وتكەن اپتادا پرەزيدەنت ءىس باسقارماسى مەديتسينالىق ورتالىعىنىڭ شىمكەنت قالاسىنداعى كۇندەرى ءوتتى. وسى ءىس-شارانىڭ قورىتىندىسىندا اتالعان ورتالىقتىڭ باسشىسى الەكسەي تسوي مەن شىمكەنت قالاسىنىڭ اكىمى مۇرات ايتەنوۆ ءوزارا ىنتىماقتاستىق تۋرالى مەموراندۋمعا قول قويدى.
ءۇش كۇن ارالىعىندا ءپىب مو-نىڭ 25 بىلىكتى مامانى شاھاردىڭ جەتەكشى كلينيكا دارىگەرلەرىمەن بىرگە جۇزدەن اسا ناۋقاسقا مەديتسينالىق كەڭەس بەرىپ, ونداعان كۇردەلى وپەراتسياعا قاتىستى.
شەكتەۋسىز مەرزىمگە جاسالعان مەموراندۋمدىق كەلىسىم قالا تۇرعىندارىنا دارىگەرلەردىڭ تەگىن كونسۋلتاتسيالارىن, ساناتوري-كۋرورتتىق ەمدەۋ جانە مەديتسينالىق وڭالتۋ بويىنشا قىزمەتتەردى الۋعا, ال قاجەت بولعاندا جاعدايى اۋىر ناۋقاستاردى ەمدەۋگە مۇمكىندىك بەرەدى. سونداي-اق ورتاق كەلىسىمنىڭ ناتيجەسىندە, ءوڭىردىڭ مەديتسينالىق مەكەمە قىزمەتكەرلەرىنە يننوۆاتسيالىق تەحنولوگيالاردى وقىتۋ, اۋرۋلاردىڭ الدىن الۋ, دياگنوستيكالاۋ, جاڭا مەديتسينالىق تەحنولوگيالار مەن يننوۆاتسيالىق ادىستەمەلەرىن دامىتۋ سالاسىندا تاجىريبە الماسۋ تۋرالى ۋاعدالاستىققا قول جەتكىزىلدى.
شىمكەنت قالاسىنىڭ اكىمى مۇرات ايتەنوۆ مەديتسينالىق ورتالىقتىڭ بۇل باستاماسىن قولداپ, مەموراندۋمنىڭ الداعى ۋاقىتتا وڭىردەگى مەديتسينا سالاسىنىڭ دامۋىنا ايتارلىقتاي ىقپال ەتەتىنىن اتاپ ءوتتى.
ء«ۇشىنشى مەگاپوليستە تەگىن مەديتسينالىق كومەك كورسەتۋدىڭ كەپىلدىك بەرىلگەن كولەمى شەڭبەرىندە 45 ەمحانا حالىققا قىزمەت كورسەتىپ وتىر. ونىڭ 13-ءى – مەملەكەتتىك, 32-ءسى – جەكەمەنشىك ۇيىم. 2022 جىلى ءولىم-ءجىتىم سانى مىڭ تۇرعىنعا شاققاندا 36 پايىزعا ازايعان. ونىڭ ىشىندە نارەستەلەر, قان اينالىمى اۋرۋلارى مەن قاتەرلى ىسىك سالدارىنان بولاتىن ءولىم-ءجىتىم سانى ءبىرشاما تومەندەدى. ءبىز ءوڭىر مەديتسيناسىن ءارى قاراي دامىتۋ ماقساتىندا پرەزيدەنت ءىس باسقارماسى مەديتسينالىق ورتالىعىنا قاراستى مەكەمەلەرمەن بايلانىس ورناتىپ, ولاردىڭ دياگنوستيكاداعى زاماناۋي مۇمكىندىكتەرىن قولدانىپ, تاجىريبە الماسۋدى كوزدەپ وتىرمىز. قازىر مەملەكەتتىك-جەكەشەلىك ارىپتەستىك شەڭبەرىندە ونكولوگيالىق اۋرۋلاردى ەرتە دياگنوستيكالاۋعا قول جەتكىزدىك. ياعني قالالىق اۋرۋحانا جانىنان قۇرىلعان يادرولىق مەديتسينا ورتالىعىندا پەت/كت قۇرىلعىسىنىڭ كومەگىمەن جىلىنا 3 500 ادامعا دياگنوستيكا جاساۋعا مۇمكىندىك بار. ال ساۋلەلى ەمدەۋ قۇرىلعىسىنىڭ كومەگىمەن جىلىنا 10 مىڭنان اسا ادامعا ەم جۇرگىزۋگە بولسا, وسى كۇنگە دەيىن 180 ناۋقاس قۇرىلعىنىڭ كومەگىمەن ەمدەلىپ شىقتى. سونداي-اق كۇردەلى مەديتسينالىق قۇرىلعىلاردىڭ كومەگىمەن وپەراتسيانىڭ بارلىق ءتۇرىن ءوزىمىز جاساي باستادىق. الداعى ۋاقىتتا كوپبەيىندى كلينيكالىق اۋرۋحانا مەن پەريناتالدىق ورتالىق اشۋ كوزدەلىپ وتىر. مەديتسينالىق ورتالىقپەن ىنتىماقتاستىق مەموراندۋمىنا قول قويۋداعى ماقساتتىڭ ءبىرى – جوعارىدا اتالعان جوسپارلاردى بىرلەسىپ جۇزەگە اسىرۋ», دەدى شاھار باسشىسى.
ءوز كەزەگىندە مەديتسينالىق ورتالىق باسشىسى الەكسەي تسوي پرەزيدەنت ءىس باسقارماسى مەديتسينالىق ورتالىعىنىڭ عاسىرعا جۋىق – 90 جىلدان اسا ۋاقىت ەلىمىزدىڭ دەنساۋلىق ساقتاۋ جۇيەسىنىڭ ءىرى مەكەمەسىنە اينالعانىن ايتتى.
«پرەزيدەنت ءىس باسقارماسىنىڭ مەديتسينالىق ورتالىعى ءبىلىم بەرۋ, عىلىمي-زەرتتەۋ جۇمىستارىن, سانيتارلىق-ەپيدەميولوگيالىق زەرتتەۋلەر, يننوۆاتسيالىق ادىستەردى ىزدەستىرىپ, ونى تاجىريبە جۇزىندە قولدانىپ جاتىر. ولار رەسپۋبليكانىڭ پراكتيكالىق دەنساۋلىق ساقتاۋ سالاسىنا ترانسفەرتىن جۇرگىزەدى. كەيىنگى ءۇش جىلدىڭ وزىندە كلينيكانىڭ ماماندارى 150-دەن اسا جاڭا تەحنولوگيانى رەسپۋبليكانىڭ تاجىريبەسىنە العاشقىلاردىڭ ءبىرى بولىپ ەنگىزدى. بۇگىندە وبلىستىڭ 130-دان اسا ازاماتى مەديتسينالىق ورتالىق ۇيىمدارىندا كومەك الىپ, ەمدەۋ-ساۋىقتىرۋدان جانە وڭالتۋدان ءوتتى. ءبىز بۇدان ءارى ءوڭىردىڭ تۇرعىندارىنا پراكتيكالىق مەديتسينالىق كومەك كورسەتۋدى ارتتىرۋدى جوسپارلاپ وتىرمىز», دەدى.
سونداي-اق ءىسساپار اياسىندا مەگاپوليستەگى Santo فارماتسەۆتيكالىق كومپانياسى مەن ءپىب مەدورتالىعى اراسىندا مەديتسينالىق جانە فارماتسەۆتيكالىق تەحنولوگيالار بويىنشا ىنتىماقتاستىقتى ارتتىراتىن ەكىجاقتى مەموراندۋم ءتۇزىلدى. قول قويۋ راسىمىنەن سوڭ جۋرناليستەرگە بەرگەن سۇحباتىندا الەكسەي تسوي مەن «حيمفارم» اق باس ديرەكتورىنىڭ مىندەتىن اتقارۋشى ءادىلحان تەمىربەكوۆ مەديتسينا مەن دەنساۋلىق ساقتاۋدى دامىتۋعا باعىتتالعان وزەكتى ماسەلەلەردى بىرگە شەشۋگە كۇش سالاتىندارىن جەتكىزدى.
سونىمەن بىرگە تاراپتار ءوزارا ىنتىماقتاستىقتىڭ بىرقاتار باعىتىن ايقىندادى. ماسەلەن, ونىڭ ىشىندە عىلىمي-زەرتتەۋ جانە يننوۆاتسيالىق قىزمەتتى بىرلەسىپ جۇزەگە اسىرۋ, كلينيكالىق زەرتتەۋلەر جۇرگىزۋ سالاسىندا ارىپتەستىكتى دامىتۋ ماقساتتارى بار.
سونداي-اق بۇل قۇجات تاراپتاردىڭ ۇزاق مەرزىمدى ءوزارا ۇتىمدى سەرىكتەستىگىن نىعايتۋعا, عىلىمي-زەرتتەۋ زەرتحانالارىندا ءپىب مەديتسينالىق ورتالىعى مەن Santo كومپانياسىنىڭ قىزمەتكەرلەرىنىڭ جۇمىسىن قولداۋعا, پراكتيكالىق تاجىريبە الماسۋعا جانە كلينيكالىق تيىمدىلىكتى ەسكەرە وتىرىپ, دالەلدى مەديتسينا قاعيداتتارى نەگىزىندە دەنساۋلىق ساقتاۋ تەحنولوگيالارىن باعالاۋ مەن ىرىكتەۋگە باعىتتالعان.
كەلىسسوز بارىسىندا ورتالىق پەن فارماتسەۆتيكالىق زاۋىت باسشىلىعى جۇمىس تيىمدىلىگىن ارتتىرۋعا, ول ءۇشىن ءتۇرلى ءتيىمدى ارەكەتتى پايدالانۋعا, تۇراقتى تۇردە اقپارات الماسىپ وتىرۋعا جانە كوبىرەك حالىقارالىق تاجىريبەگە سۇيەنۋگە ۋاعدالاستى.
مەموراندۋم اياسىندا دەلەگاتتار فارماتسەۆتيكالىق كومپانيانىڭ ءدارى-دارمەك شىعاراتىن جوعارى تەحنولوگيالى جانە ءتارتىپ پەن تازالىق قاتاڭ رەجىمدە ساقتالاتىن تسەحتارىندا بولىپ, جۇمىسىمەن تانىسىپ شىقتى. ورتالىق باسشىسى دارىلىك پرەپاتتار وندىرىسىندەگى وتاندىق كاسىپورىننىڭ العا باسقان قادامدارىن وڭ باعالاپ, اتقارىپ جاتقان ەڭبەگىنىڭ ناتيجەسى وتە جوعارى ەكەنىنە سەنىم ءبىلدىردى.
«ۇلت ساۋلىعىن نىعايتۋ – ەلدىڭ باستى مىندەتتەرىنىڭ ءبىرى. وسىعان وراي مەملەكەت باسشىسى قاسىم-جومارت توقاەۆ دەنساۋلىق ساقتاۋ جۇيەسىن دامىتۋدىڭ باستى باعىتتارىن ايقىنداپ بەردى. سوندىقتان ەڭ ءبىرىنشى مىندەت – وزىق مەديتسينالىق تەحنولوگيا مەن الەمدىك ستاندارتتارعا ساي ساپالى مەديتسينالىق كومەك كورسەتۋدىڭ قولجەتىمدىلىگىن ارتتىرۋ. پرەزيدەنت ءىس باسقارماسىنىڭ مەديتسينالىق ورتالىعىنىڭ جوسپارى بويىنشا ەلىمىزدىڭ ءار وڭىرىندە وسىنداي تاجىريبە الماسۋ كۇندەرى وتەدى. البەتتە, وڭىرلىك دەنساۋلىق سالاسى تۋرالى وي ايتساق, شىمكەنتتى مەديتسينا كادرلارىن دايارلايتىن ۇستاحانا دەۋگە بولادى. ال ورتالىقتىڭ باستى قىزمەتى – حالىققا مەديتسينالىق قىزمەت كورسەتۋمەن قاتار الەمدەگى وزىق تاجىريبەلەردى ەلىمىزگە اكەلىپ, جەرگىلىكتى ەمدەۋ مەكەمەلەرىنە قولدانىسقا ەنگىزۋگە جاردەمدەسۋ», دەدى ا.تسوي.
ايتا كەتۋ كەرەك, 140 جىلدىق تاريحى بار «حيمفارم» اق كومپانياسى قازاقستاننىڭ فارماتسەۆتيكالىق نارىعىنداعى كوشباسشى كاسىپورىنداردىڭ ۇشتىگىنە كىرەدى جانە ءدارى-دارمەكتىڭ بولشەك ساۋداسىندا ءبىرىنشى ورىنعا يە.
شىمكەنت