بەس ايماقتاعى پرەزيدەنت رەزيدەنتسيالارى بالالار يگىلىگىنە بەرىلمەك. مەملەكەت باسشىسى قاسىم-جومارت توقاەۆ قوستاناي, اقتوبە, اتىراۋ, اقتاۋ, تاراز قالالارىنداعى «پرەزيدەنت ۇيلەرىن» مەكتەپ, بالاباقشا نەمەسە ساۋىقتىرۋ لاگەرلەرىنە اينالدىرۋدى تاپسىردى. ال عيماراتتاردىڭ ناقتى قانداي ماقساتتا قولدانىسقا بەرىلەتىنىن ەندى وبلىس اكىمدىكتەرى انىقتاپ, جۇزەگە اسىرماق.
ەلىمىزدىڭ بىرقاتار وڭىرىندە مەملەكەت باسشىسىنىڭ رەزيدەنتسياسى بار. ولاردىڭ باسىم بولىگى وبلىس ورتالىقتارىنىڭ ماڭىندا ورنالاسقان. وسى ورايدا «Amanat» پارتياسى جانىنداعى وتباسى جانە حالىقتى الەۋمەتتىك قورعاۋ ماسەلەلەرى جونىندەگى رەسپۋبليكالىق قوعامدىق كەڭەس توراعاسى دينارا زاكيەۆا جەرگىلىكتى اكىمدىكتەرگە قۇلاققاعىس جاساپ, ۇسىنىسىن ءبىلدىردى.
– بۇل – وتە جاقسى جاڭالىق. پرەزيدەنت تاپسىرماسى بويىنشا بۇگىندە بالالارعا ارنالعان كوپتەگەن جوبا ىسكە اسىرىلىپ جاتىر, اتاپ ايتقاندا, وقۋشىلار سارايلارىن سالۋ, كەمىندە جيىرماعا جۋىق وڭالتۋ ورتالىقتارىن, اۋتيزم ورتالىقتارىن اشۋ. سونىمەن قاتار بوس ينفراقۇرىلىمداردى قاجەت ەتەتىن باعىتتار دا بار. بالاباقشالاردىڭ قاجەت ەكەنى دە ءسوزسىز. بۇقارالىق اقپارات قۇرالدارىنىڭ مالىمەتىنشە, رەزيدەنتسيالار قالادان الىستاۋ جەردە ورنالاسقان, جاسىل جەلەكتەرمەن قورشالعان. مىسالى, اقتوبە قالاسىنداعى رەزيدەنتسيا قارعالى وزەنىنىڭ جاعاسىندا, ال اقتاۋدا كاسپي جاعالاۋىندا ورنالاسقان. سوندىقتان ءبىز وڭىرلەرگە بۇل عيماراتتاردى ەرەكشە قاجەتتىلىگى بار بالالارعا, ونىڭ ىشىندە مەنتالدى ەرەكشەلىگى بار بالالارعا ارنالعان ساناتوريلەرگە بەيىمدەپ, پايدالانۋدى ۇسىنامىز. ءبىز ەرەكشە بالالاردىڭ انالارىمەن بىرلەسىپ, ەڭبەك جانە حالىقتى الەۋمەتتىك قورعاۋ مينيسترلىگىنە ارنالعان ۇسىنىستارىمىزدى پىسىقتاعان كەزدە, ولار مەنتالدىق دامۋ ەرەكشەلىگى بار بالالارعا ساناتوري-كۋرورتتىق ەم الۋ مۇمكىندىگى قاراستىرىلماعانى تۋرالى ماسەلەنى كوتەردى. ال مينيسترلىك بولسا, قولدانىستاعى ساناتوريلەردىڭ اتالعان ەرەكشەلىگى بار بالالارعا جارامسىز ەكەنىن ايتتى, – دەدى كەڭەس توراعاسى.
ستاتيستيكالىق مالىمەت بويىنشا, قازىر ەلىمىزدە ەرەكشە قاجەتتىلىكتەرى بار 104 مىڭ بالا بار, ونىڭ 19 مىڭى – مەنتالدى دامۋ ەرەكشەلىكتەرى بار بالا. بۇل بالالاردىڭ اتا-انالارى, ادەتتە, انالار, ولاردى تاۋلىك بويى سۇيەمەلدەۋ مەن كۇتىممەن قامتاماسىز ەتۋگە ءماجبۇر.
