تاتارستان كورەرمەنىن ءتانتى ەتتى

اتاۋلى كۇنگە وراي 30 قاڭتار مەن 28 اقپان ارالىعىندا مادەنيەت پەن مۋزىكاداعى اسا ءىرى ونەر وشاق­تارىنىڭ بىرىنەن سانالاتىن مۇسا جالەل اتىنداعى تاتار اكادەميالىق وپەرا جانە بالەت تەاترىندا XVI حا­لىقارالىق وپەرا فەستيۆالى ءوتىپ جاتىر. الەمدىك دەڭگەيدەگى ونەر دوداسىنا اباي اتىنداعى قازاق ۇلتتىق وپەرا جانە بالەت تەاترىنىڭ ءسوليسى ەميل ساكاۆوۆ قاتىسىپ, شەت جۇرتتىڭ كو­رەر­مەنىن شەبەرلىگىمەن ءتانتى ەتتى. حا­لىقارالىق شالياپين فەستيۆالى يتاليالىق رەجيسسەر دجۋزەپپە ءمو­راسسيدىڭ ساحنالاۋىنداعى دج. ءروس­سينيدىڭ «سەۆيل شاشتارازى» وپەراسىمەن اشىلدى. ەميل ساكاۆوۆ فەستيۆالدىڭ اشىلۋ سالتاناتىن­دا العاشقىلاردىڭ ءبىرى بولىپ «فيگارو» پارتياسىن ورىنداپ, ەرەكشە مانەردەگى شىنايى تالانتىمەن تا­تارستان كورەرمەندەرىن باۋراپ الدى. قازاقستان وپەرا ونەرىنىڭ مايتالمانى تاتار ەلىنىڭ تالعامپاز تىڭداۋشىسىنىڭ ىقىلاسىنا بو­لەنىپ, ناعىز بابىنداعى ءارى شەبەر­لىك شىڭىنداعى اسقاق ونەر يەسى ەكەنىن دالەلدەپ, قۇشاعى دەستە-دەس­تە گۇلگە تولسا, ونىڭ سىرتىندا, قا­زاق وپەرا ونەرى ساڭلاعىنىڭ ساح­نالىق ونەرىن سارالاعان تاتار ءباس­پاسوزى, ونەرتانۋشىلار مەن مۋ­زى­كالىق سىنشىلاردىڭ بيىك باعا­سىنا يە بولدى دەپ حابارلايدى تاتار وپەرا جانە بالەت تەاترىنىڭ ءباسپاسوز قىزمەتى. جالەل فەستيۆالىن دۇبىرلەتكەن ەميلدىڭ الەۋمەتتىك جەلىدەگى پاراقشالارى قۇتتىقتاۋلار مەن جىلى پىكىرگە تولى, جەلى جازى­لۋشىلارىنىڭ دەنى دارىندى ءانشى شەبەرلىگىنىڭ ءتۇپ-توركىنىندەگى ىزدەنىس پەن تاجىريبەنى اتاپ وتكەن.

الماتى