العا اۋداندىق ءبىلىم ءبولىمىنىڭ باسشىسى قىزمەتتىك وكىلەتتىلىگىن اسىرا پايدالانعانى ءۇشىن ءىستى بولدى. ول جەكە كاسىپ اشقانى ءۇشىن 3 جىل 6 اي مەرزىمگە سوتتالدى, دەپ حابارلايدى Egemen.kz.
قىلمىستىق ءىس العا اۋداندىق سوتىندا قارالدى.
ءىس ماتەريالدارى بويىنشا, اۋداندىق ءبىلىم ءبولىمىنىڭ باسشىسى وقۋ ورتالىعىن اشقان. بيزنەستى جۇرگىزۋ ءۇشىن وزىنە تانىس كاسىپكەردىڭ اتىن پايدالانعان. بالالارعا قوسىمشا ءبىلىم بەرۋ قىزمەتىن كورسەتۋ ءۇشىن كونكۋرسقا ءتۇسىپ, 1,2 ملن تەڭگە كولەمىندە گرانت ۇتىپ العان.
وعان قوسا, جەتىم, اتا-اناسىنىڭ قامقورلىعىنسىز قالعان, تۇمىس دەڭگەيى تومەن, كوپبالالى وتباسىلاردان شىققان بالالاردى, مۇگەدەكتىگى بار 300 بالانى 12 كۇندىك لاگەرگە جىبەرۋدى جوسپارلاعان. جولداما ساتىپ الۋعا 18850000 تەڭگە بولىنگەن. ناتيجەسىندە كونكۋرس شارتتارى وزگەرتىلىپ, بالالار لاگەرگە 12 كۇنگە ەمەس, 7 كۇنگە جىبەرىلگەن. ايتا كەتەرلىگى, لاگەرگە اتتانعان 203 بالانىڭ 160-ى ارنايى ساناتقا جاتپايتىنى انىقتالدى.
«سوتتالۋشىنىڭ زاڭسىز ارەكەتتەرىنىڭ ناتيجەسىندە ءبىلىم ءبولىمى سەرىكتەستىك شوتىنا 10280674 تەڭگە سوماسىندا بيۋدجەت قاراجاتىن نەگىزسىز اۋداردى. قىلمىستىق ءىس اقتوبە وبلىسى پروكۋرورىنىڭ ورىنباسارى مەن سوتتالۋشى اراسىندا جاسالعان كىنانى مويىنداۋ تۋرالى پروتسەستىك كەلىسىممەن سوتقا كەلىپ ءتۇستى. سوتتالۋشى سوت وتىرىسىندا ءوز كىناسىن مويىنداپ, بەلگىلەنگەن جازامەن كەلىسەتىنىن ايتتى. پروكۋرور سوتتالۋشىنى جازانى وتەۋدىڭ بۇكىل مەرزىمى ىشىندە جىل سايىن 100 ساعاتتان ءماجبۇرلى ەڭبەككە تارتا وتىرىپ, 3 جىل 6 اي مەرزىمگە باس بوستاندىعىنان ايىرۋ تۇرىندەگى جازا تاعايىنداۋدى سۇرادى.
سوت تاراپىنان اقتوبە وبلىستىق ءبىلىم باسقارماسىنىڭ باسشىلىعىنا جەكە قاۋلى شىعارىلدى. سوت ۇكىمى زاڭدى كۇشىنە ەنگەن جوق», دەلىنگەن وبلىستىق سوتتىڭ ءباسپاسوز قىزمەتى تاراتقان حابارلامادا.