– جالپى, بۇل ساناتتاعى بالالار مەن ولاردىڭ اتا-انالارىن قولداۋ بويىنشا شەشۋدى قاجەت ەتىپ تۇرعان ءبىراز ماسەلە بار. ساناتوريلەر ولاردى قولداۋدىڭ ءبىرى بولار ەدى. وسى ورايدا بۇل عيماراتتاردا ساناتوريلەردى بارلىق ساناتتاعى ەرەكشە قاجەتتىلىكتەرى بار بالالارعا بەيىمدەپ, اشۋ كەرەك. سەبەبى ساناتوريلەردە بىلىكتى مەديتسينالىق جانە پەداگوگيكالىق كومەك الۋمەن بىرگە دەمالۋ دا قاراستىرىلادى. بالاعا دا, ونىڭ اتا-اناسىنا دا كۇندەلىكتى كۇيبەڭ تىرشىلىكتى از ۋاقىتقا بولسا دا ۇمىتىپ, ەموتسيونالدى تۇردە دەمالۋعا سەپتىگىن تيگىزەرى انىق. جاڭا قورشاعان ورتا, ادەمى كورىنىس, تابيعات – بۇل بالالاردىڭ الەۋمەتتەنۋىنە پايدالى, ولاردىڭ دامۋىنا وڭ اسەر ەتەدى, – دەدى «Amanat» پارتياسى جانىنداعى وتباسى جانە حالىقتى الەۋمەتتىك قورعاۋ ماسەلەلەرى جونىندەگى رەسپۋبليكالىق قوعامدىق كەڭەس توراعاسى دينارا زاكيەۆا.
اقتاۋ: بالا قۋانىشىنىڭ باستاۋى
اقتاۋ قالاسىنداعى «پرەزيدەنت رەزيدەنتسياسى» 15-شاعىن اۋدانى تۇستاعى تەڭىز جاعالاۋىنا جاقىن ورنالاسقان. مەملەكەت باسشىسىنىڭ بىرقاتار وڭىرلەردەگى رەزيدەنتسيالاردى بالالار قاجەتتىلىگى ءۇشىن پايدالانۋ جونىندەگى تاپسىرماسىن باسقا ءوڭىر تۇرعىندارىنداي ماڭعىستاۋلىقتار دا قۋانا قابىلدادى. قولدا بار دەرەكتەرگە سۇيەنسەك, تەڭىز جاعاسىنداعى 225,94 گا جەر 2007 جىلى 12 جەلتوقساندا №136 ساتىپ الۋ-ساتۋ شارتى نەگىزىندە ۆيللا سالۋ ءۇشىن «Oil Real Estate» جشس جەكەمەنشىگىنە وتكەن. ال ۇكىمەتتىڭ 2012 جىلعى قاۋلىسىمەن بەكىتىلىگەن باس جوسپار بويىنشا ول جەرلەر دەمالىس ايماعى اينالعان. ياعني «رەاكراتسيوندى ايماق». ۆيللا شامامەن 9-10 گا جەرگە سالىنعان جانە ون بەس جىلدان بەرى اۋماق تۇتاستاي تاس قورشاۋمەن قورشالعان.
– بۇعان دەيىن وزەكتى ءۇش ماسەلەنى كوتەرگەن ەدىم. ءبىرىنشىسى – پرەزيدەنت رەزيدەنتسيالارى ءۇشىن جەكەمەنشىككە ءوتىپ كەتكەن جەرلەردى مەملەكەتكە قايتارۋ بولسا, ەكىنشىسى كونستيتۋتسيا مەن زاڭ ماتىندەرىندەگى قاتەلەردى تۇزەتۋ, ال ءۇشىنشىسى – ەرىكتى قونىس اۋدارۋ باعدارلاماسى بويىنشا قوستاناي وبلىسىنا كوشۋگە ىنتالى ماڭعىستاۋلىقتار ءۇشىن جاڭا قونىسقا گاز تارتۋ ماسەلەسى. مەملەكەت باسشىسىنىڭ شەشىمى حالىق ءۇشىن قۋانىشتى جاڭالىق بولدى, – دەيدى جاس عالىم باقتىباي جايلاۋ.
