اقمولا وبلىسىنداعى بىرقاتار ەلدى مەكەنگە قىزىل سۋدىڭ قاۋپى ءتونىپ تۇر. شالعايداعى اۋىلدار تۇگىلى وبلىس ورتالىعىنىڭ شاعىن اۋداندارىنداعى جەر ۇيلەردىڭ جەرتولەسىنە ەرىگەن قار سۋى تولىپ, كولىك جولىن ءبۇلدىرىپ جاتىر.
زەرەندى اۋدانىنا قاراستى ۇيالى اۋىلىنىڭ بالالارى مەكتەپكە بارا الماي وتىر. شوق جۇلدىزداي شاعىن اۋىلدىڭ وقۋشىلارى ىرگەدەگى اقادىر اۋىلىنا قاتىناپ وقيتىن. قازىر ەكى ەلدى مەكەننىڭ اراسىندا قاتىناس جوق. جالعىز جولدى ەرىگەن قار سۋى شايىپ كەتتى. اقادىردىڭ شىعا بەرىسىندەگى جول ب ۇلىنگەن. اۋىل تۇرعىندارىنىڭ ايتۋىنا قاراعاندا, قىر باسىنداعى قاسات قار كۇرت ەرىپ, لىقسىعان قىزىل سۋ كەشە قاس قارايا ءتىپتى مولايعان. نەگىزىنەن بۇل جەردە جولدىڭ استىنا سالىنعان سۋ وتكىزگىش قۇبىر بار. الدە ۋاقتىلى تازالانبادى ما ەكەن, بالكىم ەرىگەن قار سۋىمەن ەرە كەلگەن قوقىس بىتەدى مە, قۇبىردان سۋ وتپەي قالىپتى. بەس جۇزدەن استام تۇرعىنى بار اۋىل قازىر ەشقايدا قاتىناي الماي قاڭتارىلىپ وتىر. ءبىر ايتا كەتەرلىگى, بۇگىنگىدەي كۇردەلى جاي جىلدا قايتالانادى. كوكتەمگى قار سۋى جولدىڭ تۇتە-تۇتەسىن شىعارعان. قازىر مي باتپاق. كولىك تۇگىلى ادام جۇرە المايدى.
– ءبىزدىڭ اۋىل تۇرعىندارىنىڭ باسىم كوپشىلىگى كوكشەتاۋ قالاسىندا جۇمىس ىستەيدى. قازىر جول جابىلعاندىقتان جۇمىستارىنا بارا الماي وتىر. بيىل قىستا قار قالىڭ ءتۇستى. اۋىلدىڭ ازاماتتارى شامالارى كەلگەنشە ارشىعان بولدى. بىراق كۇش كەم, قۋاتتى تەحنيكا جوق, – دەيدى اۋىل تۇرعىنى ۇمبەت قايبار ۇلى.
اۋىل تۇرعىندارىنىڭ ايتۋىنا قاراعاندا, جەرگىلىكتى اكىمشىلىكتەن كومەك بولماعان. قىس بويى بوراندى كۇندەرى جول جابىلىپ, بەينەتكە باتىپتى. كوكتەمگى سۋ تاسقىنىنا بايلانىستى دايىندىق جۇمىستارى شالا جۇرگىزىلگەن ۇيالى, اقادىر, پرەۆومايسكوە اۋىلدارىنىڭ جولىن سۋ شايىپ كەتكەن.
– جولدىڭ كەيبىر تۇستارىن قىزىل سۋ تەرەڭدىگى ءبىر جارىم مەترگە دەيىن ور قىلىپ شايىپ كەتتى, – دەيدى اۋداندىق تۇرعىن ءۇي-كوممۋنالدىق شارۋاشىلىعى, جولاۋشىلار كولىگى جانە اۆتوموبيل جولدارى ءبولىمى باسشىسىنىڭ مىندەتىن اتقارۋشى دانيار اقتانوۆ, – وتكەن تۇندە اۋىلدىق وكرۋگ اكىمدىگى جولدى جارتىلاي قالپىنا كەلتىردى, بۇگىندە التى كاماز-بەن قۇم تاسىمالداۋدا.
وبلىس ورتالىعىندا دا قىزىل سۋدىڭ قاۋپى وراسان. بەيبىتشىلىك شاعىن اۋدانىنداعى جەكەمەنشىك ۇيلەردى سۋ باسىپ جاتىر. بىلتىر عانا پايدالانۋعا بەرىلگەن جول قىرىق شۇڭقىر بولىپ ءب ۇلىندى. ەڭ باستى سەبەبى, جول جيەگىنە سۋاعارلار سالىنباعان. ىرگەدەگى توبەدەن لىقسىپ اققان سۋ سۋاعار بولماعاندىقتان, جەر ۇيلەردىڭ اۋلالارى مەن جەرتولەلەرىن سۋعا تولتىرۋدا. شاعىن اۋدان تۇرعىندارى سۋ سوراتىن تەحنيكا جالداپ, ءوز كۇشتەرىمەن قىزىل سۋدىڭ بەتىن قايتارۋعا تىرىسىپ جاتىر.
– مەن قاراعايلى كوشەسىندە تۇرامىن. قازىر ءۇيىمىزدى سۋ باسىپ جاتىر, – دەيدى قالا تۇرعىنى نۇربەك ەسەنوۆ, – تابيعي سۋ جولى بىتەلىپ, سۋاعارلار ورناتىلماعاندىقتان, ءدال وسىنداي جاعداي ورىن الىپ وتىر.
بۇل شاعىن اۋدانداعى كوشەلەردە بىلتىر كارىز جۇيەسىن ورناتپاق بولىپ جولدى قوپارىپتى. بىراق جۇمىس اياقتالماعان. قازعان جەر اشىق كۇيىندە قالعان. وردان شىعارىلعان توپىراق سازعا اينالىپ, اياق اتتار جەر قالدىرماعان.
– قالالىق اكىمشىلىكتىڭ تابالدىرىعىن توزدىرعالى جەتى جىلدىڭ ءجۇزى بولدى, – دەيدى قالا تۇرعىنى الەكساندر ۆىسوچين, – 2020-2025 جىلى ءبىزدىڭ كوشەلەرگە اۋىز سۋ جەلىسى مەن كاناليزاتسيا وتكىزگەن بولاتىن. نەگىزىندە بۇل جۇمىستى اكىمدىك اتقارۋعا ءتيىس. بىراق ءاربىر وتباسى 220 مىڭ تەڭگەدەن قاراجات تولەدىك. جۇمىس دۇرىس جۇرگىزىلگەن جوق. قازىر مەكتەپ وقۋشىلارىنا, ەگدە ادامدارعا وتە قيىن بولىپ تۇر.
كوكتەمنەن حابار جەتكەلى قالا اكىمدىگىنىڭ تاس-ءتۇيىن دايىنبىز دەگەن اقپاراتى تالاي جاريا ەتىلگەن. قاتەلىكتىڭ قاي جەردەن كەتكەنىن كىم ءبىلسىن؟
اقمولا وبلىسى