وتاندىق ونەرپازدار تەمىرلان ولجاباي مەن ەرنات ناۋرىز يتاليادا وتكەن بەدەلدى «Italy 2023» مۋزىكالىق بايقاۋىنىڭ گران-پري جۇلدەسىن جەڭىپ الدى.
دۇنيە ءجۇزىن كەزەكتى رەت مويىنداتقان دومبىراشىلار دۋەتىنىڭ مۇشەلەرى تەمىرلان مەن ەرنات روزا باعلانوۆا اتىنداعى «قازاقكونتسەرت» ۇيىمىنىڭ سوليستەرى ەكەنىن ەسكە سالا كەتەيىك.
– يتالياداعى بەدەلدى بايقاۋعا مادەنيەت جانە سپورت مينيسترلىگىنىڭ قولداۋىمەن باردىق. جىل سايىن پەسارو قالاسىندا وتەتىن ءىس-شاراعا بيىل 24 ەلدىڭ ونەرپازدارى قاتىستى. الەم كوز تىككەن بايقاۋدا ۇزدىك اتانعانىمىزعا قۋانىشتىمىز, – دەيدى تەمىرلان ولجاباي.
دومبىراشىلار دۋەتى «اداي», «كوروعلى», «القيسسا» كۇيلەرىن, و.سۇلەيمەنوۆتىڭ «West» شىعارماسىن ورىنداپ, قازىلار القاسى مەن كورەرمەندەردى باۋراپ العان.
– تەمىرلان مەن ەرناتتى جارقىن جەڭىسىمەن قۇتتىقتايمىن. جىگىتتەردىڭ قازاق مۋزىكاسىن ورىنداي وتىرىپ, حالىقارالىق دەڭگەيدە جەتىستىككە جەتكەنى قۋانتادى. ولاردىڭ ونەرى باسقا تالانتتى وتانداستارىمىزدى شابىتتاندىراتىنىنا سەنىمدىمىن, – دەيدى مادەنيەت جانە سپورت ءمينيسترى اسحات ورالوۆ.
ايتپاقشى, دومبىراشىلار دۋەتى وسى جىلدىڭ 18 ماۋسىمىندا استانادا العاشقى شىعارماشىلىق كەشىن وتكىزەدى. وعان كەش قوناقتارى رەتىندە Amre, قازىبەك قۇرايىش سەكىلدى ونەر جۇلدىزدارى دا قاتىسادى دەپ كۇتىلىپ وتىر.