اقتاۋدا اۋىر دەرتكە شالدىققان بالالاردى ەمدەۋمەن اينالىساتىن ارنايى ورتالىق جوق. ناۋقاس بالالارىن استانا قالاسىنداعى «انا مەن بالا» ورتالىعىنا نەمەسە الماتىداعى «اقساي» ەمدەۋ ورنىنا تاسىمالداۋ – اتا-انا ءۇشىن وڭاي ەمەس جانە بۇل كوپ جىل بويى شەشىمىن تاپپاي جۇرگەن ماسەلە. ارينە, رەزيدەنتسيانى ەندى قانداي ماقساتتا قولداناتىنىن جەرگىلىكتى اكىمدىك انىقتايدى, قانداي بولعاندا دا بۇل بالالار ءۇشىن ۇلكەن جاڭالىق بولعالى تۇر.
اقتوبە: ءۇمىتتى كەزەڭ
اقتوبە قالاسىنداعى پرەزيدەنت رەزيدەنتسياسى قارعالى وزەنىنىڭ بويىندا كۇنشىعىس بەتتە ورنالاسقان. تاريحقا جۇگىنسەك, ءحىح عاسىردىڭ باسىندا قارعالى بويىنداعى قالىڭ توعاي ارىنعازى حاننىڭ رەزيدەنتسياسى بولعان ەكەن. سول زاماندا قارعالى وزەنىنىڭ ارناسى قازىرگىدەن بىرنەشە ەسە تولى, جان-جاعى جايقالعان نۋ ورمان بولعان. بۇل جەردەن اعاش ءۇي سالىپ, جازدا بيە بايلاپ, توعايدىڭ ىشىندە اڭ اۋلاپ, قۇس جۇگىرتكەن ارىنعازى حان 1825 جىلى كالۋگاعا ۇزاق مەرزىمگە جەر اۋدارىلعان سوڭ يەلىك بوس قالعان. اقتوبە-ور تاسجولىنىڭ بويىنان ەكى شاقىرىمداي قاشىقتىقتا ورنالاسقان وسى مەكەنگە اقتوبەگە كەلگەن لاۋازىمدى تۇلعالار ورنالاسادى. ەكىنشى جاعىنان رەزيدەنتسيا وبلىستى باسقارعان اكىمدەردىڭ وتباسى مۇشەلەرىمەن قونىستاناتىن ورنى. قىسى-جازى كۇزەتى كۇشتى مەكەنگە كەزدەيسوق جولاۋشى قوناقتاي المايدى, اۋماعى اتشاپتىرىم رەزيدەنتسيانى كۇتىپ ۇستايتىن – كۇزەتشى, اسپاز, باقشاسىن باپتايتىن بىرنەشە قىزمەت بار.
«پرەزيدەنت تاپسىرماسىن ءبىز شۇعىل تۇردە ورىنداۋعا كىرىسىپ كەتتىك. نەگىزگى سۇراق – قازىرگى كەزدە اقتوبەدە بالالار ءۇشىن ەڭ ءبىرىنشى قانداي مەكەمە قاجەت؟ رەزيدەنتسيانى دەنساۋلىعىندا كىناراتى بار بالالاردى ساۋىقتىرۋ ورتالىعىنا, بالاباقشاعا, بولماسا وقۋشىلارعا ارنالعان جازدىق لاگەرگە اينالدىرۋ كەرەك دەگەن ۇسىنىستاردى ءبىز وبلىستىق ءبىلىم جانە دەنساۋلىق ساقتاۋ باسقارمالارى باسشىلارىمەن بىرلەسىپ تالقىلاپ جاتىرمىز. ەڭ اۋەلى رەزيدەنتسيانى قانداي زاڭدىلىقپەن مەملەكەتتىك مەنشىككە الۋ جولدارىن مەملەكەتتىك ورگاندارمەن بىرگە تالقىلاۋدامىز. وسى سۇراقتى شەشۋگە ءبىر اپتا ۋاقىت كەتەدى. سودان كەيىن ون بەس كۇننىڭ ىشىندە بۇل جەردەن بالالارعا ارنالعان ورتالىقتاردىڭ ءبىرى اشىلادى. عيماراتتىڭ ىشىنە قۇرىلىس جانە جوندەۋ جۇمىستارىن شۇعىل تۇردە جۇرگىزەمىز», دەيدى اقتوبە وبلىسى اكىمىنىڭ اپپارات باسشىسىنىڭ ورىنباسارى ەرجان بايتاناەۆ.
