كەشە پرەزيدەنت جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى ۇلتتىق كوميسسيانىڭ وتىرىسىندا ەلىمىزدەگى ايەلدەر جۇمىسسىزدىعىن تومەندەتۋ جونىندەگى شارالار تۋرالى ماسەلە قارالدى.
ۇلتتىق كوميسسيانىڭ وتىرىسىنا ساراپشىلار قوعامداستىعىنىڭ وكىلدەرى, وڭىرلەر اكىمدەرىنىڭ ورىنباسارلارى, ورتالىق مەملەكەتتىك ورگانداردىڭ باسشىلارى قاتىستى.
وتىرىستى اشقان ۇلتتىق كوميسسيا توراعاسى, قازاقستان پرەزيدەنتى اكىمشىلىگى باسشىسىنىڭ ورىنباسارى ايدا بالاەۆا: «ايەلدەر جۇمىسسىزدىعى – پروبلەماسى قوعامنىڭ الەۋمەتتىك دامۋىنىڭ ەڭ سەزىمتال كورسەتكىشى. ماسەلەنى شەشۋ پروفيلاكتيكالىق شارالار كەشەنىن قالىپتاستىرۋدىڭ جاڭا تاسىلدەرىن ىزدەۋدى, سونداي-اق جۇمىسپەن قامتۋعا باعىتتالعان ۋاكىلەتتى ورگانداردىڭ ءىس-ارەكەتتەرىندەگى پروبلەمالاردى انىقتاۋدى جانە شەشۋدى تالاپ ەتەدى», دەپ اتاپ ءوتتى.
ۇلتتىق كوميسسيانىڭ ساراپتامالىق توبى بۇل ماسەلەنى ەگجەي-تەگجەيلى زەردەلەپ, ايەلدەر اراسىنداعى جۇمىسسىزدىقتى ەڭسەرۋ بويىنشا ناقتى الدىن الۋ شارالارىن قابىلداۋ ءۇشىن ەڭ الدىمەن سالالار مەن وڭىرلەر بولىنىسىندە گەندەرلىك الشاقتىق (ايەلدەر اتقاراتىن جۇمىس ورىندارىنىڭ ۇلەسى) بويىنشا تالداۋ قاجەت دەگەن قورىتىندىعا كەلدى.
جوو مەن تجكب تۇلەكتەرىن جۇمىسقا ورنالاستىرۋ بويىنشا دەرەكتەر, گەندەرلىك اسپەكت پەن وڭىرلەر بولىنىسىندە NEET ساناتىنداعى جاستار بويىنشا كورسەتكىشتەر ايەلدەر جۇمىسسىزدىعىنا قارسى كۇرەس سالاسىندا تاۋەكەلدەردىڭ الدىن الۋ بويىنشا ۋاقتىلى جانە ناقتى الدىن الۋ شارالارىن قابىلداۋعا ىقپال ەتەدى.
ايەلدەردى جۇمىسپەن قامتۋدىڭ اعىمداعى جاعدايى تۋرالى ەڭبەك جانە حالىقتى الەۋمەتتىك قورعاۋ ءمينيسترى ت.دۇيسەنوۆا ءسوز سويلەدى. مينيستر «حالىقتى جۇمىسپەن قامتۋ تۋرالى» زاڭعا سايكەس مەملەكەت كەمسىتۋشىلىكتىڭ كەز كەلگەن تۇرىنەن قورعاۋعا جانە كاسىپ پەن جۇمىس الۋ مۇمكىندىكتەرىنىڭ تەڭدىگىنە, جۇمىسپەن قامتۋ جانە ەڭبەك جاعدايلارىن تاڭداۋعا نەگىزدەلگەن حالىقتى جۇمىسپەن قامتۋعا جاردەمدەسۋ شارالارىن قامتاماسىز ەتەدى», – دەپ اتاپ ءوتتى.
قازىرگى ۋاقىتتا حالىقتى جۇمىسپەن قامتۋ «2021-2025 جىلدارعا ارنالعان كاسىپكەرلىكتى دامىتۋ جونىندەگى ۇلتتىق جوباسى» شەڭبەرىندە ىسكە اسىرىلادى.
مەملەكەت قابىلدايتىن شارالاردىڭ كەڭ اۋقىمىنا قاراماستان, ەلىمىزدە ايەلدەر جۇمىسسىزدىعىنىڭ دەڭگەيى جوعارى بولىپ وتىر. ماسەلەن, 2022 جىلدىڭ 4 توقسانىنىڭ قورىتىندىسى بويىنشا 5,5%-دى (ەلىمىز بويىنشا – 4,8%) قۇرادى. ايەلدەر جۇمىسسىزدىعىنىڭ ەڭ جوعارى دەڭگەيى ماڭعىستاۋ وبلىسىندا – 7,0%, اباي وبلىسىندا – 6,8%, تۇركىستان وبلىسىندا – 6,7%, جەتىسۋ وبلىسىندا 6,5% بايقالادى.
ۇلتتىق كوميسسيا ساراپشىلارى ايەلدەردىڭ جۇمىسپەن قامتىلۋىن باعالاۋ ءۇشىن ديناميكاداعى كورسەتكىشتەردىڭ تىزبەسىن دايىندادى, ولار وڭىرلەر بولىنىسىندە ايەلدەر جۇمىسسىزدىعىنىڭ جالپى كورىنىسىن كورۋگە كومەكتەسەدى جانە ايەلدەردى جۇمىسپەن قامتۋ بويىنشا ناقتى شارالار قابىلداۋعا مۇمكىندىك بەرەدى.
ۇلتتىق كوميسسيا ايەلدەردىڭ تابىسى مەن جۇمىسسىزدىعى بويىنشا گەندەرلىك الشاقتىقتى زەردەلەپ, Astana hab-پەن بىرلەسىپ ايەلدەرگە فريلانسەرلىك پلاتفورمالاردا اقشا تابۋعا كومەكتەسەتىن باعدارلامانى ىسكە قوسۋدى ۇسىنادى. بۇل باستاما ايەلدەرگە يكەمدى تابىس كوزىن قامتاماسىز ەتۋگە جانە ولاردىڭ قارجىلىق تاۋەلسىزدىگىن ىلگەرىلەتۋگە مۇمكىندىك بەرەدى.
باعدارلامانى ۇلتتىق كوميسسيا مۇشەسى, Astana Hub حالىقارالىق تەحنوپاركىنىڭ باسقارۋشى ديرەكتورى ا.ءابدىراحمانوۆا تانىستىردى.
وتىرىس قورىتىندىسى بويىنشا ۇلتتىق كوميسسيا توراعاسى ا.بالاەۆا مەملەكەتتىك ورگاندارعا بىرقاتار تاپسىرما بەردى.