بىلتىر جىل سوڭىندا ەلدەگى بانك كارتالارىنىڭ سانى 64,4 ملن-عا جەتتى. ءسويتىپ, 2021 جىلدان بەرى 9,9 پايىزعا كوبەيدى. كارتالاردىڭ 33 ميلليونى بەلسەندى تۇردە قولدانىلىپتى. دەبەتتىك كارتالار دا, نەسيە كارتالارى دا بەلسەندى ءوسىم كورسەتىپ وتىر. ال 2022 جىلدىڭ 11 ايىندا قولما-قولسىز جاسالعان تولەم كولەمى تولەم كارتالارى بويىنشا جيىنتىق قارجى اينالىمىنىڭ 82 پايىزىن قۇراعان.
64,4 ملن كارتانى بۇكىل قازاقستاندىققا بولەر بولساق, سابيلەردى قوسا ەسەپتەگەندە ءار تۇرعىنعا ەكى بانك كارتاسىنان تيەسىلى بولىپ شىعادى. ال ەكونوميكالىق بەلسەندى حالىققا شاققاندا – ءۇش جانە ودان دا كوپ كارتادان تيەسىلى.
«وسىدان بىرنەشە جىل بۇرىن Gold/Platinum كلاسىنداعى كارتالار كەز كەلگەن ادام ءۇشىن قولجەتىمدى ەمەس ەدى. ال قازىر ازاماتتارىمىز ءۇشىن پرەميۋم سەگمەنتتەگى كارتالاردىڭ (Visa Infinite / Mastercard World Elite / Union Pay Diamond جانە باسقالار) ءوزى تاڭسىق ەمەس. مۇنداي كلاستاعى كارتالاردى ەلىمىزدە 8 ەكىنشى دەڭگەيلى بانك ۇسىنادى», دەيدى Ranking ساراپشىلارى.
نارىقتاعى 4 بانك قانا مەتالل كارتالارىن اينالىمعا شىعارعان. – Altyn Bank, Jusan Bank جانە «بانك تسەنتركرەديت» Visa Infinite مەتالل كارتاسىن ۇسىنسا, «ەۋرازيالىق بانك» كليەنتتەرى Visa Infinite مەن Mastercard World Elite اراسىندا تاڭداۋ جاساي الادى.
«تەك Altyn Bank 7 ملن تەڭگەگە دەيىنگى شەكتى سوماسى ءارى كرەديتتىك ءارى دەبەتتىك جان-جاقتى كارتا ۇسىنا الادى. بانكتىڭ كەز كەلگەن كليەنتى پرەميۋم كارتا اشا الادى. ءتورت بانكتە دە مەتالل كارتا اشقانى ءۇشىن ۇستالاتىن كوميسسيا كولەمى – 30 مىڭ تەڭگە. جىلدىق قىزمەت كورسەتۋ بويىنشا ەڭ ءتيىمدى شارت تا Altyn Bank-تە: ايىنا 2,5 مىڭ تەڭگە نەمەسە جىلىنا 30 مىڭ تەڭگە. «بانك تسەنتركرەديت» پەن Jusan Bank-ءتىڭ قىزمەت كورسەتۋ قۇنى ايىنا – 10 مىڭ, جىلىنا 120 مىڭ تەڭگەگە شىعادى. «ەۋرازيالىق بانكتىڭ» قىزمەت كورسەتۋ شارتىنداعى كوميسسيا باعاسى – جىلىنا 240 مىڭ تەڭگە», دەلىنەدى Ranking شولۋىندا.
Altyn Bank-ءتىڭ VIP-كليەنتتەرى جانە وسى بانك كارتاسى ارقىلى جالاقى الاتىن ازاماتتار ءۇشىن كەز كەلگەن بانكوماتتان اقشا شەشىپ الۋ كوميسسياسىز جۇزەگە اسىرىلادى. قاراپايىم كليەنتتەر بۇل بانكتىڭ كارتاسى ارقىلى 1 ملن تەڭگەگە دەيىن قاراجاتتى كوميسسياسىز شەشە الادى. ودان ءارى قاراي كوميسسيا – سومانىڭ 1 پايىزىن قۇراپ وتىرادى.
«بانك تسەنتركرەديتتىڭ» ەل اۋماعىنداعى بارلىق بانكوماتتارىنداعى كوميسسياسىز بەرىلەتىن شەكتى سوما – 3 ملن تەڭگە. ودان ءارى قاراي الىنعان سومانىڭ 1 پايىزى ۇستالادى. «ەۋرازيالىق بانكتە» ءوز جەلىسى بويىنشا شەكتى سوما – 5 ملن, باسقا جەلىلەر (باسقا بانكتەردىڭ بانكوماتىنان الىنسا) بويىنشا 2 ملن تەڭگە دەپ بەكىتىلگەن. Jusan Bank-ءتىڭ شەكتى سوماسى – 1 ملن تەڭگە. ودان اسسا – 1 پايىز كوميسسيا كۇشىنە ەنەدى.