قازاقستان رەسپۋبليكاسى پرەزيدەنتىنىڭ جانىنداعى مەملەكەتتىك باسقارۋ اكادەمياسىندا اكادەميا رەكتورى ب.س.ءابدىراسىلوۆتىڭ ءتوراعالىعىمەن عىلىمي-ادىستەمەلىك كەڭەس وتىرىسى ءوتتى.
ماقساتى – قازاقستان رەسپۋبليكاسىنداعى تىلدەردى دامىتۋدىڭ 2011-2020 جىلدارعا ارنالعان مەملەكەتتىك باعدارلاماسى شەڭبەرىندە مەملەكەتتىك قىزمەتشىلەرگە تىلدىك ءبىلىم بەرۋدىڭ وزەكتى ماسەلەلەرىن تالقىلاۋ. كەڭەس جۇمىسىنا پارلامەنت دەپۋتاتتارى, پرەزيدەنت اكىمشىلىگى مەن ورتالىق مەملەكەتتىك باسقارۋ ورگاندارىنىڭ تىلگە جاۋاپتى قىزمەتكەرلەرى قاتىستى.
عىلىمي كەڭەستە مەملەكەتتىك قىزمەتتەگى تىلدىك بىلىكتىلىككە قاتىستى مىناداي ماسەلەلەر تالقىلاندى: مەملەكەتتىك قىزمەتشىلەردىڭ تىلدىك قۇزىرەتتىلىگىن ارتتىراتىن ءتىل ورتالىقتارىنىڭ ءادىسناماسى, قازتەست جۇيەسى بويىنشا تىلدىك ءبىلىمدى باعالاۋ ماسەلەلەرى. سونىمەن قاتار, اكادەميانىڭ مەملەكەتتىك قىزمەتشىلەردى وقىتۋ بويىنشا جيناقتاعان ءتاجىريبەسى, وقىتۋ تەحنولوگيالارى, مونيتورينگتىك ناتيجەلەرى باياندالدى.
ورتالىق مەملەكەتتىك باسقارۋ ورگاندارىنداعى تىلدىك ماسەلەلەر بويىنشا جاسالعان باياندامالار مەملەكەتتىك ءتىل قولدانىسىنىڭ اعىمداعى جاعدايى مەن پروبلەمالارىن تالقىلاۋعا شىعاردى, نەگىزگى پروبلەمالار زەردەلەنىپ, ورتاق ۇسىنىمدار بەرىلدى.
عىلىمي كەڭەستىڭ نەگىزگى ۇسىنىمدارى: مەملەكەتتىك قىزمەتشىلەردىڭ تىلدىك قۇزىرەتتىلىگىن بىلىكتىلىكتى ارتتىرۋ سەمينارلارى ارقىلى كوتەرۋ, سەمينار تاقىرىپتارى مەملەكەتتىك قىزمەت قاجەتتىلىگىن قامتاماسىز ەتۋى ءتيىس, ماسەلەن, رەسمي تاقىرىپتاردا كوپشىلىك الدىندا ءسويلەۋدى, وزەكتى ماسەلەلەر بويىنشا رەسمي ستيلدە جازۋدى, نورماتيۆتىك-قۇقىقتىق اكتىلەرمەن جۇمىس ىستەۋدى, ىلەسپە اۋدارما جاساۋدى يگەرتۋ.
سونداي-اق, قازاق تىلىندە زاڭ ءماتىنىن قۇراستىرۋ تۋرالى پىكىرلەر ورتاعا سالىنىپ, مەملەكەتتىك قىزمەت بارىسىندا ءجيى قولدانىلاتىن تەرميندەردىڭ سالالىق سوزدىكتەرىن جاساۋدىڭ وزەكتىلىگى ناقتىلانىپ, عىلىمي كەڭەستىڭ توراعاسى تاراپىنان قولداۋ تاپتى. عىلىمي كەڭەستىڭ نەگىزگى ۇسىنىمدارى پرەزيدەنت اكىمشىلىگىنە, مەملەكەتتىك ورتالىق ورگاندارعا, مەملەكەتتىك ءتىلدى وقىتۋ ورتالىقتارىنا جولدانادى.
«ەگەمەن-اقپارات».