«اۋىل» حالىقتىق-دەموكراتيالىق پاتريوتتىق پارتياسىنىڭ توراعاسى ءالي بەكتاەۆ مالىمدەمە جاسادى, دەپ حابارلايدى Egemen.kz.
جۋىردا پرەزيدەنت قاسىم-جومارت توقاەۆ جەتىنشى سايلانعان قر پارلامەنتىنىڭ ءماجىلىسىن تاراتىپ, 2023 جىلعى 19 ناۋرىزعا قر پارلامەنتى ءماجىلىسى دەپۋتاتتارىنىڭ كەزەكتەن تىس سايلاۋىن تاعايىنداعانى بەلگىلى بولدى. وسىعان بايلانىستى «اۋىل» حالىقتىق-دەموكراتيالىق پاتريوتتىق پارتياسىنىڭ توراعاسى ءالي بەكتاەۆ رەسمي مالىمدەمە جاسادى.
- «اۋىل» حالىقتىق-دەموكراتيالىق پاتريوتتىق پارتياسى ءوز قاتارىندا تەك اۋىل شارۋاشىلىعى قىزمەتكەرلەرىن عانا ەمەس, جالپى اۋىلعا جاناشىر ازاماتتاردىڭ كوپشىلىگىن بىرىكتىرەدى. ءبىزدىڭ قاتارىمىزدا اگرارلى سەكتور, ءبىلىم جانە مەديتسينا, الەۋمەتتىك سالا قىزمەتكەرلەرى, عالىمدار مەن زيالى قاۋىم وكىلدەرى بار», - دەدى ءالي بەكتاەۆ.
قازاقستان ازاماتتارىنىڭ جارتىسىنا جۋىعى اۋىلدا تۇرادى. پارتيا توراعاسىنىڭ ايتۋىنشا, اۋىلدى اۋماقتاردى دامىتۋ, اۋىل شارۋاشىلىعىن وركەندەتۋ مەملەكەتىمىزدىڭ ازىق-ت ۇلىك قاۋىپسىزدىگىنىڭ نەگىزى بولىپ ەسەپتەلەدى.
«بۇل - ءبىزدىڭ پارتيانىڭ باستاپقى جانە وزگەرمەيتىن ساياسي باعىتى. سوندىقتان «اۋىل» پارتياسى پارلامەنتتىڭ تومەنگى پالاتاسى مەن ماسليحاتتارعا سايلاۋ وتكىزۋدى قۇپتايدى. ءبىز قازاقستاندا پارتيالىق ءورىستىڭ كەڭەيگەنى مەن ساياسي كۇشتەر اراسىنداعى باسەكەلەستىكتىڭ دامىپ كەلە جاتقاندىعىن كورىپ وتىرمىز. بۇل ءبىزدى قورقىتپايدى, كەرىسىنشە, ىنتالاندىرادى. سەبەبى ءبىزدىڭ ءوزىمىزدىڭ ساياسي پلاتفورمامىز بار. «اۋىل» پارتياسىنىڭ اۋىل جانە اۋىلدى اۋماقتاردى دامىتۋ كونتسەپتسياسىنا قوساتىن ءوزىنىڭ ۇسىنىستارى بار. سوندىقتان ءبىز جاڭا سايلاۋ تسيكلىندە ادال جانە اشىق كۇرەسكە دايىنبىز», دەدى پارتيا توراعاسى.