بالقاش اۋدانىنىڭ جانە الماتى وبلىسىنىڭ قۇرمەتتى ازاماتتارى بوياۋلىلىق بالتاعۇل مولداقاسىموۆ پەن بىرلىكتىك ءابدىجاپپار قىستاۋباەۆتىڭ جاساپ جاتقان تىرلىكتەرىنە جانىڭ سۇيسىنەدى. بالتاعۇل مولداقاسىموۆ تاراپ كەتكەن بوياۋلى اۋىلى تۇرعىندارىنىڭ باسىن قۇراپ, ولاردىڭ ەشقايدا كوشپەي, سول اۋىلدا ورنىعىپ قالۋلارىنا جان-جاقتى جاعداي جاسادى. ءاربىر ۇيگە ءوز قاراجاتى ەسەبىنەن ىستىق-سۋىق سۋ كىرگىزىپ بەرىپ, جۋىناتىن دۋش ورناتتى. ءبىر-ءبىر بولمە قوستىرتىپ, اجەتحانا جاساتتىرىپ بەردى. كوشەلەرىنىڭ بارلىعىن جارىقتاندىردى. مەشىتتى قايتادان كۇردەلى جوندەۋدەن وتكىزىپ, وسكەلەڭ تالاپقا ساي, ساۋلەتتى ەتىپ جاسادى. قازىر مەشىتتىڭ جانىندا مال شالاتىن ارنايى ورىن, قۇدايى تاماق بەرەتىن اسحانا بار. بوياۋلىلىقتار وندا ءجيى باس قوسادى.
باستاۋىش مەكتەپ عيماراتىن دا ءوز قاراجاتى ەسەبىنەن سالىپ بەردى. ال, ابەن قىستاۋباەۆ تاراپ كەتكەن «بىرلىك» سوۆحوزىن شاشاۋ شىعارماي, «بىرلىك» اگروفيرماسى ەتىپ قايتا ۇيىمداستىردى. اۋىل تۇرعىندارىنىڭ بارلىعىن جۇمىسپەن قامتىدى. ولار ەڭبەكاقىلارىن ۋاقىتىندا الىپ تۇرادى. اۋىل تازالىعىنا دا باسا ءمان بەرەدى. جاسىل جەلەككە جامىلعان بىرلىك اۋىلى ءبۇل كۇندە كۇننەن-كۇنگە كوركەيىپ, جاڭا تالاپتارعا ساي ساۋلەتتەنە تۇسۋدە. اۋىلدىڭ ءاربىر تۇرعىنىنىڭ قۋانىشى مەن قايعىسىن ءبولىسىپ, بەل ورتاسىندا جۇرەتىن ءابدىجاپپار قىستاۋباەۆتى اۋىلداستارى شىنايى قۇرمەتتەپ قانا قويماي, ونى ماقتان ەتەدى.
ەكەۋى دە اۋدان كولەمىندە ۇيىمداستىرىلاتىن كوپتەگەن مادەني, الەۋمەتتىك ءمانى بار شارالارعا بەلسەنە ارالاسادى. ولار عاسىر ساڭلاعى, اسا كورنەكتى مەملەكەت جانە قوعام قايراتكەرى د.ا.قوناەۆتىڭ ءجۇز جىلدىق تورقالى تويىن وتكىزۋگە دە بەلسەنە اتسالىسقان بولاتىن. العاشقىلاردىڭ ءبىرى بولىپ, دىنمۇحامەد احمەت ۇلىنىڭ تويىن وتكىزۋ ءۇشىن ارنايى قۇرىلعان قورعا ءبىر ميلليون تەڭگەدەن ءوز قولدارىمەن اكەلىپ قۇيعان-دى.
كابينەتىمدە وتىر ەدىم, بالاتەكەڭ اكەلىپ ءبىر ميلليون تەڭگەنى قورعا قوسقانىم, دەپ الدىما قويا سالعاندا ونداي مىرزالىقتى كۇتپەگەندىكتەن بە, ەسىم شىعىپ كەتتى, دەپ اڭگىمەلەيدى اۋداندىق اۋرۋحانانى 42 جىل باسقارعان تۇرلان ەسىمقۇلوۆ. ابەن دە ءبىر ميلليون تەڭگەنى قولما-قول قۇيدى. ونىڭ ۇستىنە, جەتپەي جاتىر دەگەنىمىزدە جىلقى دا بەردى. ۇساق-تۇيەك نارسەلەرگە كومەكتەسكەن كەزدەرىن ايتىپ تاۋىسا المايمىز, دەپ ءلاتىپ نۇرتاەۆ تا اعىنان جارىلدى. الماتى وبلىسىنىڭ قۇرمەتتى ازاماتى اتاعى بەرىلگەن كۇننىڭ ەرتەسىنە ولارعا ارناپ قور ەسەبىنەن داستارقان جايىپ, ۇستىلەرىنە شاپان جاپتى. داستارقان ۇستىندە قور مۇشەلەرى, بالقاش اۋدانىنىڭ قۇرمەتتى ازاماتتارى ا.ەسىموۆ, ج.جۇمادىلوۆ, ا.بەيسەنباەۆا, ب.ءادىلحانوۆا, وباعا قارسى كۇرەس مەكەمەسىنىڭ باستىعى ا.الىپباەۆ ەكى ازاماتقا ارناپ, كوكەيلەرىندە جۇرگەن جاقسى تىلەكتەرىن ايتىپ, قوشەمەت كورسەتتى.
مارات قاشقىنباەۆ.
الماتى وبلىسى,
بالقاش اۋدانى.