قىزىلوردادا قالالىق مادەنيەت جانە سپورت ءبولىمىنىڭ ۇيىمداستىرۋىمەن اجەلەر انسامبلدەرىنىڭ وبلىستىق فەستيۆالى ءوتتى. قازاقتىڭ تۇرمىس-سالت جىرلارىن, حالىق اندەرىن ورىنداۋ ارقىلى تاربيە مەن وتباسى قۇندىلىعىن ناسيحاتتاۋدى كوزدەگەن «ۇلاعاتتى اجە» فەستيۆالىندە قالا اكىمى اسىلبەك شامەنوۆ وبلىستىڭ ءار تۇكپىرىنەن كەلگەن ونەر ۇجىمدارىنا ريزاشىلىعىن ءبىلدىرىپ, ساتتىلىك تىلەدى.
«اجەلەر – الىمساقتان ۇلتتىڭ ۇيىتقىسى, ءتالىم مەن تاربيەنىڭ تۇما باستاۋى. سوندىقتان بۇل ءىس-شارانىڭ جاستار ءۇشىن ونەگەسى مول. اعايىن-تۋمانىڭ بىرلىگىن ساقتاپ, جاس كەلىندەرگە جول كورسەتكەن, نەمەرە-شوبەرەلەرىن قۇندىلىقتاردىڭ قاينارىمەن سۋسىنداتقان اسىل جاندار وتكەننىڭ ونەگەسىن بۇگىنگە جەتكىزىپ وتىر», دەگەن قالا اكىمى ابزال انالاردى الدا كەلە جاتقان مەرەكەمەن قۇتتىقتادى.
شاھار باسشىسى وسى كەشتە ەلىمىزدىڭ گۇلدەنۋىنە ايرىقشا ۇلەس قوسىپ, ءتۇرلى سالادا جەمىستى ەڭبەك ەتىپ جۇرگەن بەلگىلى ازاماتتاردىڭ انالارى مەن جۇبايلارىنا كوكتەمنىڭ شۋاقتى مەيرامى قارساڭىندا ارنايى سىي-قۇرمەت كورسەتتى.
وبلىس اۋماعىنان 10 انسامبل قاتىسقان ونەر مەرەكەسىندە قىزىلوردا قالالىق ءبىلىم ءبولىمى جانىنان قۇرىلعان «اسىل جاندار» ۇجىمى «كورەرمەندەر كوزايىمى» اتانسا, اسقار توقماعامبەتوۆ مادەنيەت ءۇيىنىڭ «ۇلاعات» ءانسامبلى مەن جالاعاش اۋدانى ءمورالى شامەنوۆ اۋىلدىق مادەنيەت ءۇيى جانىنداعى «اسىل انا» ءانسامبلى 3-ورىن الدى.
ونەر سايىسىنىڭ ەكىنشى جۇلدەسى سىرداريا اۋدانىنداعى اسقار توقماعامبەتوۆ مادەنيەت ورتالىعىنىڭ جانىنداعى «اسىل انا» انسامبلىنە بۇيىردى. ال روزا باعلانوۆا اتىنداعى قازالى اۋداندىق مادەنيەت ءۇيىنىڭ «ونەگە» ءانسامبلى ءبىرىنشى ورىن الىپ, باس جۇلدەگە قارماقشى اۋداندىق ءشامشات تولەپوۆا اتىنداعى مادەنيەت ءۇيى جانىنان قۇرىلعان «اق اجەلەر» ءانسامبلى لايىق دەپ تانىلدى.
بارلىق قاتىسۋشى مەن جەڭىمپازعا ارنايى العىس حاتتار مەن قارجىلاي سىيلىقتار تابىستالدى.
قىزىلوردا