ماعجان – ولەڭ, ماعجان – عۇمىر. تۇتاس ءومىرىن ۇلت جولىنا, ۇلت ادەبيەتىنە ارناعان رۋحتى اقىننىڭ ءار جىرى مازداق جالىنعا, قانجارداي وتكىرلىككە تولى. تۇركىنىڭ تىك شانشىلعان نايزاسى ىسپەتتى اسقاق رۋحى بويدى تولقىتىپ, ويعا قۇنار سەبەرى انىق.
بيىل اقىننىڭ تۋعانىنا 130 جىل تولىپ وتىر. وسىعان وراي استانا قالاسى اكىمدىگىنىڭ «رۋحانيات» مەكەمەسى مەن ورتالىقتاندىرىلعان كىتاپحانالار جۇيەسىنىڭ ۇيىمداستىرۋىمەن اقپان ايىنىڭ №5 بالالار كىتاپحاناسىندا «الاشتىڭ جارىق جۇلدىزى» اتتى ادەبي-تانىمدىق كەش ءوتتى.
كەشكە قازاقستاننىڭ ەڭبەك سىڭىرگەن مادەنيەت قايراتكەرى, اقىن باقىتجان توباياق, «جاڭارۋ» سىبايلاس جەمقورلىققا قارسى رەسپۋبليكالىق بىرلەستىگىنىڭ اپپارات باسشىسى قابدۋللا اليەۆ جانە كىتاپحانا وقىرماندارى, ۇستازدار قاتىستى.
ءىس-شارانى استانا قالاسى اكىمدىگىنىڭ «رۋحانيات» مەكەمەسىنىڭ باسشىسى ساۋلە دوسجانوۆا مەن ورتالىقتاندىرىلعان كىتاپحانالار جۇيەسى ديرەكتورىنىڭ ورىنباسارى مانات كەرىمبەكوۆا اشىپ, جاستاردى قازاقتىڭ رۋحىن وياتقان, سۇلۋ سەزىمدى سوزگە ارقاۋ ەتكەن اقىن ماعجان جۇماباەۆتىڭ جىرلارىن وقۋعا, رۋحاني باي بولۋعا ۇندەدى.
مۇنان سوڭ «جۇرەك ءسوزىنىڭ جىرشىسى» باعدارلاماسى بويىنشا كىتاپحانا وقىرماندارىنا اقىن ولەڭدەرى مەن پوەمالارىن وقۋعا كەزەك بەرىلدى. استانا قالاسىنداعى №40, 52, 64, 78 مەكتەپ وقۋشىلارى جانە س.سەيفۋللين اتىنداعى قازاق اگروتەحنيكالىق ۋنيۆەرسيتەتى ستۋدەنتتەرى اقىن ولەڭدەرىن ناقىشىنا كەلتىرە وقىپ, كوپشىلىكتىڭ ىقىلاسىنا بولەندى.
ءسوز العان كەش قوناعى باقىتجان توباياق ماعجان جۇماباەۆ جونىندە جۇرەكجاردى لەبىزىن ايتتى.
– ماعجان جۇماباەۆتىڭ ءومىرى مەن ولەڭى جارتى عاسىردان ارتىق ۋاقىت بويى ايتىلمادى, ناسيحاتتالمادى. اقىننىڭ كىتاپتارى تىيىم سالۋ كەسىرىنەن سارعايىپ, توزىپ, جوعالىپ جاتتى. اقتى قارا, قارانى اق دەپ تۇسىندىرگەن زورلىق-زومبىلىق ءداۋىرىنىڭ قۇربانى بولعان اقىن تاعدىرى ايانىشتى ەدى. بىراق ايدى الاقانمەن جابۋ مۇمكىن ەمەس بولاتىن, – دەدى اقىن.
سونىمەن بىرگە ماعجان جۇماباي ۇلىنا جاس اقىندار ارناۋ وقىپ, پىكىرلەرىن ءبىلدىردى. كەش بارىسىندا «مەن جاستارعا سەنەمىن» اتتى تاقىرىپتا دايىندالعان بەينەبايان كورسەتىلىپ, كىتاپ كورمەسى تانىستىرىلدى.
ءىس-شارا سوڭىندا كەشكە بەلسەنە قاتىسقان وقىرمانداردى «رۋحانيات» مەكەمەسىنىڭ باسشىسى ساۋلە بولاتقىزى ماراپاتتاپ, ونىڭ ىشىندە ماعجان جۇماباەۆتىڭ «جان ءسوزى» ولەڭىن كەرەمەت وقىعانى ءۇشىن كىتاپحانا وقىرمانى جۇمابەك تىلەككە ەرەكشە العىسىن ءبىلدىردى.
اقىننىڭ الاش قايراتكەرلەرىمەن تىزە قوسىپ ەتكەن ەڭبەگى ءبىر توبە. پسيحولوگيا جونىندە ەڭبەك جازۋى, الەم كلاسسيكتەرىن اۋدارۋ ىسىمەن شۇعىلدانۋى, اۋىز ادەبيەتىنىڭ تۇلعالارى جونىندەگى, ۇلت تاعدىرى جايىنداعى كەستەلى ماقالالارى سوزىمىزگە ايعاق.
«ەل ءۇشىن توككەن ەرلەر
قانىن جۇتقان,
ەرلەردى ۇمىتسا دا ەل,
جەر ۇمىتپاس.
ارقانىڭ سەلى, جەلى, ءشولى, بەلى,
ەرلەردى ۇمىتپاسا,
ەل دە ۇمىتپاس!»
اقىننىڭ ءوزى ايتقانداي, ۇلتتىڭ تولاعاي تاريحىن جىرلاۋ ارقىلى سول ۇلتتىڭ وزىنە اينالعان الىپ اقىندى ەل ۇمىتپايدى. عاسىر سايىن تۋىلعان ءاربىر قازاق بالاسى اقىن جىرىمەن قايراتتانار, قارا كوزگە جاس الار, قاسيەتتى جەرىنىڭ ۇلىلىعىنا باس يەر. وسىلايشا اقىن رۋحى بيىكتەي ءتۇسىپ, بولاشاق ۇنىمەن بىتە قايناسارى ءسوزسىز.