ۇلىتاۋدا شاحتا قىزمەتكەرلەرىنىڭ اراسىندا توبەلەس بولدى

ۆيدەودان بەلگىسىز ەكى ەر ادام عيماراتتىڭ دالىزىندە ءبىر ەر ادامدى ۇرىپ-سوعىپ جاتقانىن كورۋگە بولادى. ۆيدەونىڭ سيپاتتاماسىندا وقيعانىڭ ۇلىتاۋ وڭىرىندەگى شاحتالاردىڭ بىرىندە بولعانى ايتىلعان.

«ۇرىپ جاتقاندار جەزقازعان قالاسىنىڭ ۇيىمداسقان قىلمىستىق توبىنىڭ مۇشەلەرى. قارا كيىمدى جىگىت كادر ءبولىمىنىڭ قىزمەتكەرى. ول بۇلاردىڭ جۇمىسقا كەلمەي-اق جالاقى الۋىنا كەلىسپەي تۇر. سوندىقتان سوققى جەدى», دەلىنگەن حابارلامادا.

پوليتسەيلەر الەۋمەتتىك جەلىلەردى باقىلاۋ كەزىندە وسى ۆيدەوعا تاپ بولعانىن ايتادى.

«بۇل جانجال ۇلىتاۋ اۋدانىنداعى شاحتالاردىڭ ءبىرىنىڭ اۋماعىندا بولعانى انىقتالدى. بۇل دەرەك «بۇزاقىلىق» بابى بويىنشا تىركەلدى, ەكى كۇدىكتى ۇستالىپ, ۋاقىتشا ۇستاۋ يزولياتورىنا قامالدى. قازىرگى ۋاقىتتا تەرگەۋ شارالارى جۇرگىزىلىپ جاتىر»,  دەلىنگەن پد تاراتقان حابارلامادا.