ايتىپ كەلەتىن اپاتتىڭ ءبىرى – كوكتەمگى سۋ تاسقىنى. قىس بويى جاۋعان قار ءبىر ەرىپ, ءبىر قاتىپ, بۋعا اينالىپ ۇشىپ كەتتى. قىزىل سۋدىڭ جىلداعىداي مول بولماۋى بالكىم تابيعاتتىڭ وسى ءبىر قۇبىلىسىنان شىعار. ايتسە دە, ەرىگەن سۋدىڭ ازابى ەلدى ەسەڭگىرەتكەن وقيعالار دا ورىن الىپ وتىرعاندىعىن ايتۋ پارىز.
اتباسار اۋدانىنداعى ەسەنگەلدى, نوۆومارينوۆكا, سەپە جانە سوچينسكوە اۋىلدارىنىڭ تۇرعىندارى قانشاما جىلدان بەرى جول ازابىن تارتىپ كەلەدى. كوكتەمگى ەرىگەن سۋ ونسىز دا توزىعى جەتكەن جولدى شايىپ كەتىپ, ءتورت اۋىلدىڭ تۇرعىندارى قىزىل سۋدىڭ تۇتقىنىنا اينالعان. الدەنەشە كۇننەن بەرى ازىق-ت ۇلىكتەرى تاۋسىلىپ, ەم-دومعا قاجەتتى ءدارى-دارمەككە زار بولىپ وتىر. امالى تاۋسىلعاندار باستارىن بايگەگە تىگىپ, سەڭى كوشىپ جاتقان قاشقار وزەنىنەن قايىقپەن وتۋدە.
جولدىڭ جاعدايىن ايتىپ بولمايدى. بۇرىنعىنىڭ تىلىمەن ايتقاندا, «ات ءولىپ, اربا سىناتىن» جاعداي. كوكتەمدە عانا ەمەس, قاقاعان قىستا دا كورگەن كۇندەرى وسى. جالعىز جولدى اۋپىرىمدەپ تازالاعاندارىمەن, سىرعىما بوران جۇرسە بولدى, جىم-جىلاس ەتىپ جاۋىپ تاستايدى. جول ازابىن شەگىپ وتىرعان ءتورت اۋىلدىڭ اپتالاپ قاتىناسسىز قالۋى ءجيى كەزدەسەدى. وسى تىعىرىقتان شىعاراتىن كوپىر سالىنۋدا. ايتسە دە اتباسار-سوچينسكوە تاس جولىنىڭ 19-ىنشى شاقىرىمىنداعى كوپىر قۇرىلىسى باستالعالى ەكى جىل وتسە دە, قاشان اياقتالارى بەلگىسىز. ءدال قازىر اينالما جولدى كوكتەمگى قار سۋىنا مەلتەكتەپ, كۇشىنە مىنگەن قاشقار وزەنى شايىپ كەتكەلى كولىك قوزعالىسىنا شەكتەۋ قويىلعان. جاۋاپتى ورگانداردىڭ مالىمدەۋىنە قاراعاندا, سۋ دەڭگەيى تۇسكەننەن كەيىن قيىرشىق تاس توسەلمەك. قازىر بەس قۇتقارۋشى جول بويىنداعى حالىقتى وزەننەن ءارى-بەرى وتكىزىپ ءجۇر.
احۋال ابدەن الاڭداتارلىق. اياقاستىنان ورىن العان جاي بولسا ءبىر ءسارى, سىڭىردەي سوزىلعان, ءسۇر بولىپ قاتقان ماسەلەنىڭ الدەنەشە جىل بويى شەشىلمەي قويعانىنا ەلدىڭ وكپەسى قارا قازانداي.
اقمولا وبلىسى,
اتباسار اۋدانى