كوكسۋ اۋدانىنا قاراستى اقشاتوعان جانە ەڭبەكشىقازاق اۋىلىندا جاڭا فەلدشەرلىك اكۋشەرلىك پۋنكتتەر اشىلدى. وسىنداي قۋانىش كەربۇلاق اۋدانىنداعى جيىرما شاقتى وتباسى تۇراتىن شاعان اۋىلىندا دا بولدى. بالتىرى سىزداسا قالاعا اسىعاتىن اعايىن ەندى اۋىلدا جاتىپ-اق ەمدەلە الادى.
جالپى, اقشاتوعان جانە ەڭبەكشىقازاق اۋىلدارىندا جۇرگىزىلگەن قۇرىلىسقا رەسپۋبليكالىق قازىنادان 240 ملن تەڭگە بولىنگەن. قوس مەكەمە 2 مىڭعا جۋىق تۇرعىنعا قىزمەت كورسەتەدى. جاڭا ءبىر قاباتتى فاپ عيماراتىندا 12 كابينەت جابدىقتالعان. وندا العاشقى مەديتسينالىق كومەك كورسەتۋ ءۇشىن بارلىق جاعداي جاسالعان.
«اقشاتوعان اۋىلىندا ەمدەۋ جۇمىستارى ىڭعايلاستىرىلعان عيماراتتا جۇرگىزىلىپ كەلدى. ول وتە ەسكى. توزىعى جەتكەن عيمارات زاماناۋي سانيتارلىق تالاپتارعا ساي كەلمەدى. فاپ قۇرىلىسى كوپ جىلدان بەرى قوردالانىپ كەلگەن ماسەلەنى شەشتى. ەندى جەرگىلىكتى تۇرعىندار ساپالى مەديتسينالىق قىزمەت الا الادى», دەيدى كوكسۋ اۋدانىنىڭ ورتالىق اۋرۋحاناسىنىڭ ديرەكتورى جاننۇر سىرىموۆ.
فەلدشەرلىك-اكۋشەرلىك پۋنكتتە قۇرالداردى زارارسىزداندىرۋعا, اناليزدەردى جيناۋعا جانە پاتسيەنتتەردى ۆاكتسينالاۋعا ارنالعان بارلىق قاجەتتى جابدىق بار.
ايتا كەتەيىك, بيىل كوكسۋ اۋدانىندا تاعى 3 فاپ جانە 4 بمك قۇرىلىسى جۇرگىزىلەتىن بولادى.
ال شاعىن عانا شاعان اۋىلىندا ۇلكەن توي. بۇعان دەيىن باستاۋىش مەكتەپتىڭ ءبىر بولمەسىن پانالاعان مەدپۋنكت ەندى ءوز الدىنا بولەك وتاۋ تىگىپ وتىر. بلوكتى-ءمودۋلدى كونسترۋكتسيادان جىلدام تۇرعىزىلعان عيمارات مەديتسينالىق كومەك قىزمەتىنە لايىقتالىپ سالىنعان. مۇندا ەم-دوم جاسايتىن جانە شارۋاشىلىق قاجەتتىلىكتەرگە ارنالعان التى بولمە بار. مەدپۋنكتتە ءۇش ادام ەڭبەك ەتەدى.
اۋىل فەلدشەرى ۇلبوسىن قۋانىشباەۆا جاڭا نىسانعا ورنىققاندارىنا ءدان ريزا:
ء«وزى شاعىن مەكتەپتىڭ ءبىر بولمەسىندە تىعىلىسىپ وتىردىق, ارينە, قولايسىز بولدى. سوندا دا اۋىلداعى 100-گە جۋىق تۇرعىنعا كورسەتىلەتىن مەديتسينالىق كومەكتى ۇزگەن جوقپىز. ەندى جاڭا عيماراتقا كوشتىك, مۇندا بارلىق جاعداي جاسالعان. بۇل مەديتسينالىق قىزمەت كورسەتۋ ساپاسىنا دا ءوزىنىڭ وڭ ىقپالىن تيگىزەتىن بولادى», دەدى فەلدشەر.
عيماراتتىڭ اشىلۋ سالتاناتىنا اۋدان اكىمى قانات ەسبولاتوۆ ارنايى بارىپ, اۋىل تۇرعىندارىمەن سويلەستى. نىساننىڭ لەنتاسىن قيىپ, باتاسىن بەرگەن اۋىلدىق اقساقالدار كەڭەسىنىڭ توراعاسى رىسجان بايداۋلەتوۆ:
«شاعان اۋىلى ءۇشىن بۇل ەرەكشە قۋانىش. باس اۋىرىپ, بالتىر سىزداسا, جۇگىنەتىمىز وسى مەدپۋنكت. ونىڭ ءوز الدىنا بولەك عيماراتقا كوشىپ, جاڭا جەرگە ورنىعىپ جاتقانىنا ريزامىز. بارلىق قۇرالدارىن تۇگەندەپ, وتىراتىن ورىندارىن جايلاستىرىپ, بار جاعدايدى جاساپ قويىپسىزدار. اۋىل تۇرعىندارىنىڭ اتىنان راقمەت ايتامىن», دەدى.
جەتىسۋ وبلىسى اكىمىنىڭ ءباسپاسوز قىزمەتىنىڭ مالىمەتىنشە, مەديتسينالىق پۋنكتتىڭ قۇرىلىسىن «Qaz Damu Construction» جشس وتكەن جىلدىڭ تامىز ايىنىڭ سوڭىندا باستاعان. مىنە, 3-4 اي كولەمىندە قۇرىلىس جۇمىستارىن تولىق اياقتاپ, عيمارات ىسكە قوسىلدى. جوبانىڭ قۇنى – 35 ملن 840 مىڭ تەڭگەنى قۇرايدى.
جەتىسۋ وبلىسى