وسىدان ءۇش جىل بۇرىن جاھاندىق ىندەتكە بايلانىستى ۋاقىتشا جابىلعان «قورعاس» شەكارا ماڭى ىنتىماقتاستىعى حالىقارالىق ورتالىعى» ارنايى ەكونوميكالىق ايماعىنا (شىحو اەا) كۇردەلى جوندەۋ جۇمىستارى جۇرگىزىلگەن ەدى. بۇگىندە حالىقارالىق ورتالىق تۋريستەردى قابىلداۋعا دايىن.
كوپكە ايان, «قورعاس» شەكارا ماڭى ىنتىماقتاستىعى حالىقارالىق ورتالىعى – «نۇرلى جول» جاڭا ەكونوميكالىق ساياساتى مەن «جىبەك جولى» ەكونوميكالىق بەلدەۋى ستراتەگياسى اياسىنداعى الەمدە تەڭدەسى جوق قازاقستان مەن قىتايدىڭ بىرلەسكەن جوباسى. سوندىقتان ونىڭ ۇلت ءۇشىن ماڭىزى زور. كارانتين كەزىندە عيماراتتىڭ وتكەل بولىگىنە كەڭ كولەمدى جوندەۋ جۇمىسى جۇرگىزىلگەن بولاتىن. وسى ورايدا «قورعاس» شىحو» اەا بك (باسقارۋشى كومپانياسى)» اق ينۆەستيتسيالار جانە ماركەتينگ دەپارتامەنتىنىڭ ديرەكتورى اسەت بايعاراەۆتىڭ باستاۋىمەن تۋريستەر قابىلدايتىن ورتالىقتا اتقارىلىپ جاتقان جۇمىس بارىسىمەن تانىسىپ قايتتىق.
دەپارتامەنت ديرەكتورىنىڭ ايتۋىنشا, ەكى بولىمنەن تۇراتىن وتكىزۋ زالىندا تۋريستەردى جايلىلىقپەن قامتاماسىز ەتۋگە ارنالعان تەرمينال قايتا جابدىقتالىپ, ەدەن تولىعىمەن جاڭارتىلعان.
تەمىر قورشاۋلار شىنى بولىمگە اۋىستىرىلىپ, ءاربىر پاسپورتتىق باقىلاۋ كابيناسىنا تەپلوۆيزورلار قويىلىپتى. تۋريستەردىڭ كەدەرگىسىز ءوتۋى ءۇشىن «بلوك-ا» زالىنا كىرەر الدىندا تۋرنيكەتتەر ورناتىلعان. كەدەننەن اقىلى ءوتۋدى قالايتىن تۋريستەر ءۇشىن بيزنەس-تەرمينال (VIP تەرمينال) جاسالعان. زالدى كونديتسيونەرلەۋ جۇيەسى جاڭارتىلىپ, تۋريستەر مەن ولاردىڭ جۇكتەرىنىڭ قاۋىپسىزدىگىن قامتاماسىز ەتۋ ماقساتىندا اۋماق جارىقتاندىرىلىپ, بەينەكامەرالار ورناتىلعان.
ورتالىق قايتادان اشىلعاننان كەيىن «قورعاس» شىحو-عا قازاقستاننىڭ تۇكپىر-تۇكپىرىنەن, تمد جانە باسقا ەلدەردەن تۋريستەر كوپتەپ اعىلاتىنى اقيقات. سوندىقتان ورتالىق قىزمەتى بارلىق باعىتقا جەتىلدىرىلىپ تسيفرلاندىرىلىپ, كەلۋشىلەردى قابىلداۋ ساپاسىنىڭ دەڭگەيىن ارتتىرۋعا ارەكەتتەنۋدە. شىحو اۋماعىندا اۆتوكولىك كەپتەلىسىن بولدىرماۋ ماقساتىندا اۆتوماتتاندىرىلعان تۇراق جۇيەسىن ازىرلەۋدى, جولاۋشىلار زالىندا انا مەن بالا ءۇشىن بولەك بولمە, بانك بولىمشەلەرى, ءدارىحانا, پوست-تەرمينال, بانكومات, دۇكەن, كوفەحانا جانە ناماز وقيتىن ورىندار قاراستىرىلعان. سونداي-اق اربات, ساۋدا ورتالىقتارى, قوناقۇي كەشەنى, فۋد-كورت, ءتۇرلى ۇلتتىق تاعامدار مەيرامحاناسى سياقتى تۋريستەردىڭ ۋاقىتتى جايلى جانە قىزىقتى وتكىزۋىنە قولايلى جاعدايلار جاسالعان.