جەرگىلىكتى ورگانداردان رەزيدەنتسيانى ۇستاپ تۇرۋعا جىلىنا قانشا كولەمدە قاراجات بولىنەتىنىن بىلە المادىق. دەگەنمەن قازىرگى كەزدە وڭىردە مۇگەدەك, جەتىم بالالارعا ارنالعان تابيعات اياسىندا جابدىقتالعان ارنايى مەكەمە جوق. وبلىس ورتالىعىندا 1-6 جاستاعى جەتىم جانە ءتۋابىتتى دەنساۋلىعىندا كىناراتى بار بالالارعا ارنالعان ء«ۇمىت» سابيلەر ءۇيى بار. مۇندا 21 جەتىم جانە مۇگەدەكتىگى بار بالا تاربيەلەنەدى. ونىڭ 17-ءسى تۇلدىر جەتىم بولسا, ءتورت بالانىڭ اناسى بار. بالالارىن قاراۋعا شاماسى جەتپەگەندىكتەن, ءۇش جاسقا دەيىن بالالارىن وسى جەرگە ۋاقىتشا ورنالاستىرعان. ء«ۇمىت» سابيلەر ءۇيىنىڭ ءبىر جاعىندا اقىل-ەسى كەم, ءتۇرلى سىرقاتى بار 25 ەرەسەك جەتىم بالا تاربيەلەنىپ جاتىر. وسى بالالاردى پرەزيدەنت رەزيدەنتسياسىنا كوشىرسە جاقسى بولار ەدى دەگەن ۇسىنىس بار. ويتكەنى قالانىڭ قاق ورتاسىندا ورنالاسقان سابيلەر ۇيىندە بالالاردىڭ تازا اۋادا ەركىن جۇرۋىنە مۇمكىندىگى جوق. ال قارعالى بويىنداعى قورشالعان رەزيدەنتسيانىڭ اۋلاسىندا ءتۇرلى ساۋىقتىرۋ ءىس-شارالارىن وتكىزۋگە بولادى. ء«ۇمىت» بالالار ءۇيىنىڭ عيماراتى بوساپ قالسا, بۇل جەردە ءتۇرلى سىرقاتى بار بالالارعا ارناپ بالاباقشا اشۋعا بولادى. قالانىڭ شەتىندە ورنالاسقان رەزيدەنتسياعا بالاباقشا اشىلسا, كۇندەلىكتى اپارىپ-اكەلۋگە اتا-انالاردىڭ مۇمكىندىگى بولمايدى. ايتا كەتۋ كەرەك, اقتوبە قالاسىندا تەك اۋتيزم دەرتىنە شالدىققان 600 بالا بار.
اتىراۋ: سالاماتتى ساۋىقتىرۋ
مەملەكەت تاراپىنان بالالاردى قولداۋعا بايلانىستى پارمەندى ءىس-شارالار اتقارىلىپ كەلەدى. بالالار جىلى جاريالانىپ, ەركىن ەلدىڭ ەرتەڭىنە بالايتىن جاس ۇرپاققا سان الۋان قولداۋ كورسەتىلدى. ەندى مىنە, پرەزيدەنتتىڭ اتىراۋداعى رەزيدەنتسياسى بالالارعا ارنالعان دەمالىس جانە ساۋىقتىرۋ ورتالىعىنا اينالعالى وتىر.
«مەملەكەت باسشىسىنىڭ تاپسىرماسىنا سايكەس قوناق كۇتۋ نىساندارىن بالالارعا ارنالعان ساۋىقتىرۋ جانە دەمالىس كەشەنى رەتىندە قايتا اشۋ جوسپارلانىپ وتىر. وسىعان بايلانىستى اتىراۋ وبلىسىنىڭ مەملەكەتتىك ورگاندارى بالالاردىڭ قاجەتتىلىگىن زەرتتەي باستادى. ارنايى ورگانداردىڭ زەردەلەۋىنەن سوڭ بالالاردى ساۋىقتىرۋ جانە دەمالىس ورتالىعىنىڭ كەشەندىك ماقساتى ايقىندالادى» دەپ حابارلادى اتىراۋ وبلىسى اكىمىنىڭ ءباسپاسوز قىزمەتى.
