تالدىقورعان قالاسىنداعى نازارباەۆ زياتكەرلىك مەكتەبىنىڭ وقۋشىلارى قاتار مەملەكەتىندە وتكەن «بىرىككەن ۇلتتار ۇيىمىنىڭ ۇلگىسى» جاستار كونفەرەنتسياسىنا قاتىستى. مۇندا الەمدەگى مادەني ءھام ەكونوميكالىق وزگەرىستەرگە قازاق بالالارى ءوز ويلارىن قوسىپ, ءوزارا پىكىر الماستى.
دوحاداعى دجوردجتاۋن ۋنيۆەرسيتەتىندە وتكەن «جاھاندىق قاۋىپسىزدىك: وتكەننىڭ ساباقتارى» اتتى ءىس-شاراعا 15 ەلدەن كەلگەن 500-دەن استام جاس قاتىستى. ولار بۇۇ ديپلوماتتارىنىڭ رولىنە ەنىپ, الەمدەگى ەڭ وزەكتى قاۋىپسىزدىك ماسەلەلەرىن شەشۋ جولدارىن تالقىلادى.
قازاقستان كومانداسىنىڭ قۇرامىنا تالدىقورعان قالاسىنداعى نازارباەۆ زياتكەرلىك مەكتەبىنىڭ التى وقۋشىسى كىردى. كونفەرەنتسيا ناتيجەسىندە 11-سىنىپ وقۋشىلارى ماكسيم سۋرين مەن دانيال شوكوبالينوۆ MUN باس حاتشىسى جانە حالىقارالىق تاريح بويىنشا اعا مامان بەندجامين كۋرياننىڭ, سونداي-اق GU-Q ءبىلىم بەرۋدى دامىتۋ جونىندەگى مەنەدجەرى دجيبين كوشيدىڭ اتىنان ماقتاۋ قاعازدارىمەن ماراپاتتالدى.
– مەن DISEC كوميتەتىندە وڭتۇستىك كورەيا دەلەگاتسياسىنىڭ اتىنان قاتىستىم. مادەني مۇرانى قورعاۋ, الەمدە بولىپ جاتقان ناقتى جاعدايلاردى تالداۋ, سونداي-اق ايەلدەر مەن ادامداردىڭ باسقا دا توپتارىنىڭ قۇقىقتارىن قورعاۋ تاقىرىپتارىن تالقىلادىق. وسى كونفەرەنتسيا ارقىلى كوپتەگەن تالانتتى پىكىرسايىسشىلارمەن تانىستىم, سونىمەن قاتار جاھاندىق پروبلەمالارعا ءوزىمنىڭ سىني كوزقاراسىمدى ايتا الدىم, – دەيدى م.سۋرين.
ال دانيال شوكوبالينوۆ كونفەرەنتسيادا جيناقتاعان تاجىريبە, الداعى ماقساتتارىنا مۇرىندىق بولارىن جاسىرمادى.
– ارينە, بۇل كونفەرەنتسياعا قاتىسۋ – ۇلكەن تاجىريبە. تالقىلاۋ بارىسىندا وزەكتى ماسەلەلەردى تاريحي تۇرعىدان قاراستىردىق, ويتكەنى وتكەننەن ساباق الىپ جانە قازىرگى ستسەناريلەرگە قولدانۋعا بولاتىن دۇنيە كوپ. ارقايسىمىز شىعارماشىلىقپەن اينالىسۋعا, كەدەرگىلەرگە قارسى تۇرۋعا, ءوز داعدىلارىمىزدى قولدانۋعا جانە كەڭەيتۋگە تىرىستىق, – دەيدى دانيال.
جەتىسۋ وبلىسى