مۇنايلى ءوڭىر ايناسى سانالاتىن, 90 جىلدان استام تاريحى بار وبلىستىق «اتىراۋ» گازەتىنىڭ رەداكتسياسى ەلەڭ ەتكىزەرلىك جاڭا باستامالارىمەن تانىلۋدا. بۇل – باسىلىمنىڭ ءتۇرلى تانىمدىق-ساراپتامالىق سيپاتتاعى ءتورت بىردەي قوسىمشا شىعارا باستاعاندىعى.
«گازەت ىشىندەگى گازەت» فورماتىنداعى العاشقى قوسىمشا «بيزنەسمەن» دەگەن اتاۋمەن بىلتىرعى جىلدىڭ اقپان ايىندا جارىق كورگەن بولاتىن. وندا جەكە كاسىبىمدى اشىپ, وتاندىق ءوندىرىستى ورىستەتەمىن دەپ تالاپتانۋشىلارعا ناسيحاتتىق-ءتۇسىندىرمە تۇرعىسىنان ناقتى كومەك بەرىلگەن بولاتىن. بۇل باستاما, اسىرەسە, الىس اۋىلدارداعى جاس كاسىپكەرلەر ءۇشىن ۇلكەن قولداۋ بولعانى داۋسىز.
رەداكتسيا بيىل «تەمىرقازىق» اتالاتىن تاعى ءبىر تانىمدىق قوسىمشانىڭ تۇساۋىن كەستى. مۇندا ەلىمىز الدىنا ماقسات ەتىپ قويعان وزىق 30 ەلدىڭ قانداي مەملەكەتتەر ەكەندىگى حاقىندا (جەر كولەمى, حالىق سانى, ەكونوميكاسى, سالت-ءداستۇرى, مادەنيەتى, الەۋمەتتىك-تۇرمىستىق جاعدايى, ءتۋريزمى, ۇلتتىق ءدىلى, ت.ب.) جان-جاقتى ماعلۇمات بەرىلدى. «تەمىرقازىقتىڭ» ءار سانى ءبىر عانا ەلدى تانىستىرۋعا ارنالادى. قازىردىڭ وزىندە قوسىمشانىڭ «اۆستريا», «اۆستراليا», «بەلگيا» ەلدەرى تۋرالى كەڭىنەن بايانداعان نومىرلەرى جارىق كورىپ ۇلگەردى.
جۋىردا «اتىراۋ» گازەتى وتباسىلىق وزەكتى ماسەلەلەردى تولعايتىن «شاڭىراق», قۇقىقتىق جانە زاڭدىلىق پروبلەمالارىن قاۋزايتىن «ادىلەت الەمى» دەگەن تاعى ەكى قوسىمشانى جارىققا شىعاردى. ولاردىڭ العاشقى ساندارىنان-اق كوتەرەر جۇگىنىڭ جەڭىل ەمەسى, وقىرماندى تولعاندىراتىن جايلاردى ءدوپ باسۋىمەن ەرەكشەلەنەتىن جاڭا جوبالار ەكەندىگى انىق اڭعارىلادى.
جولداسبەك شوپەعۇل,
«ەگەمەن قازاقستان».
اتىراۋ وبلىسى.