جەتىسۋدا بىلتىر 16 ءبىلىم بەرۋ نىسانىنىڭ قۇرىلىسى جۇرگىزىلگەن. ونىڭ ىشىندە 2 050 ورىندىق 6 ءبىلىم وشاعى ىسكە قوسىلدى. سونداي-اق 58 مەكتەپ جاڭعىرتىلىپ, 7-ەۋى كۇردەلى جوندەۋدەن ءوتتى. قازىر وبلىس ورتالىعىندا جاڭا مەكتەپتەر اشىلىپ جاتىر. بۇگىندە ءبىلىم سالاسىنىڭ ماماندارى ءوڭىر بويىنشا بالالاردى 1-سىنىپقا قابىلداۋدى باستادى.
بالالاردى 1-سىنىپقا تىركەۋ 1 ساۋىردەن 1 تامىزعا دەيىن جالعاسادى. ءوتىنىمدى egov.kz پورتالى ارقىلى ونلاين بەرۋگە بولادى. اتا-انالاردىڭ ءوتىنىشى بويىنشا قۇجاتتاردى ءداستۇرلى قاعاز تۇرىندە دە وتكىزۋگە بولادى.
ءساۋىر ايىنىڭ العاشقى اپتاسىندا جەتىسۋ وبلىسى بويىنشا 1-سىنىپقا قابىلداۋ تۋرالى 352 ءوتىنىش كەلىپ تۇسكەن. ونىڭ 278-ءى وبلىس ورتالىعى تالدىقورعان قالاسىنىڭ تۇرعىندارىنان كەلگەن. وبلىستىق ءبىلىم باسقارماسى ورتا ءبىلىم بەرۋدى دامىتۋ, قورعانشىلىق جانە قامقورشىلىق, تاربيە جۇمىسى ءبولىمىنىڭ باسشىسى روزا تۇرعانباەۆانىڭ ايتۋىنشا, بيىل وقۋشى سانى بىلتىرعىدان كوپ بولماق.
– جەتىسۋ وبلىسى بويىنشا قۇجاتتاردى قابىلداۋ e-zhetysu.kz ەلەكتروندى قىزمەت كورسەتۋ پورتالى ارقىلى جۇزەگە اسىرىلادى. اتا-انالارعا قۇجاتتاردى ەلەكتروندى قىزمەت كورسەتۋ پورتالى ارقىلى وتكىزۋ ءۇشىن وبلىستىڭ بارلىق ءبىلىم بەرۋ مەكەمەسىندە ينتەرنەت جەلىسىنە قوسىلعان وزىنە-ءوزى قىزمەت كورسەتۋ ورنى ۇيىمداستىرىلعان. بۇل جەردە ەلەكتروندى تسيفرلىق قولتاڭبا الۋعا, قۇجاتتاردى پورتالعا ەنگىزۋگە ءبىلىم بەرۋ مەكەمەلەرى تاراپىنان پراكتيكالىق كومەك كورسەتىلەدى, – دەيدى ر.تۇرعانباەۆا.
ءبولىم باسشىسىنىڭ ايتۋىنشا, بوس ورىن بولعان جاعدايدا بالانىڭ اتا-اناسى نەمەسە وزگە دە زاڭدى وكىلدەرى وقىتۋ ءۇشىن كەز كەلگەن ءبىلىم بەرۋ ۇيىمدارىن تاڭداۋعا قۇقىعى بار. قالالىق جەرلەردە مەكتەپكە ەڭ الدىمەن تۇرعىلىقتى مەكەن-جايى بويىنشا قابىلدانادى. ەگەر بوس ورىن بولعان جاعدايدا اتا-انا ءبىلىم بەرۋ مەكەمەسىن تاڭداي الادى.
بالا جالپى ءبىلىم بەرەتىن مەكتەپتەردە قابىلداۋ ءۇشىن ەمتيحان نەمەسە تەستىلەۋ وتكىزىلمەيدى, ال گيمنازيا مەن ليتسەيلەرگە قابىلداۋ كونكۋرستىق نەگىزدە جۇزەگە اسىرىلادى. «جالپى ءبىلىم بەرەتىن مەكتەپكە قابىلداۋ ءۇشىن 4 قۇجات جيناۋ قاجەت. بۇلار – ءوتىنىش, تۋ تۋرالى كۋالىكتىڭ كوشىرمەسى, بالانىڭ دەنساۋلىعى تۋرالى قۇجاتتار جانە 3ح4 ولشەمدى ەكى فوتوسۋرەت», دەپ ناقتىلادى ر.تۇرعانباەۆا.
ايتا كەتەيىك, جەتىسۋ وبلىسى بويىنشا 339 جالپى ءبىلىم بەرەتىن مەكتەپتە 2022-2023 وقۋ جىلىندا 128 758 وقۋشى ءبىلىم الىپ جاتىر. ونىڭ ىشىندە, وتكەن وقۋ جىلىندا 1-سىنىپقا 13 758 بالا قابىلدانعان. جاڭا 2023-2024 وقۋ جىلىندا 1-سىنىپقا 14 مىڭعا جۋىق بالانى قابىلداۋ جوسپارلانىپ وتىر.
سونىمەن قاتار بيىل بەيىمدەلگەن مەكتەپتەردىڭ ورنىنا 420 ورىندى ءۇش مەكتەپتىڭ جانە «جايلى مەكتەپ» ۇلتتىق جوباسى اياسىندا 1 800 ورىندى ەكى مەكتەپتىڭ قۇرىلىسى باستالادى. اتاپ ايتساق, اتالعان نىساندار الاكول اۋدانىنا قاراستى دوستىق اۋىلىندا جانە جاركەنت قالاسىندا سالىنادى.
جەتىسۋ وبلىسى