كەشە ورتالىق كوممۋنيكاتسيالار قىزمەتىندە ۇكىمەتتىڭ ءداستۇرلى وتىرىسىنىڭ قورىتىندىلارىنا ارنالعان بريفينگ ءوتتى. وندا ءۇش ۆەدومستۆو باسشىسى ۇكىمەتتە قارالعان ماسەلەلەر تۋرالى اڭگىمەلەدى.
مينيسترلەردى باستاپ كەلگەن ەكونوميكا جانە بيۋدجەتتىك جوسپارلاۋ ءمينيسترى ەربولات دوساەۆ الەۋمەتتىك-ەكونوميكالىق ساياساتتىڭ 2014 جىلعا ارنالعان جول كارتاسىنىڭ 38 iس-شاراسى ورىندالعانىن ايتتى. «مەملەكەت باسشىسىنىڭ تاپسىرماسى بويىنشا ەلدىڭ ورنىقتى دامۋىن قامتاماسىز ەتۋ ءۇشىن اعىمداعى جىلعى ساۋىردە ۇكىمەت الەۋمەتتىك-ەكونوميكالىق ساياساتتىڭ 2014 جىلعا ارنالعان بiرiنشi كەزەكتەگi شارالارىنىڭ جول كارتاسىن قابىلدادى. جول كارتاسى 10 باعىت بويىنشا 67 ءىس-شارادان تۇرادى. بۇگىنگى كۇنى 38 ءىس-شارا ورىندالدى. 29 ءىس-شارا ورىندالۋدا. بەسەۋى اعىمداعى جىلعى ەكىنشى جارتىجىلدىققا جوسپارلانعان. تاعى 5 ءىس-شارانىڭ ورىندالۋ مەرزىمى توقسان سايىن جانە جارتىجىلدىق كەزەڭگە بەلگىلەنگەن. جول كارتاسىنىڭ شەڭبەرىندە جوسپارلانعان 4 جوبا پرەزيدەنت اكىمشىلىگىنە ەنگىزىلدى. 7 جوبا بويىنشا 4 زاڭ قابىلداندى. ءۇش زاڭ جوباسى بيىلعى جىلدىڭ ەكىنشى جارتىجىلدىعىندا ازىرلەنەدى دەپ جوسپارلانعان. ۇكىمەت قاۋلىلارىنىڭ 8 جوباسى دايىندالىپ, ولار قابىلداندى», دەدى ە.دوساەۆ.
ۆەدومستۆو باسشىسى جول كارتاسىن ورىنداۋ اياسىندا ماكروەكونوميكالىق تۇراقتىلىقتى قامتاماسىز ەتۋگە باعىتتالعان iس-شارالاردىڭ ناتيجەسi تۋرالى دا ايتتى. «ۇلتتىق ۆاليۋتا باعامى تۇزەتىلگەننەن كەيىن ينفلياتسيالىق پروتسەستەردى جوسپارلانعان دالىزدە ۇستاپ تۇرۋ ءۇشىن شارالار قابىلداندى. بەس ايدىڭ قورىتىندىسى بويىنشا اعىمداعى ينفلياتسيا كورسەتكىشى 4,5 پايىزدى قۇرادى.
