الەمنىڭ 180 ەلىنىڭ مەملەكەتتىك تۋىن جاتقا بىلەتىن استانا قالاسىنىڭ مەكتەپ وقۋشىسى 6 جاسار ەرگەن دۇيسەنبەك وقۋ-اعارتۋ مينيسترلىگىندە بولىپ, عاني بەيسەمباەۆپەن كەزدەستى, دەپ حابارلايدى Egemen.kz ۆەدومستۆونىڭ ءباسپاسوز قىزمەتىنە سىلتەمە جاساپ.
كەزدەسۋگە ەرگەن ءوزىنىڭ تۋلار جيناعىن اكەلىپ, بىلىمدىلىگىن كورسەتتى. سونداي-اق ول وسى ەلدەردىڭ بارلىعىنا بارۋدى ارماندايتىنىن ايتتى.
«مەن الەمنىڭ بارلىق مەملەكەتىنىڭ تۋىن بىلەمىن, بىراق سونىڭ ىشىندەگى ەڭ ادەمىسى – ءبىزدىڭ ەلدىڭ تۋى. مەن ەسەيگەندە اتاقتى ادام بولىپ, كوك بايراعىمىزدى بۇكىل الەمگە تانىتىپ, كوككە كوتەرگىم كەلەدى», دەدى وقۋشى.
وقۋ-اعارتۋ ءمينيسترى عاني بەيسەمباەۆ ءبىرىنشى سىنىپ وقۋشىسى ەرگەن دۇيسەنبەكپەن اڭگىمەلەسىپ, وعان گراموتا مەن ەستەلىك سىيلىقتار تابىس ەتتى. مينيستر ەرگەننىڭ اتا-اناسىنا اقىلدى جانە تاربيەلى ۇرپاق تاربيەلەگەندەرى ءۇشىن العىس ايتتى.