الماتى قالاسىنىڭ اينالاسىندا ازىق-ت ۇلىك بەلدەۋىن قۇرۋ جونىندەگى ەلباسىنىڭ تاپسىرماسىن ورىنداۋ ماقساتىندا وتكەن اپتادا جامبىل وبلىسىنىڭ اكىمدىگى وڭتۇستىك استانادا جارمەڭكە ۇيىمداستىردى.
– جارمەڭكەدە الماتى قالاسىنىڭ تۇرعىندارىنا شامامەن 226 توننا اۋىل شارۋاشىلىعى تاۋارى ساتىلدى, – دەيدى جامبىل وبلىستىق اۋىل شارۋاشىلىعى باسقارماسىنىڭ باستىعى ابدالى نۇراليەۆ. – اتاپ ايتقاندا 35 ملن. تەڭگەگە 34 توننا ەت, 4 ملن. تەڭگەگە 15 توننا ءسۇت ونىمدەرى, 3 ملن. تەڭگەگە 3 توننا شۇجىق ونىمدەرى, 22 ملن. تەڭگەگە 250 توننادان استام كوكونىس-باقشا ونىمدەرى ساۋدالاندى. ودان بولەك, وبلىستا وندىرىلەتىن باسقا دا اۋىل شارۋاشىلىعى تاۋارلارى – ارا بالى, قىمىز, شۇبات, ماكارون ونىمدەرى, وسىمدىك مايى, كەپتىرىلگەن جەمىس-جيدەكتەر بار. جالپى, جارمەڭكەگە ۇسىنىلعان تاۋاردىڭ قۇنى 68,7 ملن. تەڭگەنى قۇرادى.
ارينە, بۇل جارمەڭكەنىڭ باستى ەرەكشەلىگى – تاۋار باعالارىنىڭ تومەن, ارزان بولعاندىعى ەدى. جامبىل وبلىسىنىڭ اكىمى كارىم كوكىرەكباەۆتىڭ ايتۋىنا قاراعاندا, جارمەڭكەدە 10 اۋداننىڭ كاسىپكەرلەرى ءوز تاۋارلارىن ارزان باعامەن, ءتىپتى, ءوز قۇنىنان 30-40 پايىزعا دەيىن تومەن ساۋدالاعان. جامبىلدىق اعايىنداردىڭ بۇل جومارتتىعى مەن دارقان پەيىلىنە الماتىلىقتار دا ءدان ريزا بولدى. جارمەڭكەنى ارالاپ كورگەن الماتى قالاسىنىڭ اكىمى احمەتجان ەسىموۆ «مۇنداي جارمەڭكەلەر قالانىڭ ساۋدا ورىندارىندا باسەكەلەستىك تۋدىرىپ, باعانى تۇراقتاندىرۋعا ىقپال ەتەدى. جامبىلدىقتارعا قالا تۇرعىندارىنىڭ جانە ءوز اتىمنان العىس ايتقىم كەلەدى», دەپ ريزاشىلىعىن ءبىلدىردى.
بۇل كۇنى بۇعان دەيىن ساۋدا نۇكتەلەرىندە 80-100 تەڭگەدەن ساتىلعان كارتوپ 70 تەڭگەگە, قۇنى 160 تەڭگەگە دەيىن كوتەرىلگەن ءسابىز باعاسى 70 تەڭگەدەن ساۋدالاندى. ەت ونىمدەرى دە ەداۋىر ارزان.
الماتىنىڭ بازارلارىندا 1500 تەڭگەدەن ساتىلىپ جاتقان جىلقى ەتىنىڭ باعاسى بۇل كۇنى 1200 تەڭگەگە دەيىن تومەندەدى. قانتتىڭ كيلوسى 140, سارى مايدىڭ كيلوسى 1000, قايماق 700 تەڭگەگە تۇراقتادى. وسىدان بولار جارمەڭكەگە جينالعان حالىقتىڭ قاراسى قالىڭ بولدى. «استانا» الاڭىنا جامبىلدىق كاسىپكەرلەر تىككەن 52 ساۋدا نۇكتەسىندە كۇنى بويى ساۋدا قىز-قىز قايناپ جاتتى.
ورالحان ءداۋىت,
«ەگەمەن قازاقستان».
سۋرەتتەردى تۇسىرگەن
اقادىل رىسماحان.