– وتاندىق كاسىپكەرلەردى قولداۋ ماقساتىندا قىتاي تاراپىمەن بىرلەسكەن ەتنوفەستيۆال, قازاقستان تاۋار وندىرۋشىلەرىنىڭ جارمەڭكەسىن جانە حالىقارالىق قولونەر شەبەرلەرىنىڭ كورمەسىن وتكىزۋ جوسپارلانۋدا. قازىر حالىقارالىق ورتالىقتى دامىتۋعا باعىتتالعان كوپتەگەن جوسپار مەن يدەيا جۇزەگە اسۋدا. وتكەل زالدارىندا كەزەكتىڭ الدىن الۋ ءۇشىن كەلۋشىلەرگە بيلەتتەردى ونلاين ساتىپ الۋدىڭ جەڭىلدەتىلگەن جۇيەسى ازىرلەنبەكشى. بيلەتتىڭ قۇنى ءبىر ادامعا شامامەن 3000 تەڭگەنى قۇرايدى. ورتالىق اشىلعاننان كەيىن كۇنىنە شامامەن 3 مىڭ ادام قابىلداۋعا مۇمكىندىك قاراستىرىلعان. باسقارۋشى كومپانيا 2023-2025 جىلدارعا ارنالعان دامۋ ستراتەگياسىن ازىرلەدى, – دەيدى ورتالىقتاعى ينۆەستيتسيالار جانە ماركەتينگ دەپارتامەنتىنىڭ ديرەكتورى اسەت بايعاراەۆ.
وسى ستراتەگيا شەڭبەرىندە دامۋ تۇجىرىمداماسى ساۋدا-تۋريستىك كلاستەردى دامىتۋعا باعىتتالادى. سونداي-اق ساۋدا ورتالىقتارى, قوناقۇي, ويىن-ساۋىق كەشەنى, كورمە ورتالىعى جانە سول سياقتى باسقا دا ينۆەستيتسيالىق جوبالار كوزدەلگەن «قورعاس» شىحو» اەا باس جوسپارى ناقتىلانادى. ينۆەستيتسيالىق تارتىمدىلىقتى ارتتىرۋ ماقساتىندا وسى جوبالاردى ىسكە اسىرۋ ءۇشىن ينۆەستورلار تارتۋدى جوسپارلاپ وتىر.
اشىقتىق قاعيداتىن ۇستانادى جانە كەلىپ تۇسكەن بارلىق جوبانى بارىنشا وبەكتيۆتىلىكپەن قاراستىرادى. ەل اۋماعىندا تۇراتىن ءار ازامات بيىلعى 1 ساۋىردەن باستاپ ورتالىقتان ايىنا ءبىر رەت قۇنى 500 ەۋرودان اسپايتىن 25 كەلى تاۋاردى باج سالىعىنسىز اكەتە الادى. ال كورسەتىلگەن مولشەردەن اسقان ءار كەلى تاۋار ءۇشىن 4 ەۋرو كولەمىندە سالىق تولەۋگە مىندەتتى. قىسقاسى, ورتالىق ساياحاتشىلاردى قابىلداۋعا ساقاداي ساي.
جەتىسۋ وبلىسى