جۇرتشىلىق جولداردا جۇرگىزىلىپ جاتقان جوندەۋ جۇمىستارىنا قاناعاتتانباي وتىر - سمايىلوۆ

وتىرىستى اشا وتىرىپ, ۇكىمەت باسشىسى 2030 جىلعا دەيىن 8 مىڭ شاقىرىم رەسپۋبليكالىق جانە 14 مىڭ شاقىرىم جەرگىلىكتى اۆتوجولداردى ساپالى سالۋ مەن رەكونسترۋكتسيالاۋ مىندەتى قويىلعانىن اتاپ ءوتتى.

جۇرگىزىلىپ جاتقان جۇمىستار مەن جوسپارلار تۋرالى يندۋستريا جانە ينفراقۇرىلىمدىق دامۋ ءمينيسترى مارات قاراباەۆ باياندادى.

ونىڭ ايتۋىنشا, بيىل 11 مىڭ شاقىرىم اۆتوموبيل جولدارى, ونىڭ ىشىندە 7 مىڭ شاقىرىم رەسپۋبليكالىق جەلى جوندەۋ جۇمىستارىمەن قامتىلادى. بۇگىنگى تاڭدا 70 مىڭ شاقىرىم جەرگىلىكتى جەلىنىڭ 85%-ى – نورماتيۆتىك جاعدايدا. جامبىل (97%), ماڭعىستاۋ (96%) جانە پاۆلودار (91%) وبلىستارىندا جەرگىلىكتى جولداردىڭ جاي-كۇيى جاقسى, 3 وڭىردە كورسەتكىشتەر ورتاشادان تومەن: باتىس قازاقستان (46%), اقتوبە (72%) جانە اتىراۋ (72%) وبلىستارىندا.

بۇدان باسقا, مينيسترلىك 2024-2030 جىلدارى حالىقارالىق قارجى ينستيتۋتتارىنىڭ قاراجاتىن تارتا وتىرىپ, جالپى ۇزىندىعى 4,4 مىڭ شاقىرىم بولاتىن جاڭا جول جوبالارىن ىسكە اسىرۋدى پىسىقتاپ جاتىر. اتاپ ايتقاندا, «جەزكازعان – قاراگاندى» – 513 كم, «استانا – كوستاناي – رف شەكاراسى» – 830 كم, «بەينەۋ – شالقار» – 515 كم, «اتىراۋ – دوسسور» – 86 كم, «قىزىلوردا – اقتوبە» – 1 101 كم, «اكتوبە – ورال» – 628 كم.

وتىرىستا «قازاۆتوجول» كومپانياسىنىڭ باسقارما توراعاسى مەيىرحات قاسىمباەۆ پەن بىرقاتار ءوڭىر اكىمدەرى ءسوز سويلەدى.

پرەمەر-مينيستر جولداردىڭ جاي-كۇيى مەن كولىك ينفراقۇرىلىمى ىشكى جانە سىرتقى ساۋدانى دامىتۋدىڭ ماڭىزدى فاكتورلارى ەكەنىن اتاپ ءوتتى.

الايدا, ۇكىمەت باسشىسىنىڭ ايتۋىنشا, سوڭعى ۋاقىتتا اۆتوموبيل جولدارىنىڭ ساپاسىنا قاتىستى شاعىمدار كوپ. جولدىڭ ناشارلىعى جول اپاتىنا سەبەپشى بولىپ, ادامداردىڭ ولىمىنە اكەلەدى, ترانزيتتىك تاسىمال كولەمىن ازايتادى, سونىمەن قاتار ەلدىڭ يميدجىنە تەرىس اسەر ەتەدى.

«جۇرگىزىلىپ جاتقان جوندەۋ جۇمىستارىنا جۇرتشىلىق قاناعاتتانباي وتىر. ينتەرنەتتە جۇمىستىڭ رەگلامەنت بويىنشا ەمەس, جاڭبىر, ءتىپتى قار جاۋىپ جاتقان كەزدە جۇرگىزىلىپ جاتقانى تۇسىرىلگەن كوپتەگەن بەينەروليك پەن فوتوسۋرەتتەر تولىپ ءجۇر»,  دەدى ءاليحان سمايىلوۆ.

مىسال رەتىندە ۇكىمەت باسشىسى اباي وبلىسى كوكتەرەك اۋىلىندا قاردىڭ ۇستىنە اسفالت توسەلگەنىن, ال پاۆلودار وبلىسىندا اسفالتتى جولعا شاشىپ تاستاعانىن ايتتى. كەيبىر وڭىرلەردە اۋىل تۇرعىندارى جەرگىلىكتى اتقارۋشى ورگانداردان قايىر كۇتپەي, جولداردى ءوز بەتىنشە جوندەيتىن جاعدايلار كەزدەسەدى. الماتى وبلىسى رىسقۇلوۆ اۋىلىندا, ماڭعىستاۋ وبلىسى اتامەكەن اۋىلىندا وسىنداي جاعدايلار ورىن الدى. سونىمەن قاتار ءبىر ۋچاسكەدە جىل سايىن جوندەۋ جۇمىستارى جۇرگىزىلگەن فاكتىلەر بار.

ءاليحان سمايىلوۆ جول سالۋ ادىستەرىن تۇبەگەيلى وزگەرتۋدى تالاپ ەتتى.

وڭىرلەردىڭ اكىمدىكتەرىنە جەرگىلىكتى اۆتوجولدار جەلىسىن سالۋ جانە جوندەۋ بويىنشا ساپالى جۇمىس جۇرگىزۋ تاپسىرىلدى. قۇرىلىس ماۋسىمىن بىردەن باستاۋ ءۇشىن مەملەكەتتىك ساتىپ الۋ مەن قۇرىلىس ماتەريالدارىن ساتىپ الۋدىڭ بارلىق راسىمدەرىن جاقىن ارادا تەزدەتىپ اياقتاۋ كەرەك.

سونىمەن قاتار پرەمەر-مينيستر وسى جىلدىڭ سوڭىنا دەيىن «مەركە-بۋرىلبايتال», «اقتوبە-اتىراۋ-استراحان», «الماتى-وسكەمەن», «ونەگە-بەيسەن», «كازتالوۆكا-جانىبەك», ء«ۇشارال-دوستىق» سياقتى ماڭىزدى اۆتوجول جوبالارىنىڭ اياقتالۋىن قامتاماسىز ەتۋدى تاپسىردى.