ۇرپاقتى ەلدىككە, وتانشىلدىققا تاربيەلەۋدە, جۇرتشىلىققا تاريحي-تانىمدىق, اعارتۋشىلىق قىزمەت كورسەتۋدە مۋزەيدىڭ قىزمەتى ەرەكشە ەكەنى بەلگىلى. وسىعان وراي بايزاق اۋداندىق پروباتسيا قىزمەتىنىڭ ەسەبىندە تۇرعان قوعامنان وقشاۋلاۋعا بايلانىستى ەمەس جازا ءتۇرى تاعايىندالعان ازاماتتاردىڭ رۋحاني بايلىعىن ارتتىرىپ, مادەني كوزقاراسىن قالىپتاستىرۋ ماقساتىندا اۋداندىق تاريحي-ولكەتانۋ مۋزەيىندە ءىس-شارا ۇيىمداستىرىلدى.
حالىقارالىق ەسكەرتكىشتەردى قورعاۋ كۇنىنە وراي ۇيىمداستىرىلعان ءىس-شاراعا اۋداندىق پروباتسيا قىزمەتىنىڭ ەسەبىندە تۇرعان قوعامنان وقشاۋلاۋعا بايلانىستى ەمەس جازا ءتۇرى بويىنشا سوتتالعاندار قاتىستى.
ءىس-شارا بارىسىندا تاريحى عاسىرلاردان سىر شەرتەتىن, اۋداننىڭ كەشەگىسى مەن بۇگىنىن ايشىقتايتىن «ارحەولوگيا», «داڭق», «اۋدان تاريحى», «ەتنوگرافيا», «مادەنيەت جانە سپورت» زالدارى تانىستىرىلدى. سونىمەن قاتار اۋدان ورتالىعى سارىكەمەر اۋىلىنىڭ باستى كوشەسىندەگى «باتىرلار اللەياسىندا» اۋداننان شىققان 27 سوتسياليستىك ەڭبەك ەرىنىڭ جانە كەڭەس وداعىنىڭ باتىرى اعادىل سۋحامباەۆتىڭ, بەيبىت كۇندە ەرلىك جاساعان حالىق قاھارمانى عازيز بايتاسوۆتىڭ, وليمپيادا چەمپيونى, قازاقستاننىڭ ەڭبەك ەرى جاقسىلىق ۇشكەمپىروۆتىڭ ءومىر جولدارىنان اقپارات الدى.
پروباتسيالىق باقىلاۋ بەلگىلەنگەن ازاماتتار شارادان جاقسى اسەر الىپ, رۋحاني تۇرعىدان ءبىر بايىپ, قۇندى اقپاراتتارمەن تانىسقانىن ايتىپ, ۇيىمداستىرۋشىلارعا ريزاشىلىعىن جەتكىزدى.
ايناگۇل مامىتبەكوۆا,
بايزاق اۋداندىق تاريحي-ولكەتانۋ
مۋزەيىنىڭ عىلىمي قىزمەتكەرى
جامبىل وبلىسى