جۋىردا قازاقستان اۆتوكولىك فورۋمى شەڭبەرىندە كوتەرىلگەن قازاقستاندىق اۆتوكولىك سالاسىنداعى ماسەلەلەردىڭ ءبىر پاراسى وتاندىق كولىك ءوندىرىسىنىڭ دامۋى مەن جوبالارىنا ارنالدى. سونىمەن قاتار, كولىك قالدىعى يندۋسترياسىن دامىتۋعا 78 ملرد.تەڭگە قاجەتتىگى ايتىلدى.
قازاقستان اۆتوكولىك بيزنەسى اسسوتسياتسياسىنىڭ پرەزيدەنتى اندرەي لاۆرەنتەۆتىڭ پىكىرىنشە, ەلدەگى اۆتوكولىك سالاسىنىڭ ىشكى رىنوگىنا جۇرگىزىلگەن زەرتتەۋلەر ناتيجەسى بيىل 6 ملرد. دوللارعا 300 مىڭ سۋ جاڭا كولىك ساتىلۋى مۇمكىندىگىن كورسەتكەن. ونىڭ ىشىندە, وتاندىق ءونىمنىڭ ۇلەسى 40 پايىزدى قۇراماق. قابا باسشىسى ا.لاۆرەنتەۆ وتاندىق اۆتووندىرىستەگى مەملەكەتتىك قولداۋ مەن دامىتۋ ماسەلەسى باسىمدىققا يە بولىپ وتىرعاندىعىن جەتكىزدى. ەاەو شەڭبەرىندە دە اۆتوكولىك سالاسىندا اتقارىلار ءىس جەتكىلىكتى. اتاپ ايتقاندا, قاۋىپسىزدىك جانە ەكولوگيا ماسەلەسى, ءوندىرىس قالدىعىن كادەگە جاراتۋ اعىمداعى ماسەلەدەن گورى جۇگى اۋىرلاۋ ماسەلە بولىپ وتىر. سول سەبەپتى, اۆتوكولىك ۋتيليزاتسياسى يندۋسترياسىن قۇرۋ ماسەلەسى ءالى دە وزەكتىلىگىن جويماعان. وسى ماسەلەگە بايلانىستى ازىرلەنگەن تۇجىرىمداما قورشاعان ورتا جانە سۋ رەسۋرستارى مەن يندۋستريا جانە جاڭا تەحنولوگيالار مينيسترلىكتەرىنە ۇسىنىلعان. پرەكو كومپانياسىنىڭ ەسەپتەۋىنشە, بۇل سالانى قۇرۋ 78 ملرد.تەڭگەنى قاجەت ەتىپ, 5 جىلدى قامتۋى مۇمكىن. ياعني, ەلىمىزدەگى اۆتوكولىكتەردى جاڭارتۋ ءارى قورشاعان ورتانى قورعاۋ ماقساتىندا تەزىرەك قولعا الىنۋى قاجەتتى شارالاردىڭ ءبىرى وسى بولماق. «ەسكى-قۇسقى كولىك» دەگەندە, ەسكە ورالاتىنى جىلدا كوتەرىلەتىن تەحنيكالىق بايقاۋ ماسەلەسى ەكەنى انىق. ەلدە ءى توقسان بويىنشا 58 مىڭ دانا اۆتوكولىك تەحنيكالىق بايقاۋدان وتپەي قالعان. ونىڭ 52 مىڭى جەڭىل كولىك, 3 مىڭى جۇك, قالعان 2,5 مىڭى اۆتوبۋس ەكەن. كولىك جانە كوممۋنيكاتسيا مينيسترلىگى تاراتقان اقپاراتقا قاراعاندا, بۇل كولىكتەر العاشقى سىندا وتپەي قالعان. جالپى, 2014 جىلدىڭ 1 ناۋرىزىنا دەيىن ەلىمىزدە 3 ملن. 657,2 مىڭ جەڭىل كولىك ءتىركەلگەن. ال وتكەن جىلدىڭ ستاتيستيكالىق مالىمەتتەرىنە سۇيەنسەك, قازاقستاننىڭ 7 وڭىرىندەگى اۆتوپاركتىڭ 90 پايىزىنىڭ «جاسى» 7 جىلدان اسقان اۆتوكولىكتەر ەكەن. 2013 جىلى ەلگە كىرگىزىلگەن جەڭىل كولىكتەردىڭ سانى 202,5 مىڭعا ارتسا دا, ونىڭ 156,5 مىڭى ەسكى اۆتوكولىكتەر بولىپ شىققان. جالپى, قازاقستان بويىنشا اۆتوكولىكتەردىڭ 87 پايىزى ەسكى, زاۋىتتان شىققانىنا 7 جىلدان اسقان كولىكتەر. ال قولدانىستاعى سوڭعى شىققان اۆتوكولىكتەر سانى اتىراۋ وبلىسىندا باسىم. اتىراۋدان كەيىنگى ورىنداعى ماڭعىستاۋ وبلىسى مەن استانا قالاسىنداعى جەڭىل اۆتوكولىكتەر وزگە قالالارداعى كولىكتەرگە قاراعاندا الدەقايدا «جاس» ەكەن. ال «جاسى ۇلعايعان» اۆتوكولىكتەر شوعىرى جامبىل جانە الماتى وبلىستارىندا ءجيى كەزدەسەدى. بۇل وبلىستارداعى زاۋىتتان شىققانىنا 7 جىل وتكەن جەڭىل كولىكتەردىڭ سانى قارايلاس, 95 جانە 94 پايىزدى قۇرايدى.
ۆەنەرا تۇگەلباي,
«ەگەمەن قازاقستان».