اۋىل شارۋاشىلىعى ءمينيسترى ەربول قاراشوكەەۆ جەتىسۋ وبلىسىندا بىرقاتار ءىرى ءوندىرىس ورنىنىڭ جۇمىسىمەن تانىستى.
مينيستر ايدارلى اۋىلدىق وكرۋگىنە قاراستى «Sky Agro» جشس-نىڭ قىزاناق وسىرەتىن جىلىجايىنا باردى. مۇنداعى جۇمىس بارىسىمەن سەرىكتەستىك ديرەكتورى يلماز كەمال تانىستىردى. جىلىجاي 2016 جىلدان بەرى حالىققا قىزمەت كورسەتىپ كەلەدى. ونىڭ جالپى جوبالىق قۇنى 7,2 ميلليارد تەڭگەنى قۇرايدى. نەگىزىنەن تومات ءونىمىن شىعاراتىن كاسىپورىن جىلىنا 750 توننا قىزاناق ءوندىرىپ ساتادى. سەرىكتەستىك الماتى قالاسىنىڭ الماتى, جەتىسۋ وبلىستارىنىڭ تۇرعىندارىن جىل بويى قىزاناقپەن قامتاماسىز ەتەدى.
ودان كەيىن مينيستر «كوكتال اگرو» جشس تاۋارلى-ءسۇت فەرماسىنىڭ جۇمىسىمەن تانىستى. مىڭ گەكتاردان استام جەرگە جۇگەرى, كوپجىلدىق ءشوپ وسىرەتىن شارۋاشىلىقتىڭ جەمشوپ بازاسى مىعىم. سوندىقتان سەرىكتەستىك 2,5 ملرد تەڭگەگە مىڭ باستان استام ساۋىن سيىر ۇستاي الاتىن كەشەندى قورا سالىپ, 2019 جىلى تاۋارلى-ءسۇت فەرماسىن ىسكە قوستى. سەرىكتەستىك مالىن جىل بويعى جەمشوپپەن وزدەرى قامتاماسىز ەتىپ وتىر. مينيسترگە فەرماداعى ىلكىمدى ىستەردى جشس جەتەكشىسى جانىبەك وقانوۆ كورسەتىپ, سەرىكتەستىك جۇمىسىنىڭ ءمان-جايىن ايتىپ بەردى.
جاركەنت قالاسىندا پوليپروپيلەننەن جىلىنا 48 ميلليون قاپ شىعاراتىن زاۋىت قۇرىلىسى 2012 جىلى پايدالانۋعا بەرىلگەن. زاۋىتتىڭ جۇمىس ىستەۋ جۇيەسى بىرنەشە تسەحتان تۇرادى. مۇندا باستاپقىدا مۇناي قالدىعىنان الىناتىن 21030-16 ماركالى پوليپروپيلەننەن قىزدىرىپ ەرىتۋ ارقىلى ءجىپ يىرىلەدى. كەلەسى كەزەكتە ول ءجىپ توقىلىپ, جالپاق ماتەريالعا اينالىپ, ودان سۇرانىسقا قاراي سىيىمدىلىعى 25-تەن باستاپ, 150 كيلولىق قاپتار تىگىلەدى. قازىر زاۋىتتا 552 ادام اۋىسىمدىق جۇيەمەن جۇمىس ىستەپ كەلەدى.
«زاۋىت ونىمدەرىنە سۇرانىس جوعارى. ساپالى تىگىلگەن قاپتارعا وتاندىق تاۋار وندىرۋشىلەرمەن قاتار رەسەي, ۋكراينا, بالتىق جاعالاۋى ەلدەرى تاپسىرىس بەرەدى», دەيدى مينيسترگە زاۋىت تىرشىلىگىن تانىستىرعان جشس ديرەكتورى زاكير كۋزيەۆ.
شاھارداعى 2013 جىلدان بەرى جۇگەرى ءدانىن وڭدەيتىن «جاركەنت كراحمال-سىرنە» زاۋىتى – بۇگىنگى تاڭدا قاناتىن كەڭگە جايعان ءىرى ونەركاسىپ ورىندارىنىڭ ءبىرى. مۇندا 292 ادام تۇراقتى ەڭبەك ورنىن تاپقان. زاۋىت ءونىمنىڭ ساپاسىن باقىلايتىن ءوز زەرتحاناسى بار.
بيىل پانفيلوۆ اۋدانىنىڭ جۇگەرىشىلەرى جالپى 26 مىڭ گەكتاردان استام جەرگە جۇگەرى ەگىپ, 160 مىڭ توننادان جوعارى ءونىم العان. وتكەن جىلمەن سالىستىرعاندا بيىل ءونىم 20 مىڭ تونناعا ارتىق. سونىڭ 100 مىڭ توننادان استامىن «جاركەنت كراحمال-سىرنە» زاۋىتى ساتىپ الىپ, ۇقساتۋدا. «جاركەنت كراحمال-سىرنە» زاۋىتىنىڭ جۇگەرى دانىنەن وڭدەگەن ونىمدەرىن ەلىمىزدەگى «راحات», «ترەيدينگ قاعازى», «حاملە», «ىلە كارتون-قاعاز كومبيناتى», «جامبىل گيپس», «رۋدسترويسەرۆيس», «قازۋپاك», احبك كومپانيالارى ساتىپ الادى. زاۋىت ونىمىنە شەتەلدەردەن دە تاپسىرىستار بار.
اۋىل شارۋاشىلىعى ءمينيسترى وڭىردەگى ءوندىرىس ورىندارىن ارالاۋمەن قاتار ساپار بارىسىندا «ۋنيۆەرسال» جشس جيىنجايىندا اۋىلشارۋاشىلىق ەڭبەككەرلەرىمەن كەزدەسىپ, اكتيۆ جيىنىن وتكىزدى. باسقوسۋدا مينيستر ەلىمىزدەگى اگروونەركاسىپ ءوندىرىسىنىڭ جاڭالىقتارىن جەتكىزدى. سونىمەن قاتار جەتىسۋ وبلىسى ەڭبەككەرلەرىنىڭ وتكەن جىلعى وندىرىستەگى جەتىستىكتەرى سارالاندى. بيىل اتقارىلاتىن جۇمىس جوسپارلارى تالقىلاندى.
كەزدەسۋدەن كەيىن جەكە ماسەلەلەرى بويىنشا اۋدان تۇرعىندارىن قابىلداعان مينيستر ۇسىنىس-وتىنىشتەردى ۇكىمەت وتىرىسىندا تالداپ, شەشىم قابىلدايتىنىن مالىمدەدى.
جەتىسۋ وبلىسى