«ازىق-ت ۇلىك تاۋارلارىنىڭ تاپشىلىعىنا جول بەرمەۋ ءۇشىن جەرگىلىكتى اتقارۋشى ورگاندارعا ازىق-ت ۇلىك تاۋارلارىنىڭ وڭىرلىك تۇراقتاندىرۋ قورلارىن قۇرۋ جانە پايدالانۋ كەزىندە بارىنشا دەربەستىك بەرىلدi. ال ەندى ەكونوميكالىق وسۋگە ىنتالاندىرۋ جانە ەكونوميكانىڭ ناقتى سەكتورىن قولداۋعا قاتىستى جۇمىستارعا توقتالساق, مەملەكەت باسشىسىنىڭ ۇلتتىق قوردان بولىنگەن 1 تريلليون تەڭگە ەسەبىنەن ەكونوميكانىڭ ءوسۋىن قوسىمشا ىنتالاندىرۋ جونىندەگى تاپسىرماسىن ىسكە اسىرۋ قامتاماسىز ەتىلۋدە. ناقتى مالىمەت كەلتىرەر بولساق, وسى جىلى ەكونوميكالىق ءوسۋدى قامتاماسىز ەتۋگە 500 ملرد. تەڭگە, ونىڭ ىشىندە شاعىن جانە ورتا بيزنەستى نەسيەلەۋگە جانە قولداۋعا 100 ملرد. تەڭگە, بانك سەكتورىن ساۋىقتىرۋعا 250 ملرد. تەڭگە جانە يندۋستريالىق-يننوۆاتسيالىق دامۋ جوبالارىن ىسكە اسىرۋعا 150 ملرد. تەڭگە جۇمسالدى. وندا ينجەنەرلىك ينفراقۇرىلىمدى دامىتۋ, يندۋستريالىق جوبالاردى, ەكسپو-2017 كورمەسiنە قاتىستى جوبالاردى iشiنارا قارجىلاندىرۋ قاراستىرىلعان», دەپ قايىردى ە.دوساەۆ.
ونىڭ ايتۋىنشا, ۇلتتىق قوردان بولىنەتىن قاراجاتتى ءتيىمدى پايدالانۋ ءۇشىن ۇكىمەت بىرقاتار حالىقارالىق قارجى ۇيىمدارىمەن ينستيتۋتتىق جانە قارجىلاي دەمەۋ بويىنشا كەلىسىمدەرگە قول قويعان. ولاردىڭ اراسىندا دۇنيەجۇزىلىك بانك, ازيا دامۋ جانە قايتا قۇرۋ بانكى, ەۋروپا قايتا قۇرۋ جانە دامۋ بانكى مەن يسلام دامۋ بانكى بار. «وسى حالىقارالىق بانكتەر ەكونوميكانىڭ نەگىزگى سالاسىنداعى ينۆەستيتسيالىق جوبالار مەن باسىم باعدارلامالاردى بىرلەسە قارجىلاندىرۋدى قامتاماسىز ەتەدى. بۇلار 2014-2016 جىلدار ارالىعىندا جۇزەگە اساتىن بولادى. بىرلەسە قارجىلاندىرۋدىڭ جالپى مولشەرى 7,5 ملرد. دوللارعا دەيىن», دەدى مينيستر. بۇعان قوسا, مينيستر جول كارتاسى اياسىندا جۇيە قۇرۋشى كاسىپورىنداردىڭ ۇزدىكسىز جۇمىس ىستەۋىن قامتاماسىز ەتۋ ماقساتىندا ءوندىرۋ جاعدايى اۋىر جانە رەنتابەلدىلىگى تومەن كەن ورىندارى ءۇشىن ۇكىمەت العاشقى رەت پايدالى قازبالار وندىرىسىنە سالىناتىن سالىقتىڭ تومەندەتىلگەن مولشەرلەمەسىن بەلگىلەگەنىن اتاپ ءوتتى. سونىمەن قاتار, ەكسپورتتاۋشىلاردى قولداۋ ءۇشىن تەمىرجول كولىگىمەن تاسىمالداۋعا ارنالعان تاريفتەرگە ۋاقىتشا تومەندەتۋ كوەففيتسيەنتتەرىن بەرۋ تەتىگى ەنگىزىلگەنىن تىلگە تيەك ەتتى.
ءباسپاسوز ءماسليحاتىندا ەلىمىز بيىلعى جىلدىڭ سوڭىنا دەيىن 10 مىڭ تونناعا جۋىق ءىرى قارا مال ەتىن ەكسپورتقا جونەلتىلەتىندىگى دە ايتىلدى. «ءىرى قارا مال ەتىنىڭ ەكپورتتىق الەۋەتىن ارتتىرۋ جوباسى 2012 جىلدان بەرى جۇزەگە اسىرىلۋدا. جوبا بارلىق وبلىستاردا بىردەي جۇرگىزىلىپ جاتىر دەپ ايتا المايمىز. مىسالى, باتىس قازاقستان, اقمولا وبلىستارىندا بۇل كورسەتكىش بارلىق انالىق ءىرى قارا مالعا شاققاندا 35 پايىزدان ارتىق. ال كەيبىر وبلىستاردا بۇل كورسەتكىش تومەن. اۋداندار اراسىندا دا وسىنداي رەيتينگ جاسالدى», دەدى ول جونىندە اۋىل شارۋاشىلىعى ءمينيسترى اسىلجان مامىتبەكوۆ.
ۆەدومستۆو باسشىسى قازاقستاندا اگروونەركاسىپتىك كەشەندى دامىتۋ مەملەكەتتىك باعدارلاماسى اياسىندا نەسيەلىك جۇكتەمەنى تومەندەتۋ تۋرالى اگروونەركاسىپتىك سەكتور سۋبەكتىلەرىنەن 217 ءوتىنىش كەلگەنى تۋرالى دا اڭگىمەلەدى. «باعدارلاما اگروونەركاسىپتىك كەشەن سۋبەكتىلەرىن قارجىلىق ساۋىقتىرۋ بويىنشا ءتيىستى تەتىكتەردى قاراستىرادى. بۇل تۇرعىدا بۇرىنعى كرەديتورلىق قارىزداردى تومەندەتۋ مەن مەرزىمىن ۇزارتۋ ەسكەرىلگەن. بۇگىندە 167 ملرد. تەڭگە كولەمىندە اگروونەركاسىپتىك كەشەن سۋبەكتىلەرىنىڭ 217 ءوتىنىشى ماقۇلداندى», دەدى مينيستر. ونىڭ كەلتىرگەن تاعى ءبىر مالىمەتىنە قاراعاندا, بيىلعى جىلدىڭ سوڭىنا دەيىن بۇل باعىتتا 300 ملرد. تەڭگەنى يگەرۋ جوسپارلانىپ وتىر.
وڭىرلىك دامۋ مينيسترلىگى جىلۋ جەلىلەرىن جاڭعىرتۋ بويىنشا كەشەندى جوسپار ازىرلەۋگە كىرىسكەلى وتىر ەكەن. «بۇگىن ۇكىمەت وتىرىسىندا جىلۋمەن جابدىقتاۋ سەكتورىن جاڭعىرتۋ ماسەلەلەرى قارالدى. بۇگىنگى كۇنى بۇل سەكتوردا توزۋ دەڭگەيى جوعارى. ايتالىق, جەلىلەردىڭ 40 پايىزى تولىعىمەن توزعان. سونداي-اق, جىلۋ ەلەكتر ستانسالارى مەن ءىرى قازاندىقتاردى ەسەپكە الماعاندا, جىلۋمەن جابدىقتاۋ كوزدەرى بويىنشا دا جاعداي ناشار. مۇنىمەن قاتار, تۇتىنۋشىلارعا قاتىستى ماسەلەلەرگە توقتالساق, تۇرعىندار جىلۋ ەسەپتەگىش قۇرىلعىلاردى ورناتپايدى, عيماراتتاردا تەرموجاڭعىرتۋ جۇرگىزىلمەي كەلەدى. سوندىقتان, بۇگىن جىلۋ جەلىلەرىن جاڭعىرتۋ بويىنشا كەشەندى جوسپاردىڭ باعىت-باعدارى تالقىلاندى. بۇل كەشەندى جوسپاردى دايىنداۋعا ءبىز كىرىسۋىمىز كەرەك. جوسپارعا ساي, جىلۋ كوزدەرى تەحنيكالىق تەكسەرىستەن وتكىزىلەدى. ونىڭ ناتيجەسى بويىنشا جىلۋ جەلىلەرىنىڭ تەحنيكالىق جاعدايىنا باعا بەرىلەدى, ينۆەستيتسيالاۋدىڭ نەگىزدەمەسى ازىرلەنەدى, قالالار مەن اۋىلداردى جىلۋمەن جابدىقتاۋدىڭ سىزبانۇسقاسى مەن بىرىڭعاي تەحنيكالىق ساياسات دايىندالادى», دەدى بۇل جونىندە وڭىرلىك دامۋ ءمينيسترى بولات جامىشەۆ.
نۇرباي ەلمۇراتوۆ,
«ەگەمەن قازاقستان».