1995 جىلى تاجىك-اۋعان شەكاراسىندا ينتەرناتسيونالدى مىندەت ارقالاپ, شەكاراك ۇزەتىندە تۇرعان ىشكى اسكەردىڭ 17 جاۋىنگەرى جاۋمەن ايقاستا مەرت بولدى. اتالعان جاۋىنگەرلەردى ەسكە الۋ ماقساتىندا جىل سايىن 7 ءساۋىر كۇنى ەرلىك كۇنى اتاپ وتىلەدى. بيىل دا «قازبات» جاۋىنگەرلەرىنىڭ قۇرمەتىنە اشىلعان ەرلىك اللەياسىنداعى «ەر ەسىمى – ەل ەسىندە» ەسكەرتكىشىنە گۇل شوقتارىن قويۋ ءراسىمى ءوتتى, دەپ حابارلايدى Egemen.kz.
اتالعان شاراعا ءىىم باسشىلىعى, ۇلتتىق ۇلان قولباسشىلىعى, جەرگىلىكتى اتقارۋشى بيلىك ورگاندارىنىڭ, قوعام وكىلدەرى, اسكەر جانە لوكالدى قاقتىعىستاردىڭ ارداگەرلەرى قاتىستى.
قازاقستان رەسپۋبليكاسى ىشكى ىستەر ءمينيسترىنىڭ ورىنباسارى – ۇلتتىق ۇلان باس قولباسشىسى گەنەرال-مايور ەركىن بوتاقانوۆ ەرلەردىڭ رۋحىنا تاعزىم ەتىپ, ەسكەرتكىشكە گۇل شوعىن قويدى.
جيىن ەرلىكپەن قازا تاپقان جاۋىنگەرلەردى ءبىر مينۋت ۇنسىزدىكپەن ەسكە الۋدان باستالدى.
ۇلتتىق ۇلان باس قولباسشىسى گەنەرال-مايور ەركىن بوتاقانوۆ ەرجۇرەك ۇلاندار جايلى ءسوز سويلەدى.
«مەملەكەت باسشىسى ەسىل ەرلەردىڭ ەرلىگىن لايىقتى باعالادى. ونىڭ جارلىعىمەن ەرلىك تانىتقانى ءۇشىن قازا بولعان 5 ادام ءىى دارەجەلى «ايبىن» وردەنىمەن, 12 ادام «جاۋىنگەرلىك ەرلىگى ءۇشىن» مەدالىمەن ناگرادتالدى. ەلىمىزدىڭ قالالارىندا ەسكەرتكىشتەر قويىلىپ, كوشە اتاۋلارى بەرىلدى. قازاقستان رەسپۋبليكاسى ىشكى ىستەر مينيسترلىگى مەن ۇلتتىق ۇلان باس قولباسشىسىنىڭ قولداۋىمەن وسى شىنايى وقيعانىڭ جەلىسىمەن تۇسىرىلگەن «قازبات» ءفيلمى جارىققا شىقتى. وسى وقيعا تاريحتا دا قالسىن, وسكەلەڭ ۇرپاق باتىرلارىمىزدىڭ ەرلىگىن ۇمىتپاسىن دەگەن نيەتپەن تاسپالانعان كينوكارتينا – جاۋىنگەرلەرگە ۇلتتىق ۇلان تاراپىنان كورسەتىلگەن قۇرمەت بولدى. ەر ەسىمى – ەل ەسىندە. جاۋىنگەرلەردىڭ ەرلىگى ەشقاشان ۇمىتىلمايدى! ولار ءبىزدىڭ ماڭگىلىك جادىمىزدا!», دەدى ۇلتتىق ۇلان باس قولباسشىسى گەنەرال-مايور ەركىن بوتاقانوۆ.سونداي-اق شارا بارىسىندا قۇقىقتىق ءتارتىپ اسكەرىنىڭ ارداگەرى, 7 ءساۋىر كۇنگى وقيعانىڭ كۋاگەرى زاپاستاعى پودپولكوۆنيك نۇرجان بايبوسىنوۆ ءسوز سويلەپ ءوز ەستەلىكتەرىمەن ءبولىستى.
سونىمەن قاتار, شەكارا اسكەرلەرى ارداگەرلەرىنىڭ ۇيىمى «زاستاۆا تارلاندارى» رەسپۋبليكالىق قوعامدىق بىرلەستىگىنىڭ توراعاسى گەنەرال-مايور تۇرسىن ءۋاجانوۆ تا جينالعانداردىڭ الدىندا ءسوز سويلەپ, قازاقستاندىق جاۋىنگەرلەردىڭ ەرلىگى تۋرالى ايتىپ ءوتتى.
بۇگىندە ەرلىك اللەياسى مەن «ەر ەسىمى – ەل ەسىندە» ەسكەرتكىشى حالىقتىڭ ەرجۇرەك ۇلدارعا دەگەن ماڭگىلىك تاعزىمىنداي بولىپ تۇر. جىل سايىن بۇل جەردە ۇلتتىق ۇلاننىڭ ەلوردالىق جاس ساربازدارى ءوز حالقىنا ادال بولۋعا سەرت بەرىپ, اسكەري انت قابىلدايدى.
شارا بارىسىندا «ەر ەسىمى – ەل ەسىندە» ەسكەرتكىشىنە گۇل شوقتارى قويىلىپ, ۇلتتىق ۇلان مەن شەكارا قىزمەتى استانالىق گارنيزوندارىنىڭ جەكە قۇرامى سالتاناتتى شەرۋمەن ءجۇرىپ ءوتتى. ودان كەيىن قاتىسۋشىلار قازاقستان رەسپۋبليكاسى قارۋلى كۇشتەرىنىڭ پاتريوتتىق ورتالىعىنا بارىپ, 7 روتا جاۋىنگەرلەرىنىڭ رۋحىنا باعىشتالىپ ارنايى دايىندالعان دەرەكتى ءفيلمدى تاماشالادى.
ايتا كەتسەك, ءدال وسى كۇنى ەلىمىزدىڭ وزگە وڭىرلەرىندەگى ۇلتتىق ۇلاننىڭ بارلىق اسكەري بولىمدەرىندە دە تاعزىم جاساۋ شارالارى ءوتتى.