ەندى جەرگىلىكتى اكىمدىك پرەزيدەنتتىڭ بۇرىنعى رەزيدەنتسياسىن قايتا جابدىقتاۋدى كوزدەپ وتىر. بۇل رەزيدەنتسيا جايىق وزەنىنىڭ جاعالاۋىندا ورنالاسقان. پرەزيدەنتتىڭ بۇل قادامىن جۇرتشىلىق جىلى قابىلدادى. ءتىپتى بالالارعا تارتۋ دەپ ەسەپتەيدى. ويتكەنى اتىراۋدا دا ساۋىقتىرۋدى قاجەت ەتەتىن بالالار سانى از ەمەس. ماسەلەن, «زەيىن اتىراۋ» ەرەكشە بالالاردى دامىتۋ ورتالىعى ءۇش جىل بۇرىن اشىلعان. مۇندا پسيحيكالىق جانە سويلەۋ قابىلەتى بۇزىلعان, اۋتيزم, تسەرەبرالدى سال اۋرۋى, داۋن سيندرومى بار بالالار جان-جاقتى وڭالتۋدان وتەدى.
– ەرەكشە بالالارعا اۆا-تەراپيا, نەيروگيمناستيكا, سەنسورلىق ينتەگراتسيا, بەيىمدەلگەن سپورت ادىستەرى ارقىلى كەشەندى وڭالتۋ قولدانىلادى. ورتالىقتا لوگوپەد, پسيحولوگ قىزمەتتەرى كورسەتىلەدى. ارنايى ماماندار بالالاردى سويلەۋگە, جازۋعا, قوعامدىق ورتادا ءوزىن ءوزى ۇستاۋعا ۇيرەتەدى. مۇندا اي سايىن 100-دەن استام ەرەكشە بالا وڭالتۋدان وتەدى. ءۇش جىل ىشىندە ورتالىقتا وڭالتۋدان وتكەن 30-عا جۋىق ەرەكشە بالا قاتارلاستارىمەن بىرگە بالاباقشاعا بارۋعا مۇمكىندىك الدى. ال 15 بالا مەكتەپ تابالدىرىعىن اتتادى, – دەيدى «زەيىن اتىراۋ» ورتالىعىنىڭ جەتەكشىسى اراي باعىتجان.
بىلتىر بۇل ورتالىقتا توماتيس-تەراپيانىڭ زاماناۋي ادىستەمەسى ەنگىزىلىپ, بالالارمەن ساباق وتكىزۋگە ارنالعان سەنسورلىق بۇرىشى جاسالعان ەدى. ەرەكشە بالالار ءۇشىن باسسەين دە ورناتىلعان. بۇل – جوبانىڭ قۇنى 27 ميلليون تەڭگە. سونداي-اق «زەيىن-اتىراۋ» ەرەكشە بالالاردى دامىتۋ ورتالىعىندا ەرەكشە ءبىلىم بەرۋ قاجەتتىلىگى بار 50 بالاعا 120 تەگىن كۋرس ۇيىمداستىرىلعان.
تاراز: تابيعاتپەن تاربيەلەۋ
تاراز قالاسىنداعى پرەزيدەنت رەزيدەنتسياسى دا الداعى ۋاقىتتا بالالاردىڭ يگىلىگىنە پايدالانىلادى. جامبىل وبلىسىنىڭ جەرگىلىكتى اتقارۋشى بيلىگى بۇل ماقساتقا جىلىنا 50 ميلليون تەڭگە ءبولۋدى ءجون كورىپ وتىر. جاۋاپتى مامانداردىڭ سوزىنە سەنسەك, عيماراتتى كۇتىپ ۇستاۋعا جۇمسالاتىن قارجىنى وبلىس اكىمدىگى شارۋاشىلىق باسقارماسى قاراستىرادى. بالالار يگىلىگىنە پايدالانۋعا بەرىلەتىن نىسان ازىرگە قانداي مەكەمە بولاتىنى ناقتىلانىپ جاتىر.
