بەرليندە قازاقستاننىڭ گەرمانياداعى ەلشىلىگىنىڭ ۇيىمداستىرۋىمەن جانە گەرمانيا ەكونوميكاسى شىعىس كوميتەتىنىڭ قولداۋىمەن نەمىس ەكونوميكاسى مەن ىسكەر توپتارىنىڭ 100-دەن استام وكىلدەرى ءۇشىن «قازاتومونەركاسىپ» ۇاك» اق-تىڭ قىزمەتى جانە ينۆەستيتسيالىق الەۋەتىمەن تانىستىرۋ ءراسىمى ءوتتى.
قازاقستاننىڭ گەرمانياداعى ەلشىسى نۇرلان ونجانوۆ ءوزىنىڭ كىرىسپە سوزىندە سوڭعى جىلدارداعى ەكى ەل اراسىنداعى تىعىز ساياسي جانە ەكونوميكالىق بايلانىستاردىڭ ارقاسىندا ەكىجاقتى ساۋدا-ەكونوميكالىق ىنتىماقتاستىقتىڭ «شيكىزاتتى جاڭا تەحنولوگيالار, يننوۆاتسيا جانە ينۆەستيتسياعا ايىرباستاۋ» اتتى جاڭا فورمۋلاسىن ىسكە اسىرۋعا بارىنشا جاقسى جاعداي جاسالعانىن اتاپ ءوتتى. بۇل تۋرالى كەلىسىمگە 2012 جىلعى اقپاندا ەلباسى نۇرسۇلتان نازارباەۆتىڭ بەرلينگە ساپارى بارىسىندا قول جەتكىزىلدى.
ءوز كەزەگىندە «قازاتومونەركاسىپ» ۇاك» اق باسقارما توراعاسى ۆلاديمير شكولنيك سوڭعى كەزدە ەكى جاق تا شيكىزات, ونەركاسىپ جانە تەحنولوگيا سالالارىنداعى ارىپتەستىك تۋرالى قازاقستاندىق-گەرمانيا ۇكىمەتارالىق كەلىسىمىن ىسكە اسىرۋ ماقساتىندا ۇلكەن جۇمىس اتقارعاندىعىن اتاپ ءوتتى. وسى ورايدا, ول نەمىس كاسىپكەرلەرىن قازاقستاندىق ۇلتتىق كومپانيالارمەن ناتيجەلى قاتىناستار ورناتۋ ءۇشىن سيرەك كەزدەسەتىن مەتالل مەن بالاما قۋات كوزىن ءوندىرۋ مەن وڭدەۋ سالالارىنداعى بىرقاتار باسىم ينۆەستيتسيالىق جوبالاردى قازاقستاندا ىسكە اسىرۋ ماقساتىندا بەرىلىپ وتىرعان مۇمكىندىكتى بەلسەندى پايدالانۋعا شاقىردى.
گەرمانيا ەكونوميكاسى شىعىس كوميتەتىنىڭ اتقارۋشى ديرەكتورى راينەر ليندنەر ءوز سوزىندە نەمىس كاسىپكەرلەرى مەن ىسكەر توپتارى قازاقستاننىڭ ۇلكەن ەكونوميكالىق الەۋەتى مەن ەلدەگى قولايلى ينۆەستيتسيالىق احۋال تۋرالى, سونداي-اق, وڭتايلى جۇمىس جاعدايىن ودان ءارى دە جاقسارتۋ ماقساتىندا قازاقستان باسشىلىعىنىڭ جۇمساپ وتىرعان كۇش-جىگەرى تۋرالى جاقسى بىلەتىنىن جەتكىزدى. وسى ورايدا, نەمىس ساياساتكەرىنىڭ ايتۋىنشا, ول قازاقستان ەكونوميكاسىنىڭ باسىم سالالارىنداعى بىرلەسكەن جوبالاردى جۇزەگە اسىرۋ تۋرالى جاڭا كوپتەگەن كەلىسىمدەرگە قول جەتكىزىلەتىنىنەن ءۇمىتتى.
ىسكەرلىك بايلانىستاردى رەتتەۋ ماقساتىندا تانىستىرۋ ءراسىمىنىڭ سوڭىندا ەكى ەل كاسىپكەرلەرىنىڭ قاتىسۋىمەن كووپەراتسيالىق بيرجا, ۆ2ۆ پىشىنىندەگى كەزدەسۋلەر جانە «قازاتومونەركاسىپ» ۇاك» اق باسشىسى ۆ.شكولنيكتىڭ Bosch, Sms Siemag, Tropag, Rem, Cac Chemieanlagenbau Chemnitz, Blücher, Gwe, Evonik, Alphacon, Bae, Alstom جانە ت.ب. جەتەكشى نەمىس كومپانيالارىنىڭ باسشىلارىمەن, سونداي-اق, الەۋەتتى نەمىس ينۆەستورلارىمەن ەكىجاقتى كەزدەسۋلەرى ءوتتى.
«ەگەمەن-اقپارات».