مەملەكەت باسشىسى قاسىم-جومارت توقاەۆ اقمولا وبلىسىنا جۇمىس ساپارى بارىسىندا ستەپنوگورسك قالاسىنداعى مامانداندىرىلعان بالالار مەن جاسوسپىرىمدەر سپورت مەكتەبىنە باردى, دەپ حابارلايدى Egemen.kz اقوردانىڭ ءباسپاسوز قىزمەتىنە سىلتەمە جاساپ.
سپورت مەكتەبىندە بوكس, ەركىن كۇرەس, اۋىر اتلەتيكا, دزيۋدو, كوركەم گيمناستيكا, فۋتبول, شاڭعى جارىسى جانە سامبو سەكتسيالارى بويىنشا 1140 بالا سپورتپەن شۇعىلدانادى. ساباقتى 30 جاتتىقتىرۋشى-وقىتۋشى جۇرگىزەدى.
پرەزيدەنتكە بالالار مەن جاسوسپىرىمدەرگە ارنالعان سپورت مەكتەبى تاربيەلەنۋشىلەرىنىڭ وقۋ-جاتتىعۋ ساباقتارىن وتكىزەتىن اۋىر اتلەتيكا زالى مەن ۇلكەن ويىن زالى تانىستىرىلدى.
قاسىم-جومارت توقاەۆ مەكتەپتى ارالاپ كورگەننەن كەيىن ءوڭىردىڭ بەلگىلى سپورتشىلارىمەن جانە جاتتىقتىرۋشىلارىمەن كەزدەستى.
پرەزيدەنت قازاقستاندىق سپورتشىلاردىڭ ونەرىن ءاردايىم تاماشالايتىنىن جانە قولدايتىنىن اتاپ ءوتتى. سونداي-اق ءىرى جارىستارداعى جوعارى جەتىستىكتەرى ءۇشىن سپورتشىلارعا العىس ايتىپ, ەلىمىزدىڭ شەتەلدەگى ءيميدجىن ارتتىرۋعا قوسقان ولاردىڭ ۇلەسىنە توقتالدى.
شارا سوڭىندا مەملەكەت باسشىسى لەيك-پلەسيدتە (اقش) وتكەن دۇنيەجۇزىلىك قىسقى ۋنيۆەرسيادا چەمپيونى بياتلونيست بەكەنتاي تۇرلىبەكوۆكە العىس حاتىن تابىس ەتتى.