسامبلەيا اتقارار ميسسيا اسا اۋقىمدى.
ساۋىتبەك ابدراحمانوۆ,
قوعام قايراتكەرى, مەملەكەتتىك سىيلىقتىڭ لاۋرەاتى