انامەن الەم نۇرلى. ءبىز ىزگىلىككە بارار جولدى انا ارقىلى تابامىز. كوڭىلىمىزدى بۇلت تورلاسا, سەنىمىمىزگە سەلكەۋ تۇسسە, الدىمەن ايەل زاتى اراشا تۇسەدى. بۇل – ءتاڭىردىڭ مەيىرىمىندەي كوركەم قاسيەت. سوندىقتان انالارعا كورسەتكەن قوشەمەت – ەڭ ۇلى قوشەمەت. جەتىسۋدا بيىل ءار سالادا قىزمەت ەتەتىن 500 ايەلگە ەرەكشە قۇرمەت كورسەتىلدى. ءبىرى – «التىن القا», «كۇمىس القا» تاقسا, ءبىرى العىس حاتقا يە بولدى.
اياۋلى انالار مەن ارۋلاردىڭ ءتول مەرەكەسىنە وراي ب.ريموۆا اتىنداعى تالدىقورعان دراما تەاترىندا سالتاناتتى كەش شىمىلدىعىن ءتۇردى. جەتىسۋ وبلىسىنىڭ اكىمى بەيبىت يساباەۆتىڭ قاتىسۋىمەن وتكەن شارادا كينو ونەرىنىڭ جارىق جۇلدىزى, ەل ماقتانىشى, جۇرت جادىندا «تاقيالى پەرىشتە» اتاۋىمەن جاڭعىرعان الىمعازى رايىمبەكوۆتەي ابىزدىڭ اسىل جارى گۇلجاۋار ايتجانقىزى سەكىلدى ەل انالارى, سان سالادا جەمىستى ەڭبەك ەتىپ كەلە جاتقان قاراپايىم قىزمەتكەرلەر, قۇرساعى قۇتتى, عازيز جۇرەكتى نازىك جاندار مەن وبلىستىڭ بەتكە ۇستارلارى مەيماندار قاتارىنان كورىندى.
اسەم ءان اۋەلەپ, شالقىعان كۇي شاناقتان ۇشقان مەرەكەلىك شارا بارىسىندا بەينەروليك كورسەتىلدى. وندا عۇمىرى عيبراتپەن ورىلگەن, كاسىپتەن ءناسىپ تەرگەن انالار تۋرالى ارنايى دايىندالعان بەينەشولۋ كورەرمەن ىقىلاسىن وياتتى.
جيىندا العاشقى بولىپ وبلىس اكىمى بەيبىت يساباەۆ ءسوز الدى. ول اۋەلى قازاقتا جەر-انا, وتان-انا دەيتىن قاسيەتتى ۇعىمدار بارىن, بۇل ەلگە, تۋعان جەرگە, مەملەكەتكە قاتىستى قۇندىلىقتاردىڭ بارلىعى انادان باستاۋ الاتىنىن ايعاقتايدى دەپ اتاپ ءوتتى. سونىمەن قاتار ايەلدەر قاۋىمىنا قاتىستى تەبىرەنىسكە تولى تولعامىن ايشىقتاي كەلە, كوپشىلىكتى مەرەكەمەن قۇتتىقتادى.
«جەتىسۋ ولكەسىندە كەشەگى زىليحا تامشىباەۆا, ءباتيما ساقاۋوۆا, التىناي ەسبولاتوۆا سياقتى تاريحي تۇلعالاردىڭ كوشى جاڭا زاماندا دا ۇزىلگەن جوق. بۇگىن ارامىزدا 10 بالا, 22 نەمەرە, 23 شوبەرە تاربيەلەپ وتىرعان بەلگىلى اكتەر, «تاقيالى پەرىشتە» فيلمىندەگى تايلاق رولىمەن كوپتىڭ سۇيىسپەنشىلىگىنە بولەنگەن, كۇنى كەشە عانا ومىردەن وزعان جەرلەسىمىز الىمعازى رايىمبەكوۆ اعامىزدىڭ اسىل جارى ايتجانقىزى گۇلجاۋار انامىز وتىر. الىمعازى اعامىزعا بيكەن ريموۆا, ءامينا ومىرزاقوۆا انالارىمىز بۇكىل الماتىنى ارالاپ, ەلدىڭ سان قيىرىنان كەلگەن سۇلۋلاردىڭ اراسىنان قالىڭدىق ىزدەپ ءجۇرىپ, ءبارىبىر تاڭداۋى گۇلجاۋار اپامىزعا تۇسكەن ەكەن. ەكەۋى جارتى عاسىرعا جۋىق ءومىردىڭ قىزىعىن دا, قيىندىعىن دا بىرگە كورىپ, ۇلگىلى وتباسى بولدى. قازىر رايىمبەكوۆتەر ۇلكەن اۋلەتكە اينالىپ وتىر», – دەگەن وبلىس اكىمى ەل اناسىنا قۇرمەت كورسەتتى.
تامىرى تەرەڭ تاريحتىڭ كوشىندە انالاردىڭ الاتىن ورنى ەرەك. ەل باسىنا كۇن تۋعان ساتتەن ەرىنىڭ سەرىگى, وشاعىنىڭ كورىگى بولعان ايەلدەردىڭ اسقان باتىلدىعى مەن قايراتى شەجىرەمىزدىڭ باياندى بولۋىنا تەگەرشىك. بۇگىنگى تاڭدا كەمەل ەلدىڭ كوشىن باستاعان, سان سالادا تولايىم تابىسىمەن تولاعاي اتانعانداردىڭ اناسى دا سالتاناتتى شارادا اتاۋسىز قالمادى. جان جادىراتقان, جۇرەك تەبىرەنتكەن سوزدەرىمەن مەرەكەنىڭ شىرايىن اشقان وبلىس اكىمى قاراپايىم ەڭبەك ادامدارىن دا القاپ, ارداقتادى. مەرەيىن ءوسىردى.
سالتاناتتى شارادا ايماق باسشىسى الدىمەن «التىن القا» يەلەرىن ماراپاتتادى. ءوز كەزەگىندە «كۇمىس القا» يەلەرى دە مەرەيلەندى. ايتا كەتۋىمىز كەرەك, بۇگىندە قازاقتىڭ سانىن كوبەيتىپ جاتقان قۇتتى قۇرساقتاردىڭ دەنى جاس انالار ەكەنى كوڭىل قۋانتىپ, كوز ءسۇيسىندىردى. ال جيىندا تاعى ءبىر جان تولقىتقان دۇنيە – وبلىس اكىمىنىڭ قولىنان العىس حات العان نازىك جاندىلاردىڭ دەنى مەكەمەلەردىڭ تازالىعىنا جاۋاپتى, مەملەكەتتەن نەسيە الىپ, شاعىن كاسىبىن اشىپ جاتقان, كوپبالالى انالار سەكىلدى قاراپايىم جانداردىڭ بولۋى. مىنە, وسىنداي قاتارداعى جانداردىڭ مەرەيلەنۋىمەن ايشىقتالعان مەرەكەلىك كەش كوڭىل تەبىرەنتتى. ەل كوسەگەسىن كوگەرتۋ جولىندا ءتۇن قالعىماي, كۇن تىنىم تاپپاي ەڭبەك ەتىپ جۇرگەن, ءار سالادا اق ادال ەڭبەگىمەن وتباسىنا تىرەك بولعان اياۋلى جاندارعا ارنالعان شارانىڭ سوڭى كونتسەرتتىك باعدارلاماعا ۇلاستى. ءان اسقاقتاپ, كۇي كۇمبىرلەدى.
وسى رەتتە ايتا كەتەيىك, پانفيلوۆ اۋدانىندا جەرگىلىكتى مەتسەناتتار مەن كاسىپكەرلەر ءتورت بالا تاربيەلەپ وتىرعان جالعىزباستى اناعا ءۇي سىيلادى. شولاقاي اۋىلىندا تۇراتىن وتباسى بۇعان دەيىن اپاتتى ءۇيدى مەكەن ەتكەن ەكەن. ەندى ولار كوكتەمگى مەرەكەنى 12 سوتىق جەر تەلىمى بار, بارلىق قاجەتتىلىكتەرمەن جابدىقتالعان 7 بولمەلى ۇلكەن ۇيدە قارسى الدى. جەتىسۋداعى اياۋلى انالار مەرەكەسى وسىلاي تويلاندى.
جەتىسۋ وبلىسى