«پرەزيدەنتتىڭ تاپسىرماسىنا سايكەس, ءبىز وبلىسقا قاراستى نىساننان بالالارعا ارنالعان ارنايى مەكەمە اشۋدى جوسپارلاپ وتىرمىز. بۇگىنگى تاڭدا جۇمىستى جۇيەلەۋ ماقساتىندا وبلىس اكىمدىگى ءبىلىم باسقارماسىنىڭ نەگىزىندە زەردەلەۋ توبى قۇرىلدى. اتالعان توپ نىساندى ارالاپ, بارلىق جاعدايدى زەردەلەيدى. سوڭىنان كەڭەسە وتىرىپ, نىساندى مۇگەدەك بالالارعا بەرەمىز بە نەمەسە ساناتوريگە اينالدىرامىز با, جوق الدە لاگەر رەتىندە پايدالانامىز با, وسى ماسەلە بويىنشا ناقتى شەشىم قابىلدايمىز», دەيدى وبلىس اكىمىنىڭ ورىنباسارى ەركىن ۇيسىمباەۆ جاعدايدى ءتۇسىندىرىپ.
پرەزيدەنت پارمەنىنە سايكەس شاھاردان 15 شاقىرىم جەردە ورنالاسقان كەشەن الداعى ۋاقىتتا بالالاردىڭ يگىلىگىنە بەرىلەتىنى تۇسىنىكتى. دەگەنمەن مەملەكەت باسشىسى بۇيرىق بەرگەنىمەن, نىساندى تۇرلەندىرۋ تيپىنە قاتىستى ماسەلەنى ءوڭىر باسشىلارىنىڭ تاڭداۋىنا قالدىرىپ وتىر. از كۇندە ماسەلە تولىقتاي شەشىمىن تاپپاق.
قالا ماڭىندا ورنالاسقان رەزيدەنتسيا 1965 جىلدان بەرى قولدانىستا ەكەنىن ايتا كەتكەن ءجون. دەرەكتەرگە سەنسەك, كەشەندە 20 ادام ەڭبەك ەتەدى. تەلىمدە ەكى عيمارات, تەننيس كورتى بار. اينالاسى جاسىل جەلەكپەن كومكەرىلگەن.
قوستاناي: قاراعايلى ساياباق اياسىندا
مەملەكەت باسشىسى قاسىم-جومارت توقاەۆتىڭ تاپسىرماسىمەن قوستانايداعى پرەزيدەنت رەزيدەنتسياسى دا بالالاردىڭ يگىلىگىنە بەرىلمەك. وبلىس اكىمدىگى پرەزيدەنت تاپسىرماسىنىڭ مىندەتتى تۇردە ورىندالاتىنىن, رەزيدەنتسيا مىندەتتى تۇردە بالالارعا ارنالعان مەكەمە بولاتىنىن مالىمدەدى. بىراق ونىڭ ناقتى قاي باعىتتا جۇمىس ىستەيتىنىن جۋىق ارادا ارنايى قۇرىلعان جۇمىس توبى انىقتايدى.
– قوستاناي وبلىسى اكىمدىگىنە قاراستى امانگەلدى ەلدى مەكەنىندە ورنالاسقان لاۋازىمدى تۇلعالاردى كۇتۋگە نەگىزدەلگەن كەشەندى بالالارعا ارنالعان الەۋمەتتىك نىسانعا اينالدىرۋعا قاتىستى مەملەكەت باسشىسىنىڭ تاپسىرماسى ورىندالادى. وسى ماقساتتا, وبلىس اكىمىنىڭ ورىنباسارى رينات مۇحامەتقاليەۆتىڭ توراعالىعىمەن ارنايى جۇمىس توبى قۇرىلدى. جۇمىس توبى بارلىق ماسەلەلەردى زەرتتەي وتىرىپ, وبلىس اكىمىنە ءبىر ايدىڭ ىشىندە ناقتى ۇسىنىس بەرەدى. باستى ماقسات – اتالعان نىساندى بالالاردىڭ الەۋمەتتىك قاجەتتىلىگىنە بەيىمدەۋ. قىمبات جوبالاردان باس تارتىپ, مەملەكەت قاراجاتىن ۇنەمدەۋ ماسەلەسىن قوستاناي وبلىسى اكىمى ۇدايى كوتەرىپ كەلەدى. اتالعان كەشەندى الەۋمەتتىك سالاعا بەيىمدەۋ تۋرالى ايماق باسشىسى بۇعان دەيىن دە ايتقان بولاتىن. پرەزيدەنت تاپسىرماسى وسى ءىستى جىلدامداتىپ, بيۋدجەت قاراجاتىن ءتيىمدى پايدالانۋعا ىقپال ەتەرى ءسوزسىز, – دەدى وبلىس اكىمىنىڭ ءباسپاسوز حاتشىسى جۇماتاي كاكىمجانوۆ.
توبىل وزەنىنىڭ جاعالاۋىنداعى پرەزيدەنت رەزيدەنتسياسى قوستاناي اۋدانىنداعى ءالجان جانە سادوۆىي اۋىلدارىنىڭ ماڭىندا, تابيعاتى اسەم كەڭ القاپقا ورنالاسقان. نىسان شامامەن 2 گەكتارعا جۋىق جەردى الىپ جاتىر. قالىڭ اعاشتىڭ اراسىندا تۇرعان كەشەننىڭ اۋماعىندا التى عيمارات بار. ونىڭ ەكەۋى 2002 جىلى, تورتەۋى 2004-2008 جىلدار ارالىعىندا, پرەزيدەنت جانىنداعى شەتەلدىك ينۆەستورلار كەڭەسىنىڭ جالپى وتىرىسىن وتكىزۋگە دايىندىق شارالارى بارىسىندا سالىنعان. بەيرەسمي مالىمەتتەرگە سەنسەك, الىپ كەشەندى ۇستاپ تۇرۋعا جىلىنا 50 ملن تەڭگە قارجى جۇمسالىپ كەلگەن.
بۇعان دەيىن قاراپايىم تۇرعىندار كىرمەك تۇگىلى, ماڭايىنا جاقىنداپ بارا المايتىن كۇزەتى كۇشتى كەشەننىڭ اۋەدەن تۇسىرىلگەن سۋرەتىنەن رەزيدەنتسيا اۋماعىندا تۇرعان جاسىل شاتىرلى, ەكىقاباتتى ەڭسەلى ءتورت ءۇيدى كورۋگە بولادى. شەتىرەك ەكى اق بوز كيىز ءۇي, ءدال ورتادا سۋبۇرقاق ورنالاسقان. ال قاراعايلى ساياباقتىڭ ساياسىندا تەننيس كورتىنا ۇقسايتىن اق شاتىرلى ۇلكەن عيمارات تۇر. قورعاۋداعى كەشەن اۋماعىندا ايدىن كولگە سۇعىنا, سۋدىڭ ءدال ۇستىنە اعاشتان سالىنعان سەگىز قىرلى, جاسىل شاتىرلى جەڭىل عيماراتتى دا بايقاۋعا بولادى. كول ۇستىندە تۇرعان عيماراتتان ۇزىندىعى شامامەن 5 مەتر بولاتىن اعاش كوپىر ارقىلى جاعاعا شىعادى. بۇل عيمارات قايىققا مىنۋگە ارنالعان ورىن بولۋى كەرەك دەپ بولجادىق. كەلىستى دەمالىس ورنىنا لايىق كەشەننىڭ ءبىر شەتىنە قاراي جاسىل شاتىرلى تاعى ءبىر ءۇي ورنالاسقان. بۇل – گولف-كلۋبتىڭ اكىمشىلىك عيماراتى بولۋ كەرەك, ويتكەنى ءۇيدىڭ جانىندا گولف ويناۋعا ارنالعان اشىق الاڭقاي بار. كەشەن اۋماعىنداعى جارىق باعاندارى مەن جاسىل جەلەك, بيىك قاراعايلاردىڭ كوپتىگى قايران قالدىرادى. ءوزارا ۇيلەسە جاراسىپ تۇرعان كەلىستى بيىك عيماراتتاردىڭ اراسىن قىمبات تاس توسەنىش توسەلگەن سۇرلەۋ جولدار جالعاپ جاتىر.
كوپتەن بەرى كوپشىلىككە جۇمباق بولىپ كەلگەن قۇپيا كەشەننىڭ تاياۋ كۇندەرى بالالاردىڭ يگىلىگىنە وتەتىنىن ەستىگەن قاراپايىم جۇرتشىلىق تا پرەزيدەنتتىڭ ءادىل شەشىمىنە ريزاشىلىق ءبىلدىرىپ جاتىر.
ماتەريالدى دايىنداعاندار:
گۇلنار جولجان, گۇلايىم شىنتەمىرقىزى,
جولداسبەك كوشەرباي ۇلى, نۇرقانات قۇلاباي,
بايان قۋاندىققىزى, تابيعات مۇسىلمانقۇل,
«Egemen Qazaqstan»