قازاقستان رەسپۋبليكاسىنىڭ مادەنيەت جانە سپورت مينيسترلىگى مەن «جولاۋشىلار تاسىمالى» اق, سونداي-اق «بۋراباي دامۋ» جشس مەن «Kazakh Tourism» ۇلتتىق كومپانياسىنىڭ ناۋرىز مەيرامىنا وراي بىرلەسىپ ازىرلەگەن جوباسى ىسكە قوسىلدى.
ول بويىنشا كۇن سايىن استانا – كۋرورت – بۋراباي مەرەكەلىك ەلەكتر پويىزى قاتىنايتىن بولادى. بۇل شارا ىشكى ءتۋريزمدى دامىتۋ ماقساتىندا جۇزەگە اسىرىلىپ وتىر.
ناۋرىز مەيرامىنا وراي ازىرلەنگەن ەتنيكالىق پويىز استانا – بۋراباي باعىتى بويىنشا ءساۋىر ايىنىڭ سوڭىنا دەيىن جۇرەدى. پويىز استانانىڭ «نۇرلى جول» ۆوكزالىنان تاڭعى ساعات 06.03 مينۋتتا جولعا شىعىپ, «استانا-1» ۆوكزالىنا بارىپ ايالدايدى, ءسويتىپ ساعات 06.57 مينۋتتا ءارى قاراي جولعا اتتانادى, دەپ حابارلايدى Rail-news.kz.
پويىز جول-جونەكەي ءۇش ستانساعا عانا توقتاپ وتەدى. ولار – اقكول, ەلتاي جانە ماكينكا. ۆاگوندار كونديتسيونەر جانە بيواجەتحانامەن جابدىقتالعان. بۇلارمەن بىرگە جولاۋشىلار مازمۇنى ويىن-ساۋىققا قۇرىلعان جانە پايدالى اقپاراتى بار vputi.kz مۋلتيمەديالىق پورتالىن پايدالانا الادى.