Mاسساچۋسەتس ۋنيۆەرسيتەتىنە قالاي تۇسۋگە بولادى؟ گارۆاردتا وقۋ ءۇشىن قويىلاتىن تالاپتار قانداي؟ روبوتتەحنيكا سالاسى نەسىمەن ماڭىزدى؟ امەريكالىق مۇناي كومپانياسىندا جۇمىس تاجىريبەسىنەن قالاي وتەدى؟ تالدىقورعان قالاسىنداعى نازارباەۆ زياتكەرلىك مەكتەبىنىڭ تۇلەكتەرى وسى ساۋالدارعا جاۋاپ بەردى.
الما-ماتەر قابىرعاسىندا العاش رەت تۇلەكتەردىڭ «سامعاۋ» فورۋمى ءوتتى. نەگىزگى ماقسات – نازارباەۆ زياتكەرلىك مەكتەپ تۇلەكتەرىنىڭ وقۋشىلارعا كاسىپتىك باعدار بەرۋىن قولداۋ. تۇلەكتەر مەن وقۋشىلار اراسىنداعى بىرەگەي ديالوگ الاڭىنا NIS تۇلەكتەر قاۋىمداستىعىنىڭ باستاماسىمەن 300-دەن استام قاتىسۋشىلاردى جينادى.
اتالعان جيىندا 10-سىنىپ وقۋشىسى, فورۋم سپيكەرلەرىنىڭ ءبىرى ەركەبۇلان ميللات پەن 2021 جىلعى تۇلەگى ءانۋار رىسبەك ءسوز سويلەپ, بولاشاقتاعى جوسپارلارىمەن ءبولىستى.
بۇگىندە ءانۋار – ماجارستاننىڭ دەبرەتسەن ۋنيۆەرسيتەتىنىڭ اۆياتسيا فاكۋلتەتىنىڭ 1-كۋرس ستۋدەنتى. ول ءوز سوزىندە NIS قالىپتاستىرعان مۋلتيتاسكينگ, پسيحوەموتسيونالدى جاعدايدى باقىلاۋ, تايم-مەنەدجمەنت سىندى داعدىلار ۋنيۆەرسيتەتتە ۇزدىك ستۋدەنتتەردىڭ ءبىرى بولۋىنا كومەكتەسكەنىن باسا ايتتى.
2018 جىلدىڭ تۇلەگى انتون مورگۋنوۆتىڭ ءسوزى وقۋشىلار اراسىندا ەرەكشە قىزىعۋشىلىق تۋدىردى. ول بىردەن اقش-تىڭ بەس ۇزدىك ۋنيۆەرسيتەتىنە شاقىرتۋ العان. قازىرگى ۋاقىتتا MIT-ءتىڭ (ماسساچۋسەتس تەحنولوگيالىق ينستيتۋتى) 4-كۋرس ستۋدەنتى. سونداي-اق ول قازاقستانداعى مەكتەپ وقۋشىلارى ءۇشىن تەگىن ونلاين ساباقتار وتكىزەتىن Beyond Curriculum ءبىلىم بەرۋ ونلاين پلاتفورماسىنىڭ نەگىزىن قالاۋشى.
«سامعاۋ» فورۋمىنىڭ پايداسى زور. بۇل – تاڭداۋلى ۋنيۆەرسيتەتتەرگە ءتۇسۋدىڭ ەگجەي-تەگجەيى, سونداي-اق ماماندىق تاڭداۋدا نە نارسەگە نازار اۋدارۋ كەرەكتىگى تۋرالى ءبىلۋ مۇمكىندىگى. مىسالى, مەنى حيميككە ماتەماتيكانىڭ تەرەڭ قۇرالدارى قانشالىقتى قاجەت بولاتىنى تاڭ قالدىردى», دەيدى ا. مورگۋنوۆ.
جيىن بارىسىندا ايگىلى «بارقىت ليگاسىنا» ەنگەن گارۆارد ۋنيۆەرسيتەتىنىڭ 2-كۋرس ستۋدەنتى سەزىم ەرتاناتوۆ پايدالى كەڭەستەرىمەن ءبولىسىپ, ءاربىر وقۋشىنىڭ «گارۆاردقا قالاي تۇسۋگە بولادى؟» دەگەن كوكەيىندەگى ساۋالىنا جاۋاپ بەردى.
«وقۋداعى جەتىستىكتەرىم, كوشباسشىلىق قاسيەتتەرىم, ۇلكەن جۇمىس قابىلەتىم جوسپارىمدى جۇزەگە اسىرۋعا مۇمكىندىك بەردى. گارۆاردقا ءتۇسۋ كەزدەيسوق جاعداي ەمەس, تىنىمسىز ەڭبەكتىڭ ناتيجەسى. قول جەتپەس اسۋ جوق, ارمان بولسا ورىندالمايتىن ەشنارسە جوق», دەپ تۇيىندەدى سەزىم ءسوزىن.
«NIS تۇلەگى ەسىمىن الىپ ءجۇرۋ مەن ءۇشىن ۇلكەن مارتەبە. بۇگىن سپيكەر رەتىندە ءسوز سويلەپ, تاجىريبەممەن ءبولىسۋدىڭ بىرەگەي مۇمكىندىگىنە يە بولدىم. مەن – بولاشاق ديپلوماتپىن, ىنتىماقتاستىق, ازاماتتىق جاۋاپكەرشىلىك, قازاقستاندىق پاتريوتيزم سياقتى قۇندىلىقتار مەندە دە, ماماندىعىمدا دا ورىن تابا الاتىنى ءسوزسىز», دەيدى 2021 جىلدىڭ تۇلەگى, ءال-فارابي اتىنداعى قازۇۋ 1-كۋرس ستۋدەنتى اجار ابيتاەۆا.
فورۋمنىڭ ارنايى سەسسياسىندا زياتكەر وقۋشىلار تۇلەكتەردى وزدەرىنىڭ عىلىمي, الەۋمەتتىك, شىعارماشىلىق جانە IT جوبالارىمەن تانىستىردى.
جەتىسۋ وبلىسى