قازاقستاننىڭ ىسكەر ايەلدەرى پاريجدە قازاق مادەنيەتىن تانىستىردى

ءىس-شاراعا فرانتسۋز قوعامىنىڭ, ىسكەرلىك جانە مادەني توپتاردىڭ وكىلدەرى, يۋنەسكو باسشىلىعى, سونداي-اق فرانتسيا مەن يۋنەسكو-دا اككرەديتتەلگەن بىرقاتار ديپلوماتيالىق ميسسيالاردىڭ باسشىلارى قاتىستى.

قازاقستان ەلشىسى گۇلسارا ارىستانقۇلوۆا اشىلۋ سوزىندە ايەلدەردىڭ قازىرگى قوعامداعى ماڭىزدى ءارى ءوسىپ كەلە جاتقان ءرولىن اتاپ ءوتتى.

«ازاماتتىق, ساياسي, ەكونوميكالىق, الەۋمەتتىك نەمەسە مادەنيەت سالاسىندا بولسىن, ايەلدەردىڭ قۇقىقتارىن ىلگەرىلەتۋ جانە قورعاۋ مەملەكەتتىڭ باستى باسىمدىقتارىنىڭ ءبىرى», دەدى ول.

ءىس-شارا اياسىندا جاڭادان قۇرىلعان «قازاقستاننىڭ فرانتسياداعى ىسكەر ايەلدەرى» قوعامداستىعىنىڭ تۇساۋكەسەرى ءوتتى.

ءىس-شاراعا قاتىسۋشىلاردىڭ نازارىنا « ۇلى دالانىڭ ايگىلى ايەلدەرى» اتتى فوتوكورمە ۇسىنىلدى. كورمەدە كورنەكتى تاريحي تۇلعالارمەن قاتار بىرقاتار ديپلوماتيا, عىلىم جانە ءبىلىم, دەنساۋلىق ساقتاۋ, سپورت جانە مادەنيەت سالارىندا ۇلكەن جەتىستىكتەرگە قول جەتكىزگەن قازىرگى قازاقستاننىڭ وكىلدەرىنىڭ ءومىر جولى مەن ەلىمىزدىڭ دامۋىنا قوسقان زور ۇلەستەرى باياندالادى.

ءىس-شارانىڭ شارىقتاۋ شەگى قازاقستان ىسكەر ايەلدەر كەڭەسىنىڭ مۇشەسى, حالىقارالىق ديزاينەرلەر كونكۋرستارىنىڭ جەڭىمپازى, اقتوبەلىك ديزاينەر ماليكا دۇيسەنباەۆانىڭ ۇلتتىق كيىمدەر جيىنتىعىنىڭ كورسەتىلىمى بولدى.