جالپىۇلتتىق سوتسيال-دەموكراتيالىق پارتياسىنىڭ ءتىزىمى بويىنشا كانديدات ناۋرىز سايلاۋباي جەتىسۋ وبلىسىنداعى «تالدىقورعان كابەل زاۋىتى» جشس ۇجىمىمەن ۇگىت-ناسيحات كەزدەسۋىن وتكىزدى. ءىس-شارا بارىسىندا كانديدات پارتيانىڭ سايلاۋالدى باعدارلاماسىنىڭ باسىم باعىتتارىن باياندادى.
«تاۋەلسىز قازاقستاندا بيلىك حالىققا تيەسىلى بولۋى قاجەت. قازاقستان جالپىحالىقتىق وركەندەۋ ءۇشىن قاجەتتى بارلىق العىشارتقا يە. بىراق, وكىنىشكە قاراي, وليگارحات پەن جەمقورلىق تامىرىنىڭ تەرەڭگە كەتكەنى سونشالىق, مەملەكەتىمىزدىڭ دامۋىنا قاتىستى ەكونوميكالىق جانە الەۋمەتتىك كۇن تارتىبىندە تۇرعان كوپتەگەن جۇيەلى ماسەلە ۋشىعىپ وتىر. قازاقستاننىڭ بارلىق دەرلىك باعىتتاعى دامۋى بويىنشا ءبىز شەنەۋنىكتەردىڭ جارقىن بولاشاققا قاتىستى بىتپەيتىن ۋادەلەرىنە تولى ادەمى ساياسي باياندامالارىن كورىپ وتىرمىز. جىلدار وتەدى, ۋادە ەتىلگەن ۋاقىت تاياعاندا باستاپقى باعىتتان باس تارتۋعا ءتۇرلى سىلتاۋ تابىلادى. قاراپايىم حالىق جىل سايىن كەدەيلەنىپ بارادى: ەلىمىزدىڭ اعىمداعى دامۋ دەڭگەيى جانە 2022 جىلدىڭ قورىتىندىسى بويىنشا 25 پايىزدىق ازىق-ت ۇلىك ينفلياتسياسى – وسىنىڭ تىكەلەي ايعاعى. ءبىزدىڭ ماقساتىمىز – ازاماتتاردىڭ ءال-اۋقات دەڭگەيىن ارتتىرۋ. بۇل – پارتيانىڭ پارلامەنت ءماجىلىسىنىڭ سايلاۋىنا تۇسۋدەگى باستى سەبەپتەرىنىڭ ءبىرى. قازىرگى جاعدايدان مەملەكەتىمىز تەك سوتسيال-دەموكراتيا يدەياسى ارقىلى شىعا الاتىنىنا سەنەمىز. الەۋمەتتىك ءتارتىپ تۇبەگەيلى قايتا قاراستىرىلۋى قاجەت. بۇگىندە ءبىز قوعام, بيزنەس جانە مەملەكەتتى تەپە-تەڭدىك جاعدايىنا قايتارۋىمىز كەرەك. بۇل دەگەنىمىز – ازاماتتاردىڭ قايتا پايدا تابۋى, بيزنەستىڭ وليگارحات نە مەملەكەتتىڭ قۋدالاۋى مەن قىسىمىنان قورىقپاي, ادال جۇمىس ىستەپ, سالىق تولەۋى. ءبىز ءار شەشىمى ازاماتتارىمىزدىڭ يگىلىگىنە جۇمىس ىستەپ, پايداسىنا اسىرىلاتىن الەۋمەتتىك-جاۋاپتى ءتارتىپتى ورناتا الاتىنىمىزعا سەنەمىز», دەدى ول.
«جەمقورلىق مەملەكەتتى كۇيرەتەدى, ادامدار اراسىنداعى سەنىمدى ازايتادى. پاراقورلىقپەن كۇرەس كەزىندە, اسىرەسە ساياسي دەڭگەيدە, باتىل شارالار قولدانىلماسا, ەلىمىز تۇراقتى دامۋ جولىنا تۇسە المايدى دەپ ەسەپتەيمىز. مەملەكەت پەن ەكونوميكانى ءادىل باسقارۋ جۇيەسىن قالىپتاستىرۋ ءۇشىن, ەڭ الدىمەن, ساياسي جۇيەمىزدى وزگەرتۋگە ءتيىسپىز», دەدى كانديدات.