تۇركياعا كومەككە كەتكەن قازاقستان قۇتقارۋشىلارى قيراندىلار استىندا قالعان 7 ادامدى قۇتقارىپ, 200-دەن استام جەرگىلىكتى تۇرعىنعا مەديتسينالىق كومەك كورسەتكەن. ورتالىق كوممۋنيكاتسيالار قىزمەتىندە وتكەن بريفينگ بارىسىندا ولار تابيعي اپات ايماعىنداعى ىزدەستىرۋ-قۇتقارۋ جۇمىستارىنىڭ بارىسى, كينولوگيالىق ەسەپتەۋلەر جانە اپاتتار مەديتسيناسى ورتالىعىنىڭ قىزمەتى تۋرالى ايتىپ بەردى.
قۇتقارۋشىلار توبىنا جەتەكشىلىك ەتكەن توتەنشە جاعدايلار ءبىرىنشى ۆيتسە-ءمينيسترى يبراگيم كۇلشىمباەۆ تۇركياداعى ىزدەستىرۋ-قۇتقارۋ جۇمىستارى جوعارى پسيحوەموتسيونالدى جۇكتەمە جاعدايىندا جۇرگىزىلگەنىن ايتتى.
– ىزدەستىرۋ-قۇتقارۋ جۇمىستارىن جۇرگىزۋدىڭ قيىندىعى مىنادا: ءتورت قاباتتى پليتالاردىڭ ءبىرىنشى قابات پەن تۇراق اراسىنداعى قاشىقتىعى 25-30 سم-دەن اسپايدى. جۇمىس جۇرگىزۋگە كۇننىڭ سۋىقتىعى, افتەرشوكتار دا كەدەرگى بولدى. بۇكىل كەزەڭ بويى ىزدەستىرۋ-قۇتقارۋ جانە اۆاريالىق-قۇتقارۋ جۇمىستارى ۇزدىكسىز جۇرگىزىلدى. سونىمەن قاتار جۇمىس قازا تاپقانداردىڭ كوپتىگىنەن جانە توتەنشە جاعداي ايماعىندا ولاردىڭ تۋىستارى مەن جاقىندارىنىڭ بولۋىمەن بايلانىستى جوعارى پسيحوەموتسيونالدى جۇكتەمە جاعدايىندا جۇرگىزىلدى, – دەدى يبراگيم كۇلشىمباەۆ.
قازاقستان تجم توبىنا گازيانتەپ قالاسىنىڭ يبراحيميلي اۋدانىنداعى ەكى نىسان (تولىعىمەن قيراعان ەكى توعىز قاباتتى ءۇي, جەتى قاباتتى ءۇي, جارتىلاي قيراعان التى قاباتتى ءۇي), نۇرداعى قالاسىنداعى (تولىعىمەن قيراعان التى قاباتتى ءۇي), حاتاي قالاسىندا (تولىعىمەن قيراعان التى قاباتتى ءۇي) بەكىتىلگەن. قۇتقارۋشىلارعا تۇركيا رەسپۋبليكاسىنىڭ جوعارى وقۋ ورىندارىندا وقيتىن قازاق ستۋدەنتتەرى كومەكتەسكەن. ولار ۆولونتەر-اۋدارماشى رەتىندە قىزمەت اتقارعان. ال قازاقستاننان بارعان دارىگەرلەر زارداپ شەككەن تۇرعىندارعا تاۋلىك بويى بىلىكتى مەديتسينالىق جانە پسيحولوگيالىق كومەك كورسەتكەن.
– جۇمىس كەزەڭىندە 200-دەن استام جەرگىلىكتى تۇرعىن مەن قۇتقارۋشىعا, ونىڭ ىشىندە 30-عا جۋىق بالاعا مەديتسينالىق كومەك كورسەتىلدى. تۇركيادا جويقىن جەر سىلكىنىسىنىڭ سالدارىن جويۋ بويىنشا جۇمىس ىستەگەن 10 دارىگەردىڭ ۇشەۋى – ايەل, – دەدى ۆيتسە-مينيستر.
قۇتقارۋ جۇمىستارى كەزىندەگى كينولوگيالىق توپتىڭ ءجونى ءبىر بولەك. يبراگيم كۇلشىمباەۆتىڭ ايتۋىنشا, ولار وزدەرىنىڭ جوعارى بىلىكتىلىگىن كورسەتكەن. ورتالىق كوممۋنيكاتسيالار قىزمەتى الاڭىنا كينولوگ-نۇسقاۋشىمەن بىرگە ميرتا اتتى نەمىس وۆچاركاسى كەلدى. ميرتا تۇركيادا ۇيىندىلەر استىندا قالعان 3 ادامدى تاپقان. سونداي-اق بەلگيالىق مالينۋا وۆچاركالارى دجەيكوب, ليگا م سيريۋس جانە اكسەل, لابرادور چارلي كينگ, گرينپيس ەسىمدى بوردەر كوللي, كينولوگ-نۇسقاۋشىلارمەن جانە قۇتقارۋشى جاساقتارمەن بىرگە بىرنەشە كۇن بويى قيراعان نىسانداردا جۇمىس ىستەپ, ءار ادامنىڭ ءومىرى ءۇشىن كۇرەسكەن. وسىلايشا, تجم-ءنىڭ تۇركيادا جۇرگىزىلگەن ىزدەستىرۋ-قۇتقارۋ جۇمىستارى بارىسىندا العا قويىلعان مىندەتتەرى تولىق كولەمدە ورىندالعان.
پرەزيدەنت تاپسىرماسىمەن تۇركيادا بولعان جويقىن جەر سىلكىنىسىنىڭ سالدارىن جويۋعا كومەكتەسۋ ءۇشىن تجم استانا, الماتى قالالارى مەن اقمولا, قاراعاندى وبلىستارىنىڭ قۇتقارۋشىلارى تارتىلعان. سونداي-اق تابيعي اپات ايماعىنا 55 توننا كولەمىندە گۋمانيتارلىق كومەك جەتكىزىلدى. تجم اتىنان ارداگەرلەر كەڭەسىنىڭ مۇرىندىق بولۋىمەن زارداپ شەككەندەرگە كومەك كورسەتۋ ءۇشىن 10 كيىزۇي جىبەرىلگەن.
– تۇركيا رەسپۋبليكاسىنىڭ AFAD جەر سىلكىنىسى سالدارىن جويۋ داعدارىس ورتالىعى جانە قازاقستاننىڭ تۇركيا رەسپۋبليكاسىنداعى ەلشىلىگىمەن كەلىسىم بويىنشا 17 اقپاندا بارلىق نىسانداردا تجم كۇشتەرىمەن ىزدەستىرۋ-قۇتقارۋ جۇمىستارى اياقتالدى, – دەپ مالىمدەدى يبراگيم كۇلشىمباەۆ.
باۋىرلاس ەلگە كومەك كورسەتىپ, ەرلىك تانىتقان قۇتقارۋشىلار ماراپاتتالىپ, تجم اتىنان قارجىلاي سىياقى بەرىلەدى.