قۇمار ويىننىڭ ءتۇبى – قۇردىم. مەملەكەتتىڭ اقشاسىن تالان-تاراجعا سالعان ادامنىڭ سوڭعى ايالداماسى تەمىرتور ەكەنى داۋسىز. تالدىقورعاندا جاعا ۇستاتار جاعداي بولدى. وبلىستىق بالالار اۋرۋحاناسىنىڭ ەسەپشىسى مەملەكەتتىڭ 116 ملن تەڭگەسىن بۋكمەكەرلىك باسكە سالىپ جىبەرگەن.
جەتىسۋ وبلىستىق ەكونوميكالىق تەرگەۋ دەپارتامەنتىنىڭ وكىلدەرى ۇستالعان ەسەپشىنىڭ بيۋدجەت قاراجاتىن ءبىر جىلدان اسا ۋاقىت كولەمىندە قۇمار ويىنعا جۇمساپ كەلگەنىن مالىمدەدى. «ول اقشانى ءوزىنىڭ بانكتىك كارتاسىنا اۋدارىپ, ءارى قاراي بۋكمەكەرلىك جەكە كابينەتىندەگى شوتىنا سالىپ وتىرعان», دەيدى دەپارتامەنت وكىلدەرى. قازىر كۇدىكتى كىناسىن تولىقتاي مويىنداعان.
ايتا كەتەيىك, وسىدان ءۇش اي بۇرىن تالدىقورعانداعى وبلىستىق بالالار اۋرۋحاناسىنىڭ مەديتسينا قىزمەتكەرلەرىنە بىرنەشە ايدان بەرى زەينەتاقى, الەۋمەتتىك جانە مەديتسينالىق تولەمدەردىڭ تولەنبەي جاتقانى حابارلانعان بولاتىن.
اق حالاتتىلار مىندەتتى تولەمدەرىنىڭ تولەنبەگەنىن نەسيە راسىمدەۋگە, ەندى ءبىرى اۋرۋحاناعا ەمدەلۋگە بارعاندا كەزدەيسوق بىلگەن. قازىر دەنساۋلىق ساقتاۋ باسقارماسىنىڭ باسشىلىعى مەديتسينا قىزمەتكەرلەرىنە تولىق تولەم جاساعانىن جەتكىزدى. ال ەسەپشىنىڭ ءىسى قازىر سوتتا قارالۋدا.
«جالپى اۋدارعان سوماسى ءبىر جىلدان اسا ۋاقىت كولەمىندە 116 ملن تەڭگە كولەمىندە. ءىس بويىنشا ونىڭ جاساعان ارەكەتى اۋىر قىلمىسقا جاتادى. 7-12 جىل ارالىعىندا باس بوستاندىعىنان ايىرۋ جازاسى كوزدەلگەن», دەدى جەتىسۋ وبلىستىق ەكونوميكالىق تەرگەۋ دەپارتامەنتىنىڭ اسا ماڭىزدى ىستەر جونىندەگى تەرگەۋشىسى اسلان بيداسوۆ.
جەتىسۋ